చిన్న రైస్ మిల్లర్లకు అండగా ఉంటాం: తెలంగాణ రక్షణ సేన చీఫ్ కల్వకుంట్ల కవిత

హైదరాబాద్, జూలై 15 (ప్రజా మంటలు):

తెలంగాణ రక్షణ సేన చీఫ్ కల్వకుంట్ల కవితను రాష్ట్రానికి చెందిన చిన్న రైస్ మిల్లర్ల ప్రతినిధులు బుధవారం హైదరాబాద్‌లో కలిసి తమ సమస్యలను వివరించారు. అనంతరం మీడియాతో మాట్లాడిన కవిత, రాష్ట్ర ప్రభుత్వం పెద్ద రైస్ మిల్లర్ల పట్ల ఒక విధంగా, చిన్న రైస్ మిల్లర్ల పట్ల మరో విధంగా వ్యవహరిస్తోందని ఆరోపించారు. పెద్ద మిల్లర్లతో ప్రభుత్వం, ప్రధాన ప్రతిపక్షాలు కుమ్మక్కయ్యాయని, చిన్న మిల్లర్లను మాత్రం కేసులు పెట్టి వేధిస్తున్నారని విమర్శించారు.
కవిత మాట్లాడుతూ రైతుల నుంచి ధాన్యం కొనుగోలు ప్రక్రియలో ప్రభుత్వం తీవ్ర నిర్లక్ష్యం ప్రదర్శించిందని, దీంతో రైతులు అనేక ఇబ్బందులు ఎదుర్కొన్నారని అన్నారు. ధాన్యం కొనుగోలు సమయంలో 8 నుంచి 10 కిలోల వరకు తరుగు పేరుతో కోత విధించి రైతులను నష్టపరిచారని, ఈ వ్యవహారంలో సుమారు రూ.2 వేల కోట్ల మేర అక్రమాలు జరిగాయని ఆరోపించారు.
రాష్ట్రంలో వందల కోట్ల రూపాయల వ్యాపారం చేసే పెద్ద బాయిల్డ్ రైస్ మిల్లర్ల వద్ద నుంచి ప్రభుత్వానికి దాదాపు రూ.4 వేల కోట్ల బకాయిలు రావాల్సి ఉన్నప్పటికీ వారిపై ఎలాంటి చర్యలు తీసుకోవడం లేదని ఆమె విమర్శించారు. మరోవైపు రూ.10 లక్షల నుంచి కోటి రూపాయల వరకు బకాయిలు ఉన్న చిన్న రైస్ మిల్లర్లపై విచారణలు, కేసులు నమోదు చేసి అరెస్టులు చేస్తున్నారని ఆవేదన వ్యక్తం చేశారు. ఈ వేధింపులు భరించలేక కరీంనగర్‌కు చెందిన ఓ మహిళ ఆత్మహత్య చేసుకున్నప్పటికీ ప్రభుత్వం స్పందించలేదని అన్నారు.
గత ప్రభుత్వ హయాంలో లక్షా 40 వేల టన్నుల దొడ్డు బియ్యాన్ని ఫిలిప్పీన్స్‌కు కిలో రూ.48 చొప్పున విక్రయించారని, అయితే ప్రస్తుత ప్రభుత్వం అదే బియ్యాన్ని ముందుగా రూ.24, తర్వాత రూ.21.70కు విక్రయించేందుకు టెండర్లు పిలిచిందని కవిత ఆరోపించారు. ఈ టెండర్‌ను కరీంనగర్‌కు చెందిన ఓ రైస్ మిల్లర్‌కు అప్పగించారని, దీనిపై కోర్టులో కేసు పెండింగ్‌లో ఉన్నప్పటికీ ఇప్పటికే 10 వేల టన్నుల బియ్యాన్ని లిఫ్ట్ చేశారని పేర్కొన్నారు.
పౌరసరఫరాల శాఖ కమిషనర్ స్టీఫెన్ రవీంద్ర వ్యవహార శైలిపైనా కవిత విమర్శలు గుప్పించారు. ప్రభుత్వం తీసుకుంటున్న నిర్ణయాల వల్ల గోదాముల అద్దెలు, వడ్డీల భారం కారణంగా చిన్న రైస్ మిల్లర్లు తీవ్ర నష్టాలు చవిచూస్తున్నారని చెప్పారు. పెద్ద మిల్లర్లకు ఇచ్చిన ధరలకే చిన్న రైస్ మిల్లర్లకు కూడా నిల్వ బియ్యాన్ని విక్రయించే అవకాశం కల్పించాలని డిమాండ్ చేశారు.
చిన్న రైస్ మిల్లర్లకు వన్‌టైమ్ సెటిల్‌మెంట్ అమలు చేయాలని, పీడీఎస్ వ్యవస్థను బలోపేతం చేసి ప్రజలకు నాణ్యమైన బియ్యం అందించాలని కవిత ప్రభుత్వాన్ని కోరారు. పెద్ద మిల్లర్ల అక్రమాలపై చర్యలు తీసుకోకుండా చిన్న మిల్లర్లపై మాత్రమే కేసులు నమోదు చేయడం అన్యాయమని ఆమె అన్నారు. రాష్ట్రంలో ఏ రైస్ మిల్లునైనా తనిఖీ చేయడానికి సిద్ధమని, పెద్ద మిల్లర్ల వద్ద భారీ స్థాయిలో అక్రమాలు జరుగుతున్నాయని ఆరోపించారు.
చివరగా, ప్రస్తుతం ఉన్న బియ్యాన్ని ఫిలిప్పీన్స్‌కు ఎగుమతి చేయాలని, చిన్న రైస్ మిల్లర్లకు తెలంగాణ రక్షణ సేన పూర్తి అండగా ఉంటుందని కల్వకుంట్ల కవిత స్పష్టం చేశారు.