యూపీఎస్సీ ఫలితాలలో సత్తా చాటిన జగిత్యాల జిల్లా విద్యార్థి

జగిత్యాల మార్చి 7 ( ప్రజా మంటలు)
748 ర్యాంక్ సాధించిన రాహుల్ ను సన్మానించిన గ్రామస్తులు, స్థానిక ప్రజాప్రతినిధులు 

  *ఇటీవల విడుదలైన యూపీఎస్సీ 2025 --2026 ఫలితాలలో జగిత్యాల జిల్లాకు చెందిన రాహుల్  748 ర్యాంకు సాధించి సత్తా చాటాడు. *
జగిత్యాల జిల్లా జగిత్యాల రూరల్ మండలం హన్మజీపేట గ్రామానికి చెందిన పుదరి రాహుల్ ర్యాంకు సాధించడం పట్ల గ్రామస్తులతోపాటు స్థానిక ప్రజాప్రతినిధులు హర్షం వ్యక్తం చేశారు. 

ఈ సందర్భంగా రాహుల్ మాట్లాడుతూ
తల్లిదండ్రుల కష్టాన్ని చూసి ఉన్నత ఉద్యోగం సాధించాలనే పట్టుదలతో చదివి రెండుసార్లు ర్యాంక్ సాధించలేకపోయినా, నిరాశ చెందక మూడోసారి రాసిన యూపీఎస్సీ సివిల్ సర్వీసెస్ పరీక్షలో 748 ర్యాంకు పొందినట్లు తెలిపారు.

రాహుల్ తల్లిదండ్రులు పూదరి గంగలక్ష్మి, మల్లేశం వీరికి ముగ్గురు సంతానం. కూతురు రాజశ్రీకి వివాహం కాగా, పెద్ద కుమారుడు రవితేజ సివిల్ సర్జన్ శిక్షణ పొందుతున్నాడు. చిన్న కుమారుడైన రాహుల్ సివిల్స్‌లో ర్యాంక్ సాధించాడు.

*సివిల్స్ సాధించడమే లక్ష్యం*

రాహుల్ ప్రాథమిక విద్యను జగిత్యాల లోని ప్రైవేట్ స్కూల్‌ లో 1 నుంచి 7వ తరగతి వరకు అభ్యసించాడు. అనంతరం 8 నుంచి 10వ తరగతి వరకు పొరండ్ల జిల్లా పరిషత్ పాఠశాలలో చదివాడు.
బాసర ఐఐటీ లో బీటెక్ కంప్యూటర్ సైన్స్ పూర్తి చేశాడు.
బీటెక్ పూర్తయ్యాక నాలుగేళ్లుగా సివిల్స్ లక్ష్యంగా క్రమం తప్పకుండా సిద్ధమయ్యాడు.

*తల్లిదండ్రుల కల నెరవేరింది*

తల్లిదండ్రులు వ్యవసాయం చేస్తూ మాకు ఉన్నత చదువులు అందించారని రాహుల్ తెలిపారు. ఎంతో కష్టపడి చదివించిన తల్లితండ్రుల కల నెరవేర్చేందుకు  కష్టపడి చదివి పరీక్ష రాసి నేడు విడుదలైన  ఫలితాలలో మంచి ర్యాంకు సాధించడం గర్వంగా ఉందని రాహుల్ వెల్లడించారు.