జగిత్యాల మున్సిపాలిటీలో మొక్కల కొనుగోళ్లు, బయోమైనింగ్‌పై విచారణ జరపాలి - హనుమండ్ల జయశ్రే

జగిత్యాల, అక్టోబర్ 10 (ప్రజా మంటలు):

జగిత్యాల మున్సిపాలిటీలో వనమహోత్సవం పేరుతో మొక్కల కొనుగోళ్లు, వాటి నిర్వహణ ఖర్చులు, బయోమైనింగ్ పనుల్లో అవకతవకలు జరిగాయనే ఆరోపణలపై సమగ్ర విచారణ జరిపించాలని మాజీ కౌన్సిలర్ హనుమండ్ల జయశ్రీ డిమాండ్ చేశారు. ఈ మేరకు అక్టోబర్ 10న తెలంగాణ మున్సిపల్ అడ్మినిస్ట్రేషన్, పట్టణాభివృద్ధి శాఖ కమిషనర్‌కు ఫిర్యాదు చేశారు. మొక్కల కొనుగోళ్లకు సంబంధించిన బిల్లులను విచారణ పూర్తయ్యే వరకు నిలిపివేయాలని, ఆరోపణలు నిర్ధారణ అయితే బాధ్యులపై చట్టపరమైన చర్యలు తీసుకోవాలని కోరారు. ఫిర్యాదు ప్రతులను జగిత్యాల జిల్లా కలెక్టర్, రాష్ట్ర విజిలెన్స్ అండ్ ఎన్‌ఫోర్స్‌మెంట్ విభాగం డైరెక్టర్ జనరల్‌కు కూడా పంపించారు.

లక్ష మొక్కల కొనుగోలుపై అభ్యంతరాలు

జగిత్యాల మున్సిపాలిటీ వనమహోత్సవంలో భాగంగా లక్ష మొక్కల కొనుగోలుకు జూలై 24, 2026న టెండర్లు పిలిచినట్లు జయశ్రీ తన ఫిర్యాదులో పేర్కొన్నారు. టెండర్ ప్రక్రియలో టీవీసీ నర్సరీ అండ్ అగ్రి బిజినెస్ సెంటర్ ఒక్కటే పాల్గొని, కేవలం 1.2 శాతం తక్కువ ధరకు టెండర్ దాఖలు చేసిందని తెలిపారు. ఈ ప్రక్రియ పారదర్శకతపై అనుమానాలు ఉన్నాయని, ఇతర నర్సరీలు ఎందుకు పాల్గొనలేదో పరిశీలించాలని కోరారు.

జగిత్యాల పట్టణంలో ఇళ్ల సంఖ్య, మొక్కలు పెంచుకునే అవకాశాలు, గతంలో మున్సిపల్ నర్సరీల్లో పెంచిన మొక్కలను పరిగణనలోకి తీసుకోకుండా లక్ష మొక్కలు కొనుగోలు చేయడం అవసరమా అనే అంశాన్ని పరిశీలించాలని విజ్ఞప్తి చేశారు. గతంలో హరితహారం కార్యక్రమంలో భాగంగా మున్సిపాలిటీ పరిధిలోని సుమారు ఐదు నర్సరీల్లో వేలాది మొక్కలు పెంచినట్లు, వాటిలో మిగిలిన మొక్కలు ఇప్పటికీ అందుబాటులో ఉండే అవకాశం ఉందని పేర్కొన్నారు.

ఈ ఏడాది లక్ష మొక్కల కొనుగోలుకు టెండర్ పిలిచినప్పటికీ, కొత్తగా సుమారు 20 వేల మొక్కలు మాత్రమే తెప్పించి, మిగిలిన 80 వేల మొక్కలను పాత నర్సరీల నుంచి తీసుకొచ్చి పంపిణీ చేస్తున్నారనే అనుమానాన్ని జయశ్రీ వ్యక్తం చేశారు. పాత మొక్కలకు సుమారు రూ.13 లక్షల బిల్లులు రూపొందించి చెల్లింపులు పొందేందుకు ప్రయత్నాలు జరుగుతున్నట్లు తన దృష్టికి వచ్చిందని ఆరోపించారు. ఈ ఆరోపణలను అధికారికంగా పరిశీలించి, వాస్తవాలను నిర్ధారించాలని కోరారు.

టెండర్ ప్రక్రియ, మొక్కల సరఫరా, నిల్వలు, పంపిణీ వివరాలపై వివరణ కోరినప్పుడు సంబంధిత అధికారులు తమకు ఈ వ్యవహారం గురించి తెలియదని చెప్పినట్లు ఫిర్యాదులో పేర్కొన్నారు. మొక్కలను ఎవరు సరఫరా చేశారు, వాటి వివరాలను ఎవరు నమోదు చేశారు, బిల్లులను ఎవరు ధ్రువీకరిస్తున్నారనే అంశాలపై స్పష్టత ఇవ్వాలని కోరారు.

