సూపర్‌ ఎల్‌నినో హెచ్చరికలపై ప్రభుత్వం నిర్లక్ష్యం: కల్వకుంట్ల కవిత

గోదావరిలో 418 టీఎంసీల నిల్వ సామర్థ్యానికి కేవలం 93 టీఎంసీలే ఉన్నాయని వెల్లడి

కోరుట్ల, జూలై 19 (ప్రజా మంటలు):

సూపర్‌ ఎల్‌నినో ప్రభావంపై వాతావరణ నిపుణులు ముందస్తు హెచ్చరికలు చేసినప్పటికీ తెలంగాణ ప్రభుత్వం ఎలాంటి ముందస్తు చర్యలు తీసుకోలేదని తెలంగాణ రక్షణ సేన చీఫ్ కల్వకుంట్ల కవిత ఆరోపించారు. కోరుట్లలో నిర్వహించిన ‘పాంచజన్య సంకల్ప సభ’లో ఆమె మాట్లాడారు.
గోదావరి నదిపై 57 రిజర్వాయర్ల ద్వారా 418 టీఎంసీల నీటిని నిల్వ చేసుకునే అవకాశం ఉన్నప్పటికీ ప్రస్తుతం కేవలం 93 టీఎంసీలు మాత్రమే ఉన్నాయని కవిత తెలిపారు. రాష్ట్రంలో 40 శాతం లోటు వర్షపాతం నమోదైన పరిస్థితుల్లో సాగునీరు మాత్రమే కాకుండా తాగునీటి సమస్య కూడా తలెత్తే ప్రమాదం ఉందని అన్నారు.
మెట్‌పల్లి, కోరుట్ల ప్రాంతాల్లో సుమారు 2,500 ఎకరాల్లో పంటలు నష్టపోయే పరిస్థితి ఏర్పడిందని, కాళేశ్వరం ప్రాజెక్టులో ఏడో ప్యాకేజీ పూర్తి కాకపోవడం వల్ల ఇబ్రహీంపట్నం ప్రాంతంలో వేలాది ఎకరాలకు నష్టం కలిగే అవకాశం ఉందని ఆమె పేర్కొన్నారు.

కాళేశ్వరంపై బీఆర్ఎస్, కాంగ్రెస్ రాజకీయాలు
కాళేశ్వరం ప్రాజెక్టు విషయంలో బీఆర్ఎస్, కాంగ్రెస్ పార్టీలు రాజకీయాలు చేస్తున్నాయని కవిత ఆరోపించారు. మేడిగడ్డతో సంబంధం లేకుండా నీటిని ఎత్తిపోసుకునే అవకాశాలను వినియోగించుకోవడం లేదని అన్నారు. బ్యారేజీల కారణంగా భద్రాచలం మునిగిపోతుందని ప్రభుత్వం చెబుతున్న వాదనపై కూడా ఆమె ప్రశ్నలు లేవనెత్తారు.

ప్రభుత్వాన్ని ప్రశ్నించినప్పుడు సమాధానం ఇవ్వకుండా ఎగ్గొట్టడం, ఎదురుదాడి చేయడం విధానంగా మారిందని విమర్శించారు.
అవినీతిని ప్రశ్నించినందుకే బీఆర్ఎస్ నుంచి బయటకు పంపారు
బీఆర్ఎస్‌లో ఉన్న సమయంలో పార్టీ అంతర్గతంగా అవినీతి, బీసీల సమస్యలు, ఇతర అంశాలపై ప్రశ్నించానని కవిత తెలిపారు. కొన్ని అంశాలపై చర్యలు తీసుకున్నప్పటికీ, మరికొన్నింటిపై చర్యలు తీసుకోలేదన్నారు. తాను అవినీతిని ప్రశ్నించడం ప్రారంభించిన తర్వాత తనపై కుట్రలు జరిగాయని ఆరోపించారు.

20 ఏళ్ల పాటు పార్టీ కోసం పనిచేసిన తనను బయటకు పంపినా ప్రజా సేవ నుంచి వెనక్కి తగ్గలేదని చెప్పారు. తెలంగాణ ప్రజల కోసం తెలంగాణ రక్షణ సేనను ఏర్పాటు చేశానని తెలిపారు. తన కంఠంలో ప్రాణం ఉన్నంత వరకు బీఆర్ఎస్‌లోకి తిరిగి వెళ్లబోనని స్పష్టం చేశారు.

ఉచిత విద్య, వైద్యం అందిస్తాం
తెలంగాణ రక్షణ సేన ‘పాంచజన్య’ పేరుతో ఐదు ప్రధాన అంశాలను ముందుకు తీసుకెళ్తుందని కవిత తెలిపారు. అందులో ఉచిత విద్య, ఉచిత వైద్యం, యువతకు ఆర్థిక ప్రోత్సాహం, రైతు సంక్షేమం, సామాజిక న్యాయం ప్రధాన అంశాలని వివరించారు.
ప్రభుత్వ విద్యా వ్యవస్థ బలహీనంగా ఉండటంతో పేద కుటుంబాలు కూడా పిల్లలను ప్రైవేట్ పాఠశాలల్లో చదివించాల్సి వస్తోందని అన్నారు. తమ ప్రభుత్వం అధికారంలోకి వస్తే పిల్లలు ఏ పాఠశాలలో చదివినా విద్యా ఫీజుల భారాన్ని ప్రభుత్వం భరిస్తుందని హామీ ఇచ్చారు.

అదేవిధంగా ఎంత పెద్ద అనారోగ్యమైనా ఉచిత వైద్యం అందించే విధానాన్ని తీసుకొస్తామని తెలిపారు. అవినీతిని అరికడితే ప్రస్తుత బడ్జెట్‌లోనే ఉచిత విద్య, వైద్యం అందించవచ్చని అన్నారు.
యువతకు రూ.2 లక్షల నుంచి రూ.20 కోట్ల వరకు రుణాలు
యువతలో ప్రతిభ, ఆలోచనలకు ప్రోత్సాహం అవసరమని కవిత అన్నారు. ఎలాంటి గ్యారంటీ లేకుండా రూ.2 లక్షల నుంచి రూ.20 కోట్ల వరకు రుణాలు అందించి కొత్త సంస్థలను స్థాపించేలా యువతను ప్రోత్సహిస్తామని తెలిపారు. గూగుల్, అమెజాన్, మైక్రోసాఫ్ట్ వంటి సంస్థలు ఏర్పడటానికి ప్రభుత్వ ప్రోత్సాహం కూడా ఒక కారణమని పేర్కొన్నారు.

రైతులను రాజులుగా చేస్తాం
రైతులకు ఇచ్చిన హామీలను ప్రభుత్వం పూర్తిగా అమలు చేయడం లేదని కవిత విమర్శించారు. రుణమాఫీ విషయంలో కూడా అనేక మంది రైతులకు ఇంకా ప్రయోజనం అందలేదన్నారు.
రైతుల కోసం ప్రతి ప్రభుత్వ కార్యాలయంలో ప్రత్యేక కౌంటర్ ఏర్పాటు చేస్తామని తెలిపారు. ఎమ్మార్వో, ఆర్డీవో కార్యాలయాలతో పాటు పోలీస్ స్టేషన్లలో కూడా రైతులకు ప్రత్యేక సేవా కేంద్రాలు ఏర్పాటు చేస్తామని చెప్పారు.

బీసీ రిజర్వేషన్లపై ప్రభుత్వాన్ని ప్రశ్నించిన కవిత
బీసీలకు 50 శాతం రిజర్వేషన్ల కోసం పోరాడుతామని కవిత తెలిపారు. బీసీ రిజర్వేషన్ బిల్లును కేంద్రం ముందుకు తీసుకెళ్లేందుకు రాష్ట్ర ప్రభుత్వం చొరవ చూపడం లేదని ఆరోపించారు.
ఎస్సీ, ఎస్టీ, బీసీ వర్గాల కోసం కేటాయించిన నిధులు ఆయా వర్గాల సంక్షేమానికే ఖర్చు చేయాలని డిమాండ్ చేశారు. మైనారిటీలు, క్రైస్తవులు, ముస్లింల సామాజిక, ఆర్థిక, రాజకీయ సాధికారత కోసం కూడా పోరాడుతామని చెప్పారు.

ముత్యంపేట షుగర్ ఫ్యాక్టరీపై డాక్టర్ రఘు విమర్శలు
సభలో తెలంగాణ రక్షణ సేనలో చేరిన బీజేపీ సీనియర్ నేత డాక్టర్ రఘు మాట్లాడుతూ ముత్యంపేట షుగర్ ఫ్యాక్టరీ పునఃప్రారంభం కాకపోవడం వల్ల కోరుట్ల ప్రాంత రైతులు, యువత తీవ్రంగా నష్టపోయారని ఆరోపించారు.
ఫ్యాక్టరీ ప్రారంభమైతే సుమారు 4 వేల మందికి ప్రత్యక్షంగా ఉపాధి లభించేదని, ఉపాధి అవకాశాలు లేక ఈ ప్రాంతానికి చెందిన వేలాది మంది యువత గల్ఫ్ దేశాలకు వెళ్తున్నారని అన్నారు. బీడీ కార్మికుల కోసం హాస్పిటల్ ఏర్పాటు చేస్తామని ఇచ్చిన హామీ కూడా అమలు కాలేదని విమర్శించారు.

కోరుట్ల నియోజకవర్గంలో ఒకే కుటుంబం రాజకీయ ఆధిపత్యం కొనసాగుతోందని రఘు ఆరోపించారు. గతంలో కల్వకుంట్ల కవితకు మద్దతుగా పనిచేసిన వారే ఆమెను రాజకీయంగా దెబ్బతీయడానికి కుట్ర చేశారని అన్నారు.

తెలంగాణ రక్షణ సేన బలమైన రాజకీయ శక్తిగా ఎదుగుతుందని, ప్రజా సమస్యలపై కవిత నాయకత్వంలో పోరాటం కొనసాగుతుందని ఆయన తెలిపారు.

వచ్చే ఎన్నికల్లో బలమైన శక్తిగా తెలంగాణ రక్షణ సేన

సభ అనంతరం మీడియాతో మాట్లాడిన కవిత తెలంగాణ రక్షణ సేన వచ్చే ఎన్నికల్లో బలమైన శక్తిగా నిలుస్తుందని అన్నారు. సాగునీటి ప్రాజెక్టులు, నది జలాల విషయంలో ప్రభుత్వ నిర్లక్ష్యం తెలంగాణకు దురదృష్టకరమని విమర్శించారు.

కోరుట్ల బీజేపీ నాయకుడు డాక్టర్ రఘు తెలంగాణ రక్షణ సేనలో చేరిక
కోరుట్ల నియోజకవర్గానికి చెందిన బీజేపీ నాయకుడు, ప్రజా వైద్యుడు డాక్టర్ రఘు తెలంగాణ రక్షణ సేనలో చేరారు. ఈ సందర్భంగా తెలంగాణ రక్షణ సేన అధ్యక్షురాలు కల్వకుంట్ల కవిత ఆయనకు పార్టీ కండువా కప్పి పార్టీలోకి ఆహ్వానించారు.
కోరుట్లలో నిర్వహించిన పాంచజన్య సంకల్ప సభలో డాక్టర్ రఘు పార్టీ కండువా కప్పుకున్నారు. ఆయన చేరికతో కోరుట్ల నియోజకవర్గంలో తెలంగాణ రక్షణ సేనకు మరింత బలం చేకూరుతుందని పార్టీ నాయకులు తెలిపారు