బాపూజీ ఆశయ సాధనకు, బీసీల అభ్యున్నతికి కృషి చేస్తాం: మున్సిపల్ చైర్‌పర్సన్ సమిండ్ల వాణి శ్రీనివాస్

జగిత్యాల సెప్టెంబర్‌ 27: 

స్థానిక అంగడి బజార్‌లో తెలంగాణ ఉద్యమ యోధుడు, స్వాతంత్ర్య సమరయోధుడు ఆచార్య కొండా లక్ష్మణ్ బాపూజీ జయంతి వేడుకలను ఘనంగా నిర్వహించారు. ఈ సందర్భంగా బాపూజీ విగ్రహానికి మున్సిపల్ చైర్‌పర్సన్ సమిండ్ల వాణి శ్రీనివాస్, డీసీసీ అధ్యక్షులు నందయ్య పూలమాలలు వేసి నివాళులర్పించారు.

ఈ సందర్భంగా చైర్‌పర్సన్ సమిండ్ల వాణి శ్రీనివాస్ మాట్లాడుతూ.. కొండా లక్ష్మణ్ బాపూజీ స్వాతంత్ర్య సమరంతో పాటు తెలంగాణ సాధన కోసం జరిగిన తొలి, మలిదశ ఉద్యమాల్లో కీలక పాత్ర పోషించిన మహోన్నత నాయకుడని అన్నారు. బడుగు, బలహీన వర్గాలు, పేద ప్రజల హక్కులు, సామాజిక న్యాయం కోసం ఆయన చేసిన పోరాటం నేటి తరానికి స్ఫూర్తిదాయకమని పేర్కొన్నారు.

బాపూజీ తన జీవితాన్ని ప్రజా సేవకు, ముఖ్యంగా వెనుకబడిన వర్గాల హక్కులు, అభ్యున్నతి కోసం అంకితం చేశారని, ఆయన ఆశయాలను ముందుకు తీసుకెళ్లడమే ఆయనకు అందించే నిజమైన నివాళి అని అన్నారు. ప్రభుత్వం అమలు చేస్తున్న సంక్షేమ పథకాల ఫలాలు అర్హులైన ప్రతి ఒక్కరికీ అందేలా ప్రజాప్రతినిధులు కృషి చేయాలని సూచించారు.

“నేను కూడా ఒక బీసీ బిడ్డగా, మున్సిపల్ చైర్‌పర్సన్‌గా ఉన్నంతకాలం బీసీ వర్గాల సంక్షేమం, అభ్యున్నతి కోసం నా శాయశక్తులా కృషి చేస్తాను. బాపూజీ ఆశయ సాధనకు కట్టుబడి పనిచేస్తాను” అని స్పష్టం చేశారు.

జగిత్యాల పట్టణ అభివృద్ధికి ఎమ్మెల్యే డాక్టర్ సంజయ్ కుమార్ సహకారంతో ప్రజలకు మెరుగైన మౌలిక వసతులు, సంక్షేమ ఫలాలు అందేలా నిరంతరం కృషి చేస్తామని తెలిపారు.

కార్యక్రమంలో మనవూరి పవిత్ర మహేష్, అడువల జ్యోతి లక్ష్మణ్, కోఆప్షన్ సభ్యురాలు వీరబత్తిని పద్మజ శ్రీనివాస్, టీపీసీసీ ఆర్గనైజింగ్ సెక్రటరీ బండ శంకర్, మాజీ జడ్పీ చైర్‌పర్సన్ దావ వసంత సురేష్, జగిత్యాల పట్టణ పద్మశాలి సేవా సంఘం అడహాక్ కమిటీ కన్వీనర్ బాలే చంద్రశేఖర్, కో-కన్వీనర్ అనిల్ కుమార్ తదితరులు పాల్గొన్నారు.