సంక్షేమం–అభివృద్ధితో తెలంగాణను వికాసం వైపు నడిపిస్తున్నాం: సీఎం రేవంత్ రెడ్డి

సిరిసిల్ల, సెప్టెంబర్ 30 (ప్రజా మంటలు):

సంక్షేమ పథకాలను కొనసాగిస్తూనే అభివృద్ధి కార్యక్రమాలకు పెద్దపీట వేస్తూ విధ్వంసమైన తెలంగాణను వికాసం వైపు నడిపిస్తున్నామని ముఖ్యమంత్రి ఎ. రేవంత్ రెడ్డి అన్నారు. బుధవారం సిరిసిల్ల పట్టణంలో ప్రజాపాలన–ప్రగతి బాట కార్యక్రమంలో భాగంగా నిర్వహించిన బహిరంగ సభలో ఆయన ప్రసంగించారు.

సిరిసిల్లకు చేనేత రంగంలో ప్రత్యేక గుర్తింపు ఉందని సీఎం పేర్కొన్నారు. మనిషి నాగరికత వస్త్రంతో ప్రారంభమైందని, అలాంటి వస్త్ర పరిశ్రమకు సిరిసిల్ల ప్రధాన కేంద్రంగా నిలిచిందన్నారు. అగ్గిపెట్టెలో పట్టేలా చీరను మడతపెట్టే నైపుణ్యం సిరిసిల్ల నేతన్నల ప్రత్యేకతగా పేర్కొంటూ, వేలాది కుటుంబాలు చేనేత, మరమగ్గాల పరిశ్రమపై ఆధారపడి జీవిస్తున్నాయని తెలిపారు.

గల్ఫ్ దేశాలకు సిరిసిల్ల ప్రాంతం నుంచి పెద్ద సంఖ్యలో కార్మికులు వలస వెళ్తున్నారని సీఎం గుర్తుచేశారు. గల్ఫ్‌లో ప్రమాదవశాత్తు కార్మికులు మరణించిన సందర్భంలో వారి కుటుంబాలను ఆదుకునేందుకు రూ.5 లక్షల ఆర్థిక సహాయం అందించే ప్రత్యేక విధానాన్ని అమలు చేస్తున్నామని చెప్పారు.

ప్రజలకు సంక్షేమం అందించడంతో పాటు అభివృద్ధిని ముందుకు తీసుకెళ్తున్నామని పేర్కొన్న సీఎం.. రేషన్ కార్డులు, సన్నబియ్యం పంపిణీ, ఇందిరమ్మ ఇళ్లు, 200 యూనిట్ల వరకు ఉచిత విద్యుత్, రూ.2 లక్షల రుణమాఫీ, రైతు భరోసా, ఫీజు రీయింబర్స్‌మెంట్ వంటి పథకాలను వివరించారు.

చేనేత రంగానికి గత పదేళ్లలో రూ.2,234 కోట్లు ఖర్చు చేయగా, ప్రజా ప్రభుత్వం ఏర్పడిన తర్వాత రెండున్నరేళ్లలోనే రూ.1,751 కోట్లు ఖర్చు చేసినట్లు సీఎం తెలిపారు. ఈ సందర్భంగా నేరెళ్ల బాధితులకు ఆర్థిక సహాయాన్ని అందజేశారు.

సభలో మంత్రులు దుద్దిళ్ల శ్రీధర్ బాబు, తుమ్మల నాగేశ్వరరావు, పొన్నం ప్రభాకర్, అడ్లూరి లక్ష్మణ్ కుమార్, మహమ్మద్ అజారుద్దీన్, విప్ ఆది శ్రీనివాస్‌తో పాటు ప్రభుత్వ సలహాదారులు, ఎంపీలు, ఎమ్మెల్సీలు, ఎమ్మెల్యేలు, ఇతర ప్రజాప్రతినిధులు పాల్గొన్నారు.