ప్రజాస్వామ్య బద్ధంగా ఎన్నికైన ముఖ్యమంత్రి కులాల  పేరిట దుర్భాషలాడరాదు

జగిత్యాల ఫిబ్రవరి 5 ( ప్రజా మంటలు)
ఒక వ్యక్తిని వ్యక్తిగతంగా విమర్శించవచ్చు కానీ తమ జాతి పేరిట ప్రజాస్వామ్య బద్ధంగా ఎన్నికైన ముఖ్యమంత్రి స్థాయి వ్యక్తి వెలమజాతి పేరిట కెసిఆర్ ను విమర్శించడం సరికాదని జగిత్యాల వెలమ సంక్షేమ మండలి అధ్యక్షులు ఐల్నేని సాగర్ రావు  అన్నారు. గురువారం వెలమ సంఘ భవనంలో నిర్వహించిన విలేకరుల సమావేశంలో  మాట్లాడుతూ ఇటీవల ముఖ్యమంత్రి రేవంత్ రెడ్డి ప్రతిపక్ష నేత కెసిఆర్ ను విమర్శిస్తూ వెలుమ జాతి పేరిట దుర్భాషలాడడం ముఖ్యమంత్రి స్థాయికి తగదని అన్నారు.

కేసీఆర్ ను వ్యక్తిగతంగా విమర్శించుకోవడం రాజకీయాల్లో సబబుగా ఉంటుంది. కానీ ఒక జాతి పేరిట తమ కులాన్ని తక్కువ చేసి దుర్భాషలాడటం ముఖ్యమంత్రి స్థాయికి తగదని అన్నారు. గతంలో సీఎం పలుమార్లు జాతి పేరిట తమ కులాన్ని దుర్భాషలాడారని గుర్తు చేశారు .భారత రాజ్యాంగం ప్రకారం పక్షపాతరహితంగా కులమతాలకు అతీతంగా సమానత్వంగా వ్యవహరిస్తానని  ప్రమాణం చేసిన ముఖ్యమంత్రి ఈ విషయం గుర్తుంచుకోవాలన్నారు. ప్రజల సొమ్ముతో హార్వర్డ్ యూనివర్సిటీలో నేర్చుకున్నది ఇదేనా? అని వారు ప్రశ్నించారు.

తమ కులంలో జలగం వెంగళరావు, చొక్కా రావు లాంటి ఎందరో ఆదర్శ ప్రజా ప్రతినిధులు ఉన్నారని వారు ఎప్పుడూ ఇలాంటి వ్యాఖ్యలు చేయలేదని అన్నారు. కులాల మధ్య జాతుల మధ్య చిచ్చుపెట్టి పబ్బం  గడుపుకోవడం సరికాదని అన్నారు .తాము గ్రామాల నుండి వచ్చామని  తాము కూడా ఇలాంటి మాటలు మాట్లాడవచ్చునని కానీ తమ తల్లిదండ్రులు, తమ కులము సంస్కారం నేర్పిందని తమ జాతికి ఘన చరిత్ర ఉందని సేవాగుణము, దాతృత్వము తమ జాతిలో ఉన్న లక్షణమని అన్నారు. కెసిఆర్ ను జాతిపిత అవునా కాదా అనే విషయంపై ఆన్లైన్ ఓటింగ్ నిర్వహిస్తే తెలిసిపోతుందని సూచించారు.

రాజకీయాల్లో విమర్శలు కులాల పేరిట మతాల పేరిట ఉండరాదని గుర్తుంచుకోవాలని అన్నారు ఇలాంటి దుర్భాషలు పునరావృతం అయితే క్షమించేది లేదని న్యాయపరంగా చర్యలు తీసుకుంటామని హెచ్చరించారు. ఈ కార్యక్రమంలో వెలమ సంక్షేమ మండలి సలహా మండలి సభ్యులు పురుషోత్తమరావు కార్యవర్గ సభ్యులు విజయ రంగారావు ,గంగారావు నారాయణరావు ,సురేశ్ రావు ,నాగేశ్వరరావు, సురేందర్ రావు, శ్రీనివాసరావు, అశోక్ రావు పలువురు సభ్యులు పాల్గొన్నారు.