నిర్వహణ ఖర్చులు, కుండీల వినియోగంపైనా ప్రశ్నలు

జగిత్యాల మున్సిపాలిటీలో మొక్కల నిర్వహణ కోసం ఏటా సుమారు రూ.50 లక్షలు ఖర్చు చేస్తున్నట్లు రికార్డుల్లో చూపుతున్నారని జయశ్రీ ఆరోపించారు. పట్టణంలో ఉన్న చెట్ల సంఖ్యతో పోలిస్తే ఈ వ్యయంపై సమగ్ర పరిశీలన అవసరమని పేర్కొన్నారు. చెట్ల పెంపకం కోసం కొనుగోలు చేసిన కుండీలను మొక్కలు నాటేందుకు వినియోగించకుండా కొన్ని చోట్ల నిరుపయోగంగా ఉంచారని, మరికొన్ని చోట్ల అవి పగిలిపోయి కనిపిస్తున్నాయని తెలిపారు.

మొక్కల నిర్వహణకు అవసరమైన పరికరాల కొనుగోళ్లకు సంబంధించి రికార్డుల్లో చూపుతున్న ఖర్చులు, వాస్తవంగా కొనుగోలు చేసిన పరికరాలు, వాటి ప్రస్తుత నిల్వలను తనిఖీ చేయాలని కోరారు. కొనుగోళ్లు చేయకుండానే బిల్లులు చెల్లించిన సందర్భాలు ఉన్నాయనే ఆరోపణలను కూడా విచారించాలని విజ్ఞప్తి చేశారు.

రూ.2.20 కోట్ల బయోమైనింగ్ పనులపై విచారణకు డిమాండ్

జగిత్యాల మున్సిపాలిటీలో బయోమైనింగ్ పనుల నిర్వహణ, చెల్లింపులపైనా జయశ్రీ తీవ్ర అభ్యంతరాలు వ్యక్తం చేశారు. చెత్తను శాస్త్రీయంగా వేరు చేసి, వ్యర్థాలను తగ్గించి పట్టణాన్ని పరిశుభ్రంగా మార్చేందుకు చేపట్టాల్సిన బయోమైనింగ్ పనులకు థర్డ్ పార్టీ సంస్థకు సుమారు రూ.2.20 కోట్లు చెల్లించినట్లు ఫిర్యాదులో పేర్కొన్నారు. ఇందులో ఒక విడతలో రూ.కోటి, మరో విడతలో రూ.1.20 కోట్లు చెల్లించినట్లు తెలిపారు.

అయితే, బయోమైనింగ్ పనులకు సంబంధించిన పూర్తి రికార్డులు, ఫొటోలు, వీడియోలు, వ్యర్థాలను తరలించిన వివరాలు అందుబాటులో లేవని ఆమె ఆరోపించారు. అక్కడ పనిచేసిన కార్మికులు, డ్రైవర్ల ద్వారా తనకు తెలిసిన సమాచారం ప్రకారం, చెత్తను యంత్రాలతో చదును చేసి, దానిపై మొరం పోసినట్లు తెలుస్తోందని పేర్కొన్నారు. వాస్తవంగా బయోమైనింగ్ జరిగిందా? జరిగితే ఎంత పరిమాణంలో వ్యర్థాలను శుద్ధి చేశారు? మిగిలిన వ్యర్థాలను ఎక్కడికి తరలించారు? అనే అంశాలను సాంకేతికంగా పరిశీలించాలని కోరారు.

బయోమైనింగ్ పనుల కోసం చెల్లించిన మొత్తానికి సంబంధించిన కొలతల పుస్తకాలు, వర్క్ ఆర్డర్లు, బిల్లులు, చెల్లింపుల రికార్డులు, పనులు పూర్తయినట్లు ధ్రువీకరించిన నివేదికలను పరిశీలించాలని విజ్ఞప్తి చేశారు.

బిల్లులు నిలిపివేసి బాధ్యులపై చర్యలు తీసుకోవాలి

మొక్కల కొనుగోళ్లు, నిర్వహణ ఖర్చులు, బయోమైనింగ్ పనులకు సంబంధించిన అన్ని రికార్డులను స్వాధీనం చేసుకుని సమగ్ర విచారణ జరిపించాలని హనుమండ్ల జయశ్రీ కోరారు. విచారణ పూర్తయ్యే వరకు మొక్కల కొనుగోళ్లకు సంబంధించిన బిల్లుల చెల్లింపులను నిలిపివేయాలని, బయోమైనింగ్ పనులపై కూడా స్వతంత్ర సాంకేతిక పరిశీలన చేపట్టాలని విజ్ఞప్తి చేశారు.

ప్రజలు చెల్లించే పన్నుల ద్వారా సమకూరే మున్సిపల్ నిధులు సక్రమంగా వినియోగించేలా చర్యలు తీసుకోవాలని, ఆరోపణలు నిజమని తేలితే సంబంధిత అధికారులతో పాటు బాధ్యులైన ఇతర వ్యక్తులపై చట్టప్రకారం చర్యలు తీసుకోవాలని ఆమె కోరారు.