సీఎం రేవంత్ నిజాయితీపరుడైతే బీఆర్ఎస్ నేతలు జైలుకెళ్తారు : ఎంపీ అరవింద్

బిఆర్ఎస్ కు మున్సిపల్ ఎన్నికల్లో అభ్యర్థులే లేరు?

జగిత్యాల, జనవరి 23 (ప్రజా మంటలు):

ముఖ్యమంత్రి రేవంత్ రెడ్డి నిజంగా నిజాయితీపరుడైతే గత పాలనలో అవినీతికి పాల్పడ్డ బీఆర్ఎస్ నేతలు తప్పకుండా జైలుకు వెళ్లాల్సి ఉంటుందని బీజేపీ ఎంపీ అరవింద్ తీవ్ర వ్యాఖ్యలు చేశారు. లేదంటే ప్యాకేజీలకు లొంగుతాడా? లేక ధైర్యంగా చర్యలు తీసుకుంటాడా? అనే విషయం ప్రజలే గమనిస్తున్నారని అన్నారు.

జగిత్యాల జిల్లా కేంద్రంలోని పీఎంఆర్ హోటల్‌లో మున్సిపల్ ఎన్నికలపై నిర్వహించిన బీజేపీ కార్యకర్తల సన్నాహక సమావేశం అనంతరం ఆయన మీడియాతో మాట్లాడారు. రానున్న మున్సిపల్ ఎన్నికల్లో టీఆర్ఎస్ (బీఆర్ఎస్) పార్టీ తరఫున పోటీ చేయడానికి అభ్యర్థులే లేని పరిస్థితి నెలకొందని ఎద్దేవా చేశారు.

కెటిఆర్ డ్రగ్స్ పెడ్లర్?

కేటీఆర్‌పై తీవ్ర ఆరోపణలు చేస్తూ, ఆయన డ్రగ్ పెడ్లర్ అని, స్వయంగా డ్రగ్స్ వినియోగిస్తున్నారని ఆరోపించారు. డ్రగ్స్ వినియోగం, రవాణాపై కేసులు నమోదు చేయాలని డిమాండ్ చేశారు. “డ్రగ్స్ తీసుకునే వాళ్లకు క్యారెక్టర్ ఉంటుందా?” అంటూ ఘాటు వ్యాఖ్యలు చేశారు.

నా ఫోన్ గత ప్రభుత్వ హయంలో టాప్ అయింది

గత ప్రభుత్వ హయాంలో ఫోన్ ట్యాపింగ్ జరిగిన విషయం వాస్తవమేనని, తన ఫోన్ కూడా ట్యాప్ చేశారని ఎంపీ అరవింద్ తెలిపారు. జగిత్యాల ఎమ్మెల్యే సంజయ్ కుమార్ ఏ పార్టీలో ఉన్నాడో ఆయనకే తెలియని పరిస్థితి ఉందని విమర్శించారు. గతంలో ఎమ్మెల్యే తనను కలిసింది కేవలం పరిపాలనా అంశాలపైనే తప్ప, పార్టీ పరంగా కాదని స్పష్టం చేశారు.

జీవన్ రెడ్డి తండ్రితో సమానం

మాజీ మంత్రి జీవన్ రెడ్డి తనకు తండ్రితో సమానమని, ఆయన పట్ల కాంగ్రెస్ హైకమాండ్ వ్యవహరిస్తున్న తీరు బాధాకరమని అన్నారు. మున్సిపల్ ఎన్నికలు లేకపోయి ఉంటే తానే స్వయంగా వెళ్లి జీవన్ రెడ్డిని పరామర్శించేవాడినని చెప్పారు.

సీఎం రేవంత్ రెడ్డి అసలు ఏ పార్టీలో ఉన్నాడోనన్న అయోమయం నల్గొండ, ఖమ్మం జిల్లాల కాంగ్రెస్ నేతల్లోనే ఉందని ఎద్దేవా చేశారు. రేవంత్ కాంగ్రెస్‌లో ఉంటూ, టీడీపీ కార్యకర్తలకు బీఆర్ఎస్ జెండాలు, గద్దెలు కూల్చమని చెప్పడం విడ్డూరమన్నారు. ఎమ్మెల్సీ ఎల్. రమణ కూడా ఏ పార్టీలో ఉన్నాడో అర్థం కావడం లేదని వ్యాఖ్యానించారు.

బిఆర్ఎస్ కు అభ్యర్థులే లేరు?

రాష్ట్రంలో బీఆర్ఎస్ పరిస్థితి దయనీయంగా మారిందని, ఈ పరిస్థితుల్లో రానున్న మున్సిపల్ ఎన్నికలు బీజేపీకి గొప్ప అవకాశమని ఎంపీ అరవింద్ ధీమా వ్యక్తం చేశారు.

ఈ కార్యక్రమంలో జిల్లా అధ్యక్షుడు రాచకొండ యాదగిరి బాబు, మాజీ ఎంపీ బోర్లకుంట వెంకటేష్ నేత, బీజేపీ రాష్ట్ర కార్యవర్గ సభ్యురాలు డాక్టర్ బోగ శ్రావణి, మాజీ ఎమ్మెల్యే గుజ్జుల రామకృష్ణారెడ్డి, జిల్లా ఇంచార్జ్ గడ్డం శ్రీనివాస్, రాయికల్ మున్సిపల్ ఇంచార్జ్ బాణాల లక్ష్మారెడ్డి, ధర్మపురి మున్సిపల్ ఇంచార్జ్ బల్మూరు వనిత, జిల్లా ప్రధాన కార్యదర్శి నలువాల తిరుపతి, వడ్డేపల్లి శ్రీనివాస్, జగిత్యాల పట్టణ అధ్యక్షుడు కొక్కు గంగాధర్‌తో పాటు పలువురు నాయకులు, కార్యకర్తలు పాల్గొన్నారు..