పూర్తిస్థాయి పంచాయతీ కార్యదర్శి లేక గొల్లపల్లి అభివృద్ధి కుంటుపాటు

గొల్లపల్లికి రావాలంటేనే జంకుతున్న కార్యదర్శులు!
రాజకీయ ఒత్తిళ్లే కారణమా..? గ్రామంలో గుసగుసలు?

గొల్లపల్లి, ఆగస్టు 5 (ప్రజా మంటలు):
జగిత్యాల జిల్లా గొల్లపల్లి మండల కేంద్రంలోని గ్రామ పంచాయతీ పూర్తిస్థాయి కార్యదర్శి లేక తీవ్ర పరిపాలనా సంక్షోభాన్ని ఎదుర్కొంటోంది. నెలకోసారి ఇన్‌చార్జి కార్యదర్శిని నియమిస్తూ కాలం గడుపుతుండటంతో గ్రామ అభివృద్ధి పనులు పూర్తిగా స్తంభించిపోయే పరిస్థితి నెలకొంది.
కొత్త ఇళ్ల నిర్మాణ అనుమతుల కోసం ప్రజలు కార్యాలయం చుట్టూ తిరుగుతున్నా, ఇన్‌చార్జి కార్యదర్శులు స్పందించడం లేదని గ్రామస్తులు ఆవేదన వ్యక్తం చేస్తున్నారు. వర్షాకాలంలో అత్యవసరమైన పారిశుద్ధ్య చర్యలు, మురికి కాలువల శుభ్రత, బ్లీచింగ్ పౌడర్ చల్లడం, వీధిదీపాల మరమ్మతులు వంటి పనులు సిబ్బంది కొరతతో ఎక్కడికక్కడే నిలిచిపోయాయి. దీంతో గ్రామంలో ప్రజలు తీవ్ర ఇబ్బందులు ఎదుర్కొంటున్నారు.
గ్రామంలో స్థానిక సర్పంచ్ ఇండిపెండెంట్‌గా ఉండగా, ఉపసర్పంచ్ అధికార పార్టీకి చెందిన వ్యక్తి కావడంతో రాజకీయ ఒత్తిళ్ల కారణంగానే ఇక్కడ పనిచేయడానికి కార్యదర్శులు ముందుకు రావడం లేదనే చర్చ గ్రామంలో జోరుగా సాగుతోంది. అయితే ఈ ఆరోపణలపై అధికారికంగా ఎలాంటి నిర్ధారణ లేదు.
మండల కేంద్ర గ్రామ పంచాయతీ పరిస్థితి రోజురోజుకూ దిగజారుతున్నప్పటికీ సంబంధిత అధికారులు స్పందించడం లేదని గ్రామస్తులు విమర్శిస్తున్నారు. వెంటనే మంత్రి అడ్లూరి లక్ష్మణ్ కుమార్ జోక్యం చేసుకుని గొల్లపల్లికి పూర్తిస్థాయి గ్రామ పంచాయతీ కార్యదర్శిని నియమించి, అభివృద్ధి పనులను గాడిలో పెట్టాలని గ్రామ ప్రజలు డిమాండ్ చేస్తున్నారు.