ఉద్యోగుల అంకితభావంతోనే సంక్షేమ ఫలాలు ప్రజలకు: సీఎం రేవంత్ రెడ్డి

కరీంనగర్, సెప్టెంబర్ 30 (ప్రజా మంటలు):

తెలంగాణలో ప్రభుత్వ ఉద్యోగులు, కాంట్రాక్టు, ఔట్‌సోర్సింగ్ సిబ్బంది కలిపి సుమారు 10.5 లక్షల మంది ఉద్యోగులు 4 కోట్ల మంది ప్రజలకు సేవలందిస్తున్నారని ముఖ్యమంత్రి ఎ. రేవంత్ రెడ్డి అన్నారు. కేవలం 3 శాతం మంది ఉద్యోగులు 95 శాతం ప్రజలకు సేవలందించడం ఎంతో శ్రమతో కూడుకున్నదని, ఉద్యోగుల అంకితభావంతోనే ప్రభుత్వ సంక్షేమ పథకాల ఫలాలు పేదలకు సమర్థవంతంగా చేరుతాయని పేర్కొన్నారు.

కరీంనగర్‌లో నూతనంగా నిర్మించిన సమీకృత జిల్లా కార్యాలయాల సముదాయం (IDOC)ను సీఎం ప్రారంభించారు. సముదాయం ఆవరణలో తెలంగాణ తల్లి విగ్రహాన్ని ఆవిష్కరించారు. అనంతరం పలు అభివృద్ధి కార్యక్రమాలకు శంకుస్థాపనలు చేసి, కలెక్టరేట్ భవనాన్ని పరిశీలించారు. జిల్లా అధికారులను ఉద్దేశించి మాట్లాడారు.

ప్రభుత్వ కార్యాలయాలు పేదవాడికి నమ్మకం, విశ్వాసం కలిగించేలా ఉండాలని సీఎం సూచించారు. సమస్యలు, బాధలతో కార్యాలయాలకు వచ్చే నిరుపేదలను కుటుంబ సభ్యులుగా భావించి అధికారులు, ఉద్యోగులు సేవలందించాలని కోరారు. ప్రభుత్వ నిర్ణయాలు, అనుమతులు, శాసనాలు, సంక్షేమ పథకాల ప్రయోజనాలను ప్రజలకు చేరవేయడంలో ఉద్యోగుల పాత్ర కీలకమన్నారు.

ప్రజా ప్రభుత్వం అధికారంలోకి వచ్చిన తర్వాత ప్రతి నెలా మొదటి తేదీన వేతనాలు చెల్లిస్తున్నామని, ప్రమోషన్లు, బదిలీలు, రిటైర్మెంట్ బెనిఫిట్స్, పీఆర్సీ, ఆరోగ్య భద్రత తదితర అంశాలను దశలవారీగా పరిష్కరిస్తున్నామని చెప్పారు. ఉద్యోగుల సమస్యలన్నీ పరిష్కరించామని చెప్పడం లేదని, ఇంకా కొన్ని సమస్యలు ఉన్నాయని, ప్రజలకు సేవలందిస్తూనే వాటిని పరిష్కరించుకుంటూ ముందుకు సాగుదామని అన్నారు.

కరీంనగర్ జిల్లాలో రూ.944 కోట్ల విలువైన అభివృద్ధి పనులను ప్రారంభించామని సీఎం తెలిపారు. అర్బన్ ఛాలెంజ్ ఫండ్ కింద కేంద్ర ప్రభుత్వ సహకారంతో రూ.840 కోట్ల నిధులు సాధించామని చెప్పారు. రాష్ట్ర అభివృద్ధికి కేంద్రం సహకరిస్తే ముఖ్యమంత్రిగా అభినందించడంలో ఎలాంటి శషబిషలు లేవన్నారు.

ఎన్నికల సమయంలోనే రాజకీయాలు చేయాలని, మిగిలిన సమయంలో రాష్ట్ర, కేంద్ర ప్రభుత్వాలు పరస్పర సహకారంతో అభివృద్ధి కోసం పనిచేయాలని రేవంత్ రెడ్డి అన్నారు. కరీంనగర్–హైదరాబాద్ మార్గంలో కంటోన్మెంట్ ప్రాంతం ప్రధాన అడ్డంకిగా ఉండేదని, ప్రధానమంత్రి నరేంద్ర మోదీ, రక్షణ మంత్రి రాజ్‌నాథ్ సింగ్‌లతో చర్చించి ఆరు నెలల్లోనే కంటోన్మెంట్ పరిధిలో దాదాపు 170 ఎకరాల భూమిని రాష్ట్రానికి అందేలా చర్యలు తీసుకున్నామని తెలిపారు.

కంటోన్మెంట్ ప్రాంతంలో సుమారు రూ.5 వేల కోట్లతో ఎలివేటెడ్ కారిడార్ నిర్మాణాన్ని ఏడాదిలోపు పూర్తి చేయాలని లక్ష్యంగా పెట్టుకున్నామని చెప్పారు. బేగంపేట విమానాశ్రయం రన్‌వే కింద నుంచి రహదారి నిర్మాణానికి కూడా అనుమతులు సాధించామని వెల్లడించారు. అభివృద్ధి విషయంలో రాజకీయ సిద్ధాంతాలు వేరైనా పరస్పర సహకారంతో ముందుకు సాగుతామని స్పష్టం చేశారు.

కరీంనగర్ జిల్లాకు సంబంధించిన అభివృద్ధి కార్యక్రమాలు, ఇతర అంశాలపై త్వరలో మరోసారి జిల్లాకు వచ్చి సమగ్రంగా సమీక్ష నిర్వహిస్తానని సీఎం తెలిపారు.