ఆంజనేయుని దయతోనే నాకు పునర్జన్మ – ఏపీ డిప్యూటీ సీఎం పవన్ కళ్యాణ్

కొండగట్టు, జనవరి 3 (ప్రజా మంటలు):

ఆంజనేయ స్వామి దయతోనే తనకు పునర్జన్మ లభించిందని ఏపీ ఉప ముఖ్యమంత్రి, జనసేన అధినేత పవన్ కళ్యాణ్ అన్నారు. శనివారం జగిత్యాల జిల్లాలోని ప్రముఖ పుణ్యక్షేత్రం కొండగట్టు ఆంజనేయ స్వామిని ఆయన దర్శించుకున్నారు.

ఈ సందర్భంగా కొండగట్టులో టిటిడి సహకారంతో నిర్మించనున్న వాయుపుత్ర సదన్ ధర్మశాల, దీక్ష విరమణ మండపం మరియు 96 గదుల వసతి సముదాయం నిర్మాణానికి పవన్ కళ్యాణ్ శంకుస్థాపన చేశారు. ఈ ప్రాజెక్టుకు రూ. 35.19 కోట్లను టిటిడి నిధుల నుంచి వెచ్చించనున్నారు. 

పవన్ కళ్యాణ్ హెలికాప్టర్ ద్వారా జేఎన్టీయూ హెలిప్యాడ్‌కు చేరుకోగా, రాష్ట్ర ఎస్సీ, ఎస్టీ, వయోవృద్ధులు, వికలాంగులు, ట్రాన్స్‌జెండర్ సంక్షేమ శాఖ మంత్రి అడ్లూరి లక్ష్మణ్ కుమార్, చొప్పదండి ఎమ్మెల్యే మేడిపల్లి సత్యం, ఎండోమెంట్స్ ప్రిన్సిపల్ సెక్రటరీ శైలజా రామయ్యర్, జిల్లా కలెక్టర్ బి. సత్యప్రసాద్, జిల్లా ఎస్పీ అశోక్ కుమార్ తదితరులు ఘన స్వాగతం పలికారు.

అనంతరం స్వామివారి ప్రత్యేక పూజల్లో పాల్గొన్న పవన్ కళ్యాణ్ మాట్లాడుతూ,

“ఆంజనేయ స్వామి మా ఇంటి ఇలవేల్పు. ఆయన కృప వల్లే నాకు పునర్జన్మ లభించింది. ఆలయ అధికారులు అభివృద్ధి అవసరాలను తెలియజేసిన వెంటనే సహకారం అందిస్తానని మాట ఇచ్చాను. నేడు అది కార్యరూపం దాల్చింది” అని పేర్కొన్నారు.

కొండగట్టు ఆంజనేయ స్వామి ఆశీస్సులతో రెండు తెలుగు రాష్ట్రాలు సుభిక్షంగా ఉండాలని ఆకాంక్షించారు. కొండగట్టు ఆలయ మాస్టర్ ప్లాన్ అమలుకు శ్రీకారం చుట్టిన తెలంగాణ ప్రభుత్వాన్ని ఆయన అభినందించారు. గిరి ప్రదక్షిణ మార్గం సుగమం చేయడానికి అవసరమైతే తానే కరసేవకుడిగా పనిచేస్తానని హామీ ఇచ్చారు.

కొండగట్టు ఆలయ అభివృద్ధికి నిధులు కేటాయించినందుకు ఏపీ ముఖ్యమంత్రి నారా చంద్రబాబు నాయుడు, టిటిడి అధికారులకు కృతజ్ఞతలు తెలిపారు. అలాగే ఆలయ అభివృద్ధికి కృషి చేస్తున్న తెలంగాణ ముఖ్యమంత్రి రేవంత్ రెడ్డికి ప్రత్యేక ధన్యవాదాలు తెలిపారు. ఘన స్వాగతం పలికిన మంత్రి అడ్లూరి లక్ష్మణ్ కుమార్, ఎమ్మెల్యే మేడిపల్లి సత్యం, జిల్లా కలెక్టర్ బి. సత్యప్రసాద్‌లకు కృతజ్ఞతలు తెలిపారు.

మంత్రి అడ్లూరి లక్ష్మణ్ కుమార్ వ్యాఖ్యలు

ఉత్తర తెలంగాణలో ప్రముఖ పుణ్యక్షేత్రమైన కొండగట్టు ఆంజనేయ స్వామి ఆలయానికి ఏపీ ఉప ముఖ్యమంత్రి రావడం, టిటిడి ద్వారా రూ.35.19 కోట్ల నిధులు సమకూర్చడం చారిత్రాత్మకమని అన్నారు. భవిష్యత్తులో తెలంగాణ ప్రభుత్వం కూడా నిధులు కేటాయించి కొండగట్టు ఆలయాన్ని తిరుమల తిరుపతి దేవస్థానం స్థాయిలో అభివృద్ధి చేస్తామని స్పష్టం చేశారు.

చొప్పదండి ఎమ్మెల్యే మేడిపల్లి సత్యం

ఏపీ డిప్యూటీ సీఎం సహకారంతో టిటిడి నిధులు అందడం వల్ల కొండగట్టు ఆలయ అభివృద్ధికి నూతన ఊపొస్తుందని పేర్కొన్నారు.

ఈ కార్యక్రమంలో పాల్గొన్నవారు ఏపీ శాసన మండలి విప్ పిడుగు హరిప్రసాద్, టిటిడి బోర్డు సభ్యులు బి. ఆనందసాయి, బి. మహేందర్ రెడ్డి, టిటిడి ఎల్‌ఏసీ చైర్మన్ ఎన్. శంకర్ గౌడ్, ఏపీ పోలీస్ హౌసింగ్ కార్పొరేషన్ చైర్మన్ కళ్యాణం శివ శ్రీనివాస్, జిల్లా అదనపు కలెక్టర్ బి. రాజా గౌడ్, ఆలయ ఈవో, జిల్లా అధికారులు, ఆలయ సిబ్బంది, పోలీసు సిబ్బంది, భక్తులు భారీ సంఖ్యలో పాల్గొన్నారు.