క్యాన్సర్ మరణశాసనం కాదు –మెగాస్టార్ చిరంజీవి

(పి కోటేశ్వర్)

సికింద్రాబాద్, పిబ్రవరి 04 ( ప్రజామంటలు) : 

 క్యాన్సర్ అనేది దేవుడు ఇచ్చిన శాపం కాదని, ముందస్తుగా గుర్తిస్తే ఈ వ్యాధిని కూడా జయించి సాధారణ జీవితం గడపవచ్చని పద్మవిభూషణ్ మెగాస్టార్ చిరంజీవి అన్నారు. కిమ్స్ హాస్పిటల్స్ సికింద్రాబాద్ ఆధ్వర్యంలో బుధవారం నిర్వహించిన అంతర్జాతీయ క్యాన్సర్ అవగాహన దినోత్సవ కార్యక్రమంలో ఆయన ముఖ్య అతిథిగా పాల్గొని జ్యోతి ప్రజ్వలన చేసి కార్యక్రమాన్ని ప్రారంభించారు.

ఈ సందర్భంగా చిరంజీవి మాట్లాడుతూ క్యాన్సర్ అంటేనే జీవితం ముగిసిందన్న భయం ప్రజల్లో ఉందని, కానీ అనేక మంది క్యాన్సర్‌ను జయించి సాధారణ జీవితానికి తిరిగి వస్తున్నారని తెలిపారు. జీవనశైలి ఆధారంగానే అనేక వ్యాధులు వస్తున్నాయని, అందువల్ల ప్రతి ఒక్కరూ ఆరోగ్యంపై జాగ్రత్తలు పాటించాలని చిరంజీవి సూచించారు.

లక్షణాలు కనిపిస్తే ఆలస్యం చేయకుండా వెంటనే వైద్యులను సంప్రదించాలని కోరారు. చిన్నారుల్లో కూడా క్యాన్సర్ కేసులు పెరుగుతుండటం ఆందోళనకరమని పేర్కొన్నారు.కార్యక్రమంలో సీనియర్ కన్సల్టెంట్ సర్జికల్ ఆంకాలజిస్ట్ డా. ముధు దేవరశెట్టి మాట్లాడుతూ.. గతంలో వయస్సు పైబడిన వారిలో ఎక్కువగా కనిపించిన క్యాన్సర్ ఇప్పుడు చిన్న వయసు వారిలోనూ వస్తోందన్నారు. జన్యుపరమైన లోపాలు, వంశపారంపర్య కారణాలు, రేడియేషన్ ప్రభావం, రసాయన పదార్థాల వినియోగం, మద్యం, ధూమపానం, ఒత్తిడి వంటి అంశాలు క్యాన్సర్‌కు ప్రధాన కారణాలుగా మారుతున్నాయని ఆయన తెలిపారు.

ప్రజల్లో అవగాహన లోపం కారణంగా చాలా మంది చివరి దశలోనే ఆసుపత్రులకు వస్తున్నారని చెప్పారు.క్యాన్సర్‌పై అవగాహన పెంచేందుకు కిమ్స్ హాస్పిటల్స్‌లో ‘క్యాన్సర్ ఫైట్ సపోర్ట్ గ్రూప్’ ఏర్పాటు చేసినట్లు తెలిపారు. చికిత్స పొందిన రోగులు సమాజంలోకి వచ్చి ధైర్యం కలిగించేలా ఈ గ్రూప్ పనిచేస్తుందని వివరించారు.

ఆధునిక చికిత్సలతో క్యాన్సర్‌ను సమర్థవంతంగా ఎదుర్కొనే అవకాశం ఉందని పేర్కొన్నారు.ఈ కార్యక్రమంలో కిమ్స్ మెడికల్ డైరెక్టర్ డా. సంబిత్ సాహు, మెడికల్ ఆంకాలజిస్ట్ డా. నరేందర్ కుమార్ తోట, క్యాన్సర్‌ను జయించిన వారు, చికిత్స పొందుతున్న రోగులు పాల్గొన్నారు.
––