ఉప ముఖ్యమంత్రి భట్టి డిల్లీ ఇంటిపై ఐ టి దాడులు – హరీశ్‌రావు సంచలన ఆరోపణలు!

హైదరాబాద్, నవంబర్ 8 (ప్రజా మంటలు):

తెలంగాణ మాజీ మంత్రి, బీఆర్‌ఎస్ ఎమ్మెల్యే తన్నీరు హరీశ్‌రావు ముఖ్యమంత్రి రేవంత్‌రెడ్డిపై తీవ్రస్థాయి విమర్శలు గుప్పించారు. ఢిల్లీలో మల్లు భట్టి విక్రమార్క ఇంటిపై జరిగిన ఐటీ దాడులు బీజేపీతో ఉన్న గోప్య ఒప్పందంలో భాగమని ఆరోపించారు.

హరీశ్‌రావు మాట్లాడుతూ “భట్టి ఇంట్లో ఐటీ దాడులు జరిగితే ఎందుకు బయటకు రాలేదు? రేవంత్‌రెడ్డి ఢిల్లీ వెళ్తే ఎవరిని కలుస్తున్నారో, ఎవరి కారులో తిరుగుతున్నారో ప్రజలకు తెలుసుకోవాలి,” అని ఎద్దేవా చేశారు.

 బీజేపీతో ‘ఫెవికాల్ బంధం’

హరీశ్‌రావు మాట్లాడుతూ, “రేవంత్‌రెడ్డి, కిషన్‌రెడ్డిల మధ్య చీకటి ఒప్పందం ఉంది. మంత్రి పొంగులేటి శ్రీనివాస్ రెడ్డి బయటకు రావడం కూడా అదే ఒప్పందం భాగం” అని అన్నారు.
అలాగే, తెలంగాణ సచివాలయానికి అంబేద్కర్ పేరు పెట్టడం రేవంత్‌రెడ్డికి ఇష్టం లేదని, అందుకే కమాండ్ కంట్రోల్ సెంటర్‌లో సీఎం కూర్చుంటున్నారని విమర్శించారు.

“రేవంత్‌రెడ్డి మానసిక స్థితిపై అనుమానం”

“ముఖ్యమంత్రి రేవంత్‌రెడ్డి మానసిక స్థితిపై మాకు అనుమానం ఉంది. జూబ్లీహిల్స్ బైపోల్స్‌లో కాంగ్రెస్ ఓటమి ఖాయం. ప్రజలు కేసీఆర్ అభివృద్ధిని మరచిపోలేరు,” అని హరీష్ రావు అన్నారు.

“వైఎస్సార్‌ను విమర్శించిన రేవంత్‌… ఇప్పుడు ఆయన వారసుడా?”

“రేవంత్‌రెడ్డి 2014 వరకు టీడీపీలో ఉన్నారు. వైఎస్సార్‌ను తీవ్రంగా విమర్శించిన రేవంత్‌… ఇప్పుడు వైఎస్సార్ పేరుతో రాజకీయాలు చేయటం నాటకమే,” అన్నారు.

“కేసీఆర్ కట్టిన నిర్మాణాలకే రేవంత్ రిబ్బన్ కత్తిరిస్తున్నారు”

“రెండేళ్లలో రేవంత్ రెడ్డి రాష్ట్రానికి ఏమీ చేయలేదు. రూ.30 కోట్ల అంచనాతో ప్రారంభమైన క్యాంపు ఆఫీస్ ఖర్చు రూ.100 కోట్లకు పెరిగింది. కమీషన్ కోసమే పెద్ద కాంట్రాక్టర్లకు బిల్లులు విడుదల చేస్తున్నారు,” అని హరీశ్‌రావు ఆరోపించారు.