తెలంగాణ ఉద్యమకారుల భూమి హక్కుల కోసం భూపోరాటం చేస్తా – కల్వకుంట్ల కవిత

మానకొండూరులో ఉద్యమకారులతో కలిసి వంటా వార్పులో పాల్గొన్న కవిత 

మానకొండూరు/కరీంనగర్ 31 (ప్రజా మంటలు):

తెలంగాణ ఉద్యమకారులకు న్యాయం చేయాలని డిమాండ్ చేస్తూ తెలంగాణ జాగృతి ఆధ్వర్యంలో మానకొండూరులో భూపోరాటం నిర్వహించారు. ఈ కార్యక్రమంలో తెలంగాణ జాగృతి అధ్యక్షురాలు కల్వకుంట్ల కవిత పాల్గొని ఉద్యమకారులతో కలిసి వంటావార్పు నిర్వహించారు. ఈ సందర్భంగా గుడిసెలో పాలు పొంగించి, ఉద్యమకారుల ఇళ్ల నిర్మాణానికి భూమి పూజ చేశారు.

ఈ సందర్భంగా మీడియాతో మాట్లాడిన కల్వకుంట్ల కవిత, తెలంగాణ ఉద్యమంలో కీలక పాత్ర పోషించిన ఉద్యమకారులకు కాంగ్రెస్ ప్రభుత్వం ఇచ్చిన హామీలను అమలు చేయాలని డిమాండ్ చేశారు. ఉద్యమకారులకు 250 గజాల స్థలం, రూ.25 వేల పెన్షన్, గుర్తింపు కార్డులు, ప్రత్యేక సంక్షేమ బోర్డు ఏర్పాటు చేస్తామని ఇచ్చిన హామీలను వెంటనే నెరవేర్చాలని ఆమె స్పష్టం చేశారు.

తెలంగాణ వ్యాప్తంగా ఉద్యమకారులు వివిధ ఫోరమ్‌ల ద్వారా పోరాటాలు ప్రారంభించారని, వారికి తెలంగాణ జాగృతి పూర్తిస్థాయిలో మద్దతుగా నిలుస్తుందని తెలిపారు. మానకొండూరులో గతంలో జర్నలిస్టులకు 2012లో భూములు కేటాయించి తరువాత ప్రభుత్వం వెనక్కి తీసుకున్న విషయాన్ని గుర్తు చేస్తూ, ఇదే పరిస్థితి గద్వాల్, నిజామాబాద్ వంటి అనేక ప్రాంతాల్లోనూ ఎదురైందన్నారు.

ఆంధ్రా పాలన కాలంలో ఉద్యమానికి అనుకూలంగా వార్తలు ప్రసారం చేస్తూ ఉద్యమాన్ని ప్రజల్లోకి తీసుకెళ్లిన జర్నలిస్టులకు కూడా తