గాంధీ ఆస్పత్రిలో అదనంగా 20 అత్యవసర పడకలు

సికింద్రాబాద్, సెప్టెంబర్ 29 (ప్రజా మంటలు): 

 సికింద్రాబాద్‌ గాంధీ ఆస్పత్రి ఎమర్జెన్సీ విభాగంలో రోగులకు మరింత మెరుగైన వైద్య సేవలు అందించేందుకు అదనంగా 20 పడకలను అందుబాటులోకి తెచ్చినట్లు సూపరింటెండెంట్‌ ప్రొఫెసర్‌ ఉషారాణి తెలిపారు. మంగళవారం ఆస్పత్రి కాన్ఫరెన్స్‌ హాలులో వివిధ విభాగాల అధిపతులు (హెచ్‌‌ఓడీలు), ఆర్‌ఎంఓలతో నిర్వహించిన సమన్వయ సమావేశంలో ఆమె మాట్లాడారు. ఎమర్జెన్సీ విభాగంలోని మెకో, డిజాస్టర్‌ వార్డుల్లో ఈ 20 పడకలను సిద్ధం చేశామని, ముఖ్యంగా ట్రామా కేసుల్లో ఎలాంటి జాప్యానికి తావులేకుండా బాధితులను తక్షణమే అడ్మిట్‌ చేసుకుని చికిత్స అందించాలని డ్యూటీ డాక్టర్లు, సీఎంఓలు, ఆర్‌ఎంఓలను ఆదేశించారు.
అంబులెన్సుల్లో ప్రాణాపాయ స్థితిలో వచ్చే క్షతగాత్రులను వెంటనే ఎమర్జెన్సీ వార్డుకు తరలించి, గోల్డెన్‌ అవర్‌లోగా వైద్యం అందేలా పక్కా కార్యాచరణ అమలు చేస్తున్నామన్నారు. ఎమర్జెన్సీ మెడిసిన్‌, క్రిటికల్‌ కేర్‌, న్యూరో, ఆర్థోపెడిక్‌, సర్జరీ విభాగాల వైద్యులు, పీజీ విద్యార్థులు సమన్వయంతో విధులు నిర్వర్తించి రోగులకు పునర్జన్మ ప్రసాదించేలా కృషి చేయాలని ఆమె పిలుపునిచ్చారు. ప్రస్తుతం క్రిటికల్‌ కేర్‌ విభాగ పనితీరు సంతృప్తికరంగా ఉందని ప్రశంసిస్తూనే, వివిధ విభాగాల్లో నెలకొన్న సమస్యలను దశలవారీగా పరిష్కరిస్తామని భరోసా ఇచ్చారు. ఈ సమీక్షా సమావేశంలో పలు విభాగాల హెచ్‌ఓడీలు, సీఎంఓలు, ఆర్‌ఎంఓలతో పాటు ఆస్పత్రి పాలనా యంత్రాంగం ప్రతినిధులు పాల్గొన్నారు.
--
---