కొండగట్టులో రాజకీయ ఉద్రిక్తత.. అర్చకుల ధర్నాతో స్థంభించిన దర్శనాలు

కొండగట్టు, జనవరి 23 (ప్రజా మంటలు):

ప్రసిద్ధ పుణ్యక్షేత్రమైన కొండగట్టు శ్రీ ఆంజనేయస్వామి ఆలయంలో శుక్రవారం రాజకీయ ఉద్రిక్తత చోటుచేసుకుంది. ఆలయ అర్చకులు విధులు బహిష్కరించి ధర్నాకు దిగడంతో భక్తుల దర్శన వ్యవస్థ తీవ్రంగా దెబ్బతింది. క్యూ లైన్లలో వేలాదిమంది భక్తులు నిలిచిపోగా, కొందరు భక్తులు అర్చకులు లేకుండానే స్వామి దర్శనం చేసుకుని వెనుదిరిగారు.

ఈ ఘటనకు నేపథ్యంగా, ఆంధ్రప్రదేశ్ మంత్రి నారా లోకేష్ జన్మదినం సందర్భంగా తెలంగాణ టీడీపీ రాష్ట్ర అధ్యక్షుడు పొగాకు జయరామ్ చందర్ కొండగట్టుకు వచ్చి అంజన్నను దర్శించుకుని ప్రత్యేక పూజలు నిర్వహించారు. ఈ సందర్భంగా ఆలయానికి పెద్ద సంఖ్యలో అనుచరులు రావడంతో పరిస్థితి ఉద్రిక్తంగా మారింది.

ఈఓ వ్యాఖ్యలపై అర్చకుల ఆగ్రహం

ఈ సమయంలో ఆలయ ఈఓ శ్రీకాంత్ రెడ్డి
“ఇంతమందిని లోపలికి ఎవరు అనుమతించారు? ప్రత్యేక పూజలు ఎందుకు చేశారు?” అంటూ అర్చకులపై నోటికి వచ్చినట్టు దూషించారని ఆరోపిస్తూ అర్చక బృందం తీవ్ర ఆగ్రహం వ్యక్తం చేసింది.
తమను అవమానకరంగా మాట్లాడటం, విధి నిర్వహణలో అడ్డంకులు సృష్టించడం సహించబోమని అర్చకులు స్పష్టం చేశారు.

విధుల బహిష్కరణ.. నిలిచిపోయిన దర్శనాలు

ఆలయ పరిపాలన తీరుపై నిరసనగా అర్చకులు విధులు బహిష్కరిస్తూ ధర్నాకు దిగడంతో దర్శనాలు పూర్తిగా నిలిచిపోయాయి. దీంతో ఆలయ పరిసరాల్లో ఉద్రిక్త వాతావరణం నెలకొంది. భక్తులు తీవ్ర అసౌకర్యానికి గురవడంతో వెంటనే సమస్యను పరిష్కరించాలని భక్తజనం, స్థానికులు దేవాదాయ శాఖ అధికారులను కోరారు.

ఎమ్మెల్యే చొరవతో పరిష్కారం

పరిస్థితిపై సమాచారం అందుకున్న అధికారులు అర్చకులతో చర్చలు జరిపే ప్రయత్నాలు ప్రారంభించారు. ఇదే సమయంలో సర్పంచ్ ఆదిరెడ్డి కలగజేసుకుని, స్థానిక ఎమ్మెల్యే ద్వారా అర్చకులతో మాట్లాడించగా ఎట్టకేలకు అర్చకులు తమ ఆందోళనను విరమించారు.

ఈ సందర్భంగా మల్యాల సీఐ నీలం రవి సంఘటనా స్థలానికి చేరుకుని అర్చకులతో, అధికారులతో మాట్లాడి పరిస్థితిని అదుపులోకి తీసుకువచ్చారు. అనంతరం ఆలయంలో దర్శనాలు క్రమంగా పునరుద్ధరించబడ్డాయి.

భక్తుల్లో ఆందోళన

పుణ్యక్షేత్రంలో రాజకీయాల వల్ల ఇటువంటి ఘటనలు పునరావృతం కాకుండా చర్యలు తీసుకోవాలని భక్తులు కోరుతున్నారు. ఆలయ గౌరవం, సంప్రదాయాలు కాపాడేలా దేవాదాయ శాఖ చర్యలు తీసుకోవాలని డిమాండ్ చేస్తున్నారు.