కొండగట్టు శ్రీ ఆంజనేయ స్వామి దేవస్థానంలో అంగరంగ వైభవంగా ప్రారంభమైన  హనుమాన్ పెద్ద జయంతి ఉత్సవాలు

కొండగట్టు మే 10 (ప్రజా మంటలు)
జగిత్యాల జిల్లా ప్రముఖ పుణ్యక్షేత్రమైన కొండగట్టు శ్రీ ఆంజనేయ స్వామి దేవస్థానంలో  హనుమాన్ పెద్ద జయంతి ఉత్సవాలు ఆదివారం అత్యంత ఘనంగా ప్రారంభమయ్యాయి. విశేష సంఖ్యలో భక్తుల నడుమ ఆలయ ప్రాంగణం ఆధ్యాత్మిక శోభ సంతరించుకుంది.

 హనుమాన్ పెద్ద జయంతి సందర్భంగా భద్రాచల శ్రీ సీతారామచంద్రస్వామి దేవస్థానం నుండి పవిత్ర శేష వస్త్రాలను భద్రాచల దేవస్థానం ఈవో దామోదర్ తీసుకువచ్చారు. రాష్ట్ర ప్రభుత్వం తరపున స్థానిక ఎమ్మెల్యే మేడిపల్లి సత్యం శేష వస్త్రాలను స్వీకరించి కొండగట్టు ఆలయానికి తీసుకురాగా, ఆలయ అధికారులు, అర్చకులు, భక్తులు డప్పు చప్పుళ్లు, మంగళ వాయిద్యాల నడుమ ఘన స్వాగతం పలికారు.

వైదిక మంత్రోచ్ఛారణల మధ్య శోభాయాత్ర నిర్వహించి, శేష వస్త్రాలను ఆలయ ఈవో ఎస్ అంజన రెడ్డి, స్థానాచార్యులు కపిందర్ స్వామి మరియు ఆలయ అర్చకులకు అధికారికంగా అందజేశారు. ఈ సందర్భంగా భక్తుల జై శ్రీరామ్, జై హనుమాన్ నినాదాలతో ఆలయ ప్రాంగణం మార్మోగిపోయింది.

తదుపరి భద్రాచల దేవస్థానం ఈవో దామోదర్, ఎమ్మెల్యే మేడిపల్లి సత్యం స్వామివారిని దర్శించుకొని ప్రత్యేక పూజలు నిర్వహించారు. ఆలయ అర్చకులు వైదిక ఆశీర్వచనాలు అందించి శేషవస్త్రంతో సత్కరించి లడ్డు ప్రసాదాన్ని అందజేశారు.

 హనుమాన్ పెద్ద జయంతి ఉత్సవాల సందర్భంగా ఆలయంలో స్వస్తి వాచనము, రక్షాబంధనము, ఋత్విక్ వరణము, అరుణి మథనము, దేవతాహ్వానము, యాగశాల ప్రవేశము, స్థాపిత దేవతారాధన, అగ్ని ప్రతిష్ఠ, హవనము తదితర వైదిక కార్యక్రమాలు ఘనంగా నిర్వహించారు. అలాగే శ్రీ స్వామివారికి ప్రత్యేక అభిషేకములు, సహస్రనామార్చన, పారాయణములు, నైవేద్యములు నిర్వహించి అనంతరం భక్తులకు తీర్థప్రసాద వితరణ చేపట్టారు.

ఈ ఆధ్యాత్మిక వేడుకల్లో ఆలయ ఏఈఓ గుండిహర్నాథ్, సూపరింటెండెంట్లు చంద్రశేఖర్, సునీల్, టెంపుల్ ఇన్స్పెక్టర్ చెక్కిళ్ళ అశోక్, ఆలయ అర్చకులు, అధికారులు, పెద్ద సంఖ్యలో భక్తులు పాల్గొన్నారు.

 హనుమాన్ పెద్ద జయంతి ఉత్సవాల సందర్భంగా రానున్న మూడు రోజుల పాటు యాగశాలలో త్రైయాహ్నిక హోమాలు, ప్రత్యేక పూజలు, సాంస్కృతిక కార్యక్రమాలు నిర్వహించనున్నట్లు ఆలయ అధికారులు తెలిపారు.