సిరిసిల్ల సభ విజయాన్ని జీర్ణించుకోలేకే బీఆర్ఎస్ నేతల అక్కసు

కరీంనగర్, అక్టోబర్ 2 (ప్రజా మంటలు):

ముఖ్యమంత్రి రేవంత్‌రెడ్డి సిరిసిల్ల పర్యటన, బహిరంగ సభ విజయవంతం కావడాన్ని జీర్ణించుకోలేకే బీఆర్ఎస్ నాయకులు అక్కసుతో మాట్లాడుతున్నారని జిల్లా కాంగ్రెస్ ఎస్సీ సెల్ అధ్యక్షుడు కొరివి అరుణ్ కుమార్, జిల్లా కాంగ్రెస్ అధికార ప్రతినిధి అలువాల కోటి విమర్శించారు.

కరీంనగర్ డీసీసీ కార్యాలయంలో గురువారం నిర్వహించిన విలేకరుల సమావేశంలో వారు మాట్లాడుతూ.. సిరిసిల్ల సభ అనంతరం బీఆర్ఎస్ నేతలు ఇష్టానుసారంగా వ్యాఖ్యలు చేస్తున్నారని ఆరోపించారు. కేటీఆర్ హైదరాబాద్‌లో తమ కుటుంబానికి ఇల్లు లేదని గతంలో చెప్పారని, అయితే హైదరాబాద్‌లో మూడు హోటళ్లు ఉన్నాయంటూ సీఎం రేవంత్‌రెడ్డి చేసిన వ్యాఖ్యలకు బీఆర్ఎస్ నేతలు సమాధానం చెప్పాలని డిమాండ్ చేశారు.

సోనియా గాంధీ ధనిక రాష్ట్రంగా అప్పగించిన తెలంగాణను అప్పులపాలు చేసి, కేసీఆర్ కుటుంబం మాత్రం భారీగా ఆస్తులు కూడబెట్టిందని కాంగ్రెస్ నేతలు ఆరోపించారు. తమ అఫిడవిట్లలోనే వందల ఎకరాల భూములు ఉన్నట్లు వెల్లడించారని, దీనిపై బీఆర్ఎస్ నేతలు ప్రజలకు సమాధానం చెప్పాలని కోరారు.

సిరిసిల్ల గడ్డపై కాంగ్రెస్ జెండా ఎగురవేస్తామని సీఎం ప్రకటించడంతో బీఆర్ఎస్ నాయకుల్లో ఆందోళన మొదలైందని అలువాల కోటి అన్నారు. సభకు ప్రజలు రాలేదని, పోలీసుల ద్వారా జనాన్ని తరలించారని చేస్తున్న విమర్శలు అవాస్తవమని, ప్రజలు స్వచ్ఛందంగా తరలివచ్చి సభను విజయవంతం చేశారని పేర్కొన్నారు.

మాజీ ఎమ్మెల్యే రసమయి బాలకిషన్ వ్యాఖ్యలను తీవ్రంగా ఖండిస్తున్నామని కొరివి అరుణ్ కుమార్ అన్నారు. దళిత స్పీకర్‌ను కించపరిచేలా మాట్లాడటం దళిత సమాజాన్ని అవమానించడమేనని పేర్కొన్నారు. ఎర్రవెల్లి ఫామ్‌హౌస్‌కు పసుపు నీళ్లు చల్లుతామంటూ చేసిన వ్యాఖ్యలను కూడా ఆయన తప్పుబట్టారు. దళితుల సమస్యలపై గతంలో అసెంబ్లీలో ఆవేదన వ్యక్తం చేసిన రసమయి ఇప్పుడు దళితులను అవమానించేలా మాట్లాడటం సరికాదన్నారు.

నేరెళ్ల ఘటనను ప్రస్తావిస్తూ, అప్పటి ప్రభుత్వ హయాంలో దళితులు ఇబ్బందులు ఎదుర్కొన్నారని కాంగ్రెస్ నేతలు ఆరోపించారు. సీఎం, స్పీకర్‌ను కించపరిచేలా వ్యాఖ్యలు చేస్తే కాంగ్రెస్ శ్రేణులు, దళిత సమాజం చూస్తూ ఊరుకోబోదని వారు హెచ్చరించారు.

సమావేశంలో ఎస్సీ సెల్ రాష్ట్ర వైస్ చైర్మన్ ముల్కల మల్లేశం, రాష్ట్ర ప్రధాన కార్యదర్శి సముద్రాల లక్ష్మణ్, రాష్ట్ర కార్యదర్శులు ఆరేపల్లి రాహుల్, శ్రావణ్, జిల్లా వైస్ చైర్మన్లు దుబ్బాసి కుమార్, గొట్టే బాబు, జిల్లా ప్రధాన కార్యదర్శి రాజ్ కుమార్, ఎస్సీ సెల్ మండలాధ్యక్షులు మీసాల సాయిలు, అరుణ్, కనకం అశోక్, మహిళా నాయకులు ముల్కల కవిత, హస్తపురం తిరుమల, కొండ్ర స్వరూప, కనకం సంధ్య, యువజన కాంగ్రెస్ జిల్లా ఉపాధ్యక్షులు జెరిపోతుల వాసు, గోనె పవన్ కళ్యాణ్, కవ్వంపల్లి రాజేంద్రప్రసాద్, ముల్కల యోనా తదితరులు పాల్గొన్నారు.