గాంధీ ఆస్పత్రిని సందర్శించిన మానవ హక్కుల కమిషన్‌ 

ఎమర్జెన్సీ వార్డు పీడియాట్రిక్ వార్డులను సందర్శించిన కమిషన్ చైర్మన్

పేషంట్లకు అందే వైద్యం భేష్ అని డాక్టర్లకు కితాబు

సికింద్రాబాద్, నవంబర్ 06 (ప్రజా మంటలు): 

మానవ హక్కుల పరిరక్షణ చట్టం–1993 లోని సెక్షన్‌ 12(c) ప్రకారం తన విధుల్లో భాగంగా తెలంగాణ రాష్ట్ర మానవ హక్కుల కమిషన్‌ గురువారం సికింద్రాబాద్‌లోని గాంధీ ఆస్పత్రిని సందర్శించింది.

ఈ సందర్భంగా కమిషన్‌ ఛైర్మన్‌ డా. జస్టిస్‌ షమీమ్‌ అఖ్తర్‌, సభ్యులు (జుడీషియల్‌) శివాది ప్రవీణ, సభ్యులు (నాన్‌ జుడీషియల్‌) డా. బి. కిషోర్‌ (ఐఏఎస్‌ రిటైర్డ్‌) పాల్గొన్నారు. కమిషన్‌ కార్యదర్శి, సీఈఓ  ఏ.ఎన్‌. కాంతి వెస్లీ (ఐఏఎస్‌), డిప్యూటీ రిజిస్ట్రార్‌ బి.వి.ఏ. విజయ్‌, ప్రజాసంబంధాధికారి పి.శ్రీనివాస్‌రావు, డీఎస్పీ రాములు తదితరులు వెంట ఉన్నారు.

సూపరింటెండెంట్‌ డా. వాణి, గాంధీ మెడికల్ కాలేజ్ ప్రిన్సిపాల్ డాక్టర్ కే ఇందిరా ఇతర వైద్యులు, చిలకలగూడ ఏసీపీ శశాంక్ రెడ్డి,  ఎస్ హెచ్ ఓ అనుదీప్ లు కమిషన్‌ బృందాన్ని ఆహ్వానించారు. కమిషన్‌ అధికారులు ముందుగా ఎమర్జెన్సీ వార్డును పరిశీలించి, విధుల్లో ఉన్న వైద్యులతో మాట్లాడారు. అనంతరం జెరియాట్రిక్‌ (వయోవృద్ధుల), పేడియాట్రిక్‌ (పిల్లల), పేడియాట్రిక్‌ సర్జరీ విభాగాలతోపాటు ఇతర విభాగాలను సందర్శించి సంబంధిత రికార్డులను పరిశీలించారు. ఈ సందర్భంగా సంబంధిత వైద్యులు పేషంట్లతో కమిషన్ చైర్మన్ మాట్లాడి వారికి అందుతున్న వైద్యాన్ని వసతుల గురించి అడిగి తెలుసుకున్నారు.

తరువాత సూపరింటెండెంట్‌ ఛాంబర్‌లో నిర్వహించిన మీడియా సమావేశంలో ఛైర్మన్‌ డా. జస్టిస్‌ షమీమ్‌ అఖ్తర్‌ గాంధీ ఆస్పత్రి సేవలపై సంతృప్తి వ్యక్తం చేశారు. ముఖ్యంగా పేడియాట్రిక్‌ సర్జరీ విభాగంలో జరుగుతున్న సేవలను ప్రశంసిస్తూ వైద్యులు, సిబ్బంది కృషిని అభినందించారు. నిత్యం వేలాదిమంది పేషెంట్లు,   వారి సహాయకులు ఆసుపత్రికి వస్తుంటారని ఈ క్రమంలో కొంత ఇబ్బంది కలిగేది సహజమే అని అన్నారు ఇది ప్రైవేటు కార్పొరేట్ ఆసుపత్రి లాగా కాదని నిత్యం ఎంతమంది పేషెంట్లు వచ్చిన కాదనకుండా ఇక్కడ డాక్టర్లు ఎంతో ఓపికతో వైద్యం చేయడం గొప్ప విషయం అన్నారు తెలంగాణలో ఇలాంటి ఆసుపత్రి ఉండటం గ్రేట్ అన్నారు.

గాంధీ డిప్యూటీ సూపరింటెండెంట్ డాక్టర్.సునీల్, ఆర్ఎంఓ శేషాద్రి, డాక్టర్ యోగేందర్, పీడియాట్రిక్ హెచ్ ఓ డి డాక్టర్ నాగార్జున, వైద్య సిబ్బంది పాల్గొన్నారు.