సిరిసిల్లలో సీఎం రేవంత్‌రెడ్డి పాదయాత్ర.. రూ.340 కోట్ల అభివృద్ధి పనులకు శ్రీకారం

సిరిసిల్ల, సెప్టెంబర్ 30 (ప్రజా మంటలు):

ప్రజా పాలన–ప్రగతి బాట కార్యక్రమంలో భాగంగా ముఖ్యమంత్రి ఎ. రేవంత్‌రెడ్డి సిరిసిల్లలో 3 కిలోమీటర్లకు పైగా పాదయాత్ర నిర్వహించారు. డాక్టర్ బీఆర్ అంబేద్కర్ చౌరస్తా నుంచి రగుడు ప్రాంతంలోని బహిరంగ సభ ప్రాంగణం వరకు ప్రజల మధ్య నడుస్తూ అభివాదం చేశారు. భారీగా తరలివచ్చిన ప్రజలు పాదయాత్రలో పాల్గొన్నారు.

అనంతరం సిరిసిల్ల జిల్లాలో మొత్తం రూ.340 కోట్ల వ్యయంతో చేపట్టనున్న వివిధ అభివృద్ధి పనులకు సీఎం శంకుస్థాపనలు, ప్రారంభోత్సవాలు చేశారు. సిరిసిల్ల ప్రజలు కోరుకున్న నేతన్న బజార్ పనులకు కూడా శ్రీకారం చుట్టారు.

ప్రధానంగా సిరిసిల్ల, వేములవాడలో రూ.200 కోట్లతో యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు, సిరిసిల్ల–కోనరావుపేటలో తెలంగాణ పబ్లిక్ స్కూళ్లు, వేములవాడ శ్రీ రాజరాజేశ్వర స్వామి ఆలయ అభివృద్ధికి రూ.99.40 కోట్ల పనులకు శంకుస్థాపన చేశారు.

అలాగే సిరిసిల్ల, వేములవాడలో ఆర్డీవో కార్యాలయాలు, తంగళ్లపల్లి, వీర్నపల్లి, వేములవాడ రూరల్, రుద్రంగిలో తహసీల్దార్ కార్యాలయాలు, వేములవాడలో సబ్‌రిజిస్ట్రార్ కార్యాలయ భవనాల నిర్మాణానికి శ్రీకారం చుట్టారు. రుద్రంగిలో 10 వేల మెట్రిక్ టన్నుల సామర్థ్యంతో గోదాములు, అనుబంధ యూనిట్లు, వేములవాడలో మహిళా పోలీస్ స్టేషన్, సిరిసిల్ల–వేములవాడలో ట్రాఫిక్ పోలీస్ స్టేషన్ల నిర్మాణానికి కూడా శంకుస్థాపన చేశారు.

సిరిసిల్ల మున్సిపాలిటీ పరిధిలోని పెద్దూరులో నిర్మించిన ఇందిరా మహిళా శక్తి భవన్‌ను సీఎం ప్రారంభించారు.

కార్యక్రమంలో మంత్రులు దుద్దిళ్ల శ్రీధర్‌బాబు, పొన్నం ప్రభాకర్, పొంగులేటి శ్రీనివాసరెడ్డి, అడ్లూరి లక్ష్మణ్‌కుమార్, ప్రభుత్వ విప్ ఆది శ్రీనివాస్, ఎంపీ వేం నరేందర్‌రెడ్డి, ఎమ్మెల్సీ, పీసీసీ అధ్యక్షుడు బొమ్మ మహేష్‌కుమార్ గౌడ్ తదితరులు పాల్గొన్నారు.