ఇంటిగ్రేటెడ్ స్కూళ్ల టెండర్లలో గోల్‌మాల్ చేసి మేఘా, కేఎంవీ సంస్థలకే సగం పనులు ఇచ్చారు – టీఆర్ఎస్ చీఫ్ కల్వకుంట్ల కవిత

రేవంత్ రెడ్డి ప్రభుత్వ స్కూళ్ల జోలికొస్తే ప్రజలు మీ ప్రభుత్వాన్ని పడగొడతరు
ప్రభుత్వ విద్యను పూర్తిగా ప్రైవేట్ పరం చేసే కుట్రలను తిప్పికొడతాం
గ్రామాల్లోకి కార్పొరేట్ స్కూళ్లకు రెడ్ కార్పెట్ వేసి ఆహ్వానిస్తున్నరు

హైదరాబాద్, జూలై 20 (ప్రజా మంటలు):

ప్రభుత్వ విద్యను పూర్తిగా ప్రైవేట్ పరం చేసేందుకు ముఖ్యమంత్రి రేవంత్ రెడ్డి ప్రభుత్వం కుట్ర చేస్తోందని టీఆర్ఎస్ చీఫ్ కల్వకుంట్ల కవిత ఆరోపించారు. ప్రభుత్వ పాఠశాలల జోలికి వస్తే ప్రజలు ఈ ప్రభుత్వాన్నే పడగొడతారని ఆమె హెచ్చరించారు.

విద్యా కమిషన్ నివేదిక పేరుతో రాష్ట్రంలోని 27 వేల ప్రభుత్వ పాఠశాలలను 4 వేలకు కుదించే ప్రయత్నం జరుగుతోందని కవిత ఆరోపించారు. ఈ ప్రతిపాదనలను తెలంగాణ రక్షణ సేన మొదటి నుంచీ వ్యతిరేకిస్తోందన్నారు.

యంగ్ ఇండియా ఇంటిగ్రేటెడ్ స్కూళ్ల పేరుతో ఒక్కో పాఠశాలకు సుమారు రూ.146 కోట్లు ఖర్చు చేయనున్నారని, మొత్తం 72 పాఠశాలల నిర్మాణానికి దాదాపు రూ.11 వేల కోట్లు ఖర్చు చేస్తామని ప్రభుత్వం చెబుతోందని ఆమె పేర్కొన్నారు. అయితే ఈ పనుల్లో సగానికి పైగా కాంట్రాక్టులు మేఘా, కేఎంవీ సంస్థలకే దక్కాయని ఆరోపించారు.

ఈ సంస్థలు 5 శాతం అదనపు కోట్ చేయడం వల్ల ప్రభుత్వంపై రూ.600 కోట్లకు పైగా అదనపు భారం పడుతోందని కవిత అన్నారు. 72 పాఠశాలల టెండర్లలో జరిగిన అవకతవకలపై ముఖ్యమంత్రి ప్రజలకు స్పష్టత ఇవ్వాలని డిమాండ్ చేశారు. టెండర్లలో ‘రింగ్’ జరిగినట్లు స్పష్టంగా కనిపిస్తోందని, కాంగ్రెస్ ఎంపీకి చెందిన ‘వెలుగు’ పత్రికలోనే దీనిపై వార్త ప్రచురితమైందని ఆమె అన్నారు.

“గుడి ఎంత ముఖ్యమో బడి కూడా అంతే ముఖ్యం. కానీ పాఠశాలలు ప్రారంభమై నెల రోజులు గడిచినా విద్యార్థులకు యూనిఫాంలు అందలేదు. పిల్లలకు ఇస్తామని చెప్పిన బ్రేక్‌ఫాస్ట్ కూడా అందడం లేదు” అని కవిత విమర్శించారు.

ఇంటిగ్రేటెడ్ స్కూళ్లు రెవెన్యూ డివిజన్ స్థాయిలో ఏర్పాటు చేస్తే విద్యార్థులు దూర ప్రాంతాలకు వెళ్లాల్సి వస్తుందని, ముఖ్యంగా బాలికల విద్యకు తీవ్ర నష్టం జరుగుతుందని ఆమె ఆందోళన వ్యక్తం చేశారు. విద్యార్థుల రవాణా కోసం బస్సులు ఏర్పాటు చేయాల్సి ఉంటుందని, ఆ కాంట్రాక్టులు కూడా అదే సంస్థలకు అప్పగించే అవకాశం ఉందని ఆరోపించారు.

“గ్రామాల్లోని ప్రభుత్వ పాఠశాలలను బలోపేతం చేయాల్సింది పోయి, వాటిని మూసివేసి గ్రామాల్లోకి ప్రైవేట్, కార్పొరేట్ పాఠశాలలకు రెడ్ కార్పెట్ వేస్తున్నారు. బడ్జెట్ పాఠశాలలకు చెల్లించాల్సిన బకాయిలు చెల్లించకుండా వాటిని నిర్వీర్యం చేస్తున్నారు” అని కవిత అన్నారు.

ప్రభుత్వ పాఠశాలల సంఖ్యను భారీగా తగ్గిస్తే ప్రస్తుతం పనిచేస్తున్న ఉపాధ్యాయుల పరిస్థితి ఏమిటని ఆమె ప్రశ్నించారు. కొత్తగా ఉపాధ్యాయుల నియామకాలు చేపడతారా? అని ప్రభుత్వాన్ని నిలదీశారు.

మధ్యాహ్న భోజన పథకంలో గుడ్డుకు ప్రభుత్వం కేవలం రూ.6 మాత్రమే చెల్లిస్తోందని, బయట మార్కెట్లో గుడ్డు ధర రూ.8గా ఉందని కవిత తెలిపారు. విద్యార్థులకు వారానికి మూడు రోజులు కాకుండా ఐదు రోజులు గుడ్డు అందించాలని, ఒక్కో గుడ్డుకు చెల్లించే ధరను రూ.8కు పెంచాలని డిమాండ్ చేశారు.

ప్రభుత్వ విద్యను ప్రైవేట్ పరం చేసే ప్రయత్నాలను తెలంగాణ రక్షణ సేన ఎట్టి పరిస్థితుల్లోనూ సహించదని కవిత స్పష్టం చేశారు. గ్రామాల్లోనే ప్రభుత్వ పాఠశాలలు కొనసాగాలని, దూర ప్రాంతాల్లో ఏర్పాటు చేసే ఇంటిగ్రేటెడ్ పాఠశాలల వల్ల బాలికలు, పేద విద్యార్థులు విద్యకు దూరమయ్యే ప్రమాదం ఉందని ఆమె అన్నారు.

ఇంటిగ్రేటెడ్ స్కూళ్లు ఎప్పుడు పూర్తవుతాయో తెలియని పరిస్థితిలో, ముందుగా ఉన్న ప్రభుత్వ పాఠశాలలను మూసివేయడం సరికాదని కవిత పేర్కొన్నారు. గ్రామ సర్పంచులు ప్రభుత్వ పాఠశాలల పరిరక్షణ కోసం పోరాడాలని పిలుపునిచ్చారు.

“ప్రభుత్వ పాఠశాలల జోలికి వస్తే ప్రజలు ఈ ప్రభుత్వాన్నే పడగొడతారు. ప్రభుత్వ విద్యను ప్రైవేట్ పరం చేసే కుట్రలను ప్రజలతో కలిసి తిప్పికొడతాం” అని కల్వకుంట్ల కవిత హెచ్చరించారు.