ఆర్టీఐపై ఐదేళ్ల నిర్లక్ష్యం: సమాచార కమిషన్ ఆదేశాలతో కదిలిన జగిత్యాల జిల్లా యంత్రాంగం

గొల్లపల్లి (బుగ్గారం) ఫిబ్రవరి 06 (ప్రజా మంటలు)

జగిత్యాల జిల్లా కలెక్టర్ కార్యాలయం, జిల్లా పంచాయతీ అధికారి కార్యాలయాల్లో గత ఐదేళ్లుగా ఆర్టీఐ దరఖాస్తులకు సమాచారం ఇవ్వని విషయం అధికారికంగా వెలుగులోకి వచ్చింది. 2022 మే 17న చుక్క గంగారెడ్డి జిల్లా కలెక్టర్ కార్యాలయంలో ఆర్టీఐ దాఖలు చేసినప్పటికీ, ఇప్పటి వరకు సమాచారం అందించకపోవడంతో ఆయన తెలంగాణ రాష్ట్ర సమాచార కమిషన్‌ను ఆశ్రయించారు.

ఈ కేసులో బాధ్యులైన జిల్లా అధికారులకు కమిషన్ నోటీసులు జారీ చేసి, 2025 అక్టోబర్ 27న హైదరాబాద్‌లో విచారణకు హాజరు కావాలని ఆదేశించింది. అయితే ఆ ఆదేశాలను కూడా బేఖాతరు చేస్తూ జిల్లా అధికారులు విచారణకు హాజరుకాలేదు. దీనిపై ఆగ్రహం వ్యక్తం చేసిన సమాచార కమిషన్, అప్పీల్ కేసు నం. 14352/ఎస్.ఐ.సి–పి.వి.ఎస్.ఆర్./2022 ద్వారా షోకాజ్ నోటీసులు జారీ చేసింది.

కమిషన్ ఆదేశాల అనంతరం జిల్లా యంత్రాంగం స్పందించింది. ఈ నెల 4న జిల్లా కలెక్టర్ కార్యాలయం నుంచి ఉత్తర్వుల నం. ఎఫ్.2/578/2022 ద్వారా జిల్లా పంచాయతీ అధికారి కార్యాలయ ప్రజా సమాచార అధికారికి నోటీసులు జారీ చేసి, రెండు రోజుల్లో అర్జీదారుడు కోరిన సమాచారం ఇవ్వాలని ఆదేశించింది.

ఈ సందర్భంగా సామాజిక కార్యకర్త, ఉద్యమకారుడు చుక్క గంగారెడ్డి మాట్లాడుతూ, జిల్లా అధికారులు బాధ్యతారాహిత్యంతో వ్యవహరిస్తూ చట్టాలు, న్యాయస్థానాల తీర్పులను సైతం ఉల్లంఘిస్తున్నారని ఆరోపించారు. 2021 నుంచి వందలాది ఆర్టీఐ దరఖాస్తులు పెండింగ్‌లో ఉన్నాయని, న్యాయస్థానాలను ఆశ్రయిస్తే తప్ప అధికారులు స్పందించడంలేదని ఆవేదన వ్యక్తం చేశారు.

జిల్లా కలెక్టరేట్ పరిస్థితి ఇదైతే, మండల, గ్రామ స్థాయి కార్యాలయాల పని తీరుపై ప్రజలకు అనుమానాలు పెరుగుతున్నాయని ఆయన అన్నారు. ఇప్పటికైనా జిల్లా పాలనాధికారులు స్పందించి, ఆర్టీఐ దరఖాస్తులకు సకాలంలో సమాచారం అందించేలా చర్యలు తీసుకోవాలని, ప్రజావాణి విజ్ఞాపనలకు కూడా న్యాయం చేయాలని ఆయన డిమాండ్ చేశారు.