ఆకట్టుకున్న ప్రాచీన జానపద ఇంద్రజాల ప్రదర్శనలు

గొల్లపల్లి, ఆగస్టు 09 (ప్రజా మంటలు):
గొల్లపల్లి మండల కేంద్రంలో సాధనాసురులు (సాధన శూరులు) నిర్వహించిన ప్రాచీన జానపద కళా ప్రదర్శనలు ప్రజలను విశేషంగా ఆకట్టుకున్నాయి. తరతరాలుగా పద్మశాలి సమాజానికి చెందిన కళాకారులు తమ పూర్వీకుల నుంచి సంక్రమించిన ఈ అరుదైన కళను పరిరక్షిస్తూ వస్తున్నారు. సాధనాసురుల కళాకారులు ప్రదర్శించిన అద్భుత విన్యాసాలు ప్రేక్షకులను ఆశ్చర్యచకితులను చేశాయి.

రంగురంగుల దుస్తులు, జోకర్ వేషధారణతో కళాకారులు చేసిన ఉత్కంఠభరిత గారడీ, ఇంద్రజాల విన్యాసాలు చిన్నారులు, పెద్దలను మంత్రముగ్ధులను చేశాయి. తలపై అగ్నిపాత్రలు వెలిగిస్తూ చేసిన విన్యాసాలు, కనికట్టు విద్యలు, వివిధ రకాల ప్రాచీన ఇంద్రజాల ప్రదర్శనలు ప్రత్యేక ఆకర్షణగా నిలిచాయి.

ప్రదర్శనలో భాగంగా చొప్పబెండ్ల పల్లకిపై నీటిలో పసుపు, తెల్లని పొడిని కలిపి ముద్దలుగా మార్చడం, వాటిని తిరిగి పొడిగా మార్చడం, తాళ్లతో కట్టిన ఒక గుంజను మరో గుంజకు చేరేలా చేయడం వంటి విన్యాసాలు ప్రేక్షకులను విస్మయానికి గురిచేశాయి. అలాగే ట్యూబ్‌లైట్‌ను ముక్కలుగా చేసి నములుతున్నట్లు చూపించిన విన్యాసం ప్రేక్షకులను ఉత్కంఠకు గురిచేసింది.

మరో విన్యాసంలో పందిరిలో కూర్చోబెట్టిన వ్యక్తిని క్షణాల్లో మాయం చేసి, ఎదురుగా ఉన్న భవనం పైభాగంలో ప్రత్యక్షమయ్యేలా చేసిన మాయాజాల ప్రదర్శనకు విశేష స్పందన లభించింది. ఇలాంటి మరెన్నో ప్రాచీన కళా విన్యాసాలతో సాధనాసురుల కళాకారులు ప్రేక్షకులను అలరించారు.

అంతరించిపోతున్న కళలకు ప్రోత్సాహం అవసరం

ఈ సందర్భంగా పద్మశాలి సేవా సంఘం అధ్యక్షులు అంకం భూమయ్య మాట్లాడుతూ, తరతరాలుగా కొనసాగుతున్న సాధనాసురుల వంటి అరుదైన జానపద కళారూపాలు ఆధునిక కాలంలో క్రమంగా కనుమరుగయ్యే దశకు చేరుకున్నాయని ఆవేదన వ్యక్తం చేశారు. ఈ కళలను భావితరాలకు అందించాలంటే ప్రభుత్వం, సాంస్కృతిక శాఖ ప్రత్యేక దృష్టి సారించి కళాకారులకు ఆర్థిక, సామాజిక ప్రోత్సాహం అందించాలని కోరారు.

ప్రాచీన జానపద కళలను కాపాడుకోవడం కేవలం ఒక సామాజిక వర్గం బాధ్యత కాదని, అవి మన సాంస్కృతిక వారసత్వంలో భాగమని ఆయన పేర్కొన్నారు. కళాకారులకు ప్రదర్శనలకు అవకాశాలు కల్పించడంతో పాటు వారి జీవనోపాధికి భరోసా కల్పించాలని విజ్ఞప్తి చేశారు.

ఈ కార్యక్రమంలో పద్మశాలి సేవా సంఘం ప్రధాన కార్యదర్శి చౌటపల్లి తిరుపతి (బట్టల దుకాణం), ఉపాధ్యక్షులు హనుమాన్లు, సహాయ కార్యదర్శి చౌటపల్లి రఘునందన్, కోశాధికారి అంకం లక్ష్మీనారాయణతో పాటు పద్మశాలి సేవా సంఘం సభ్యులు, గ్రామస్థులు, చిన్నారులు పెద్ద సంఖ్యలో పాల్గొని సాధనాసురుల ప్రదర్శనలను ఆసక్తిగా తిలకించారు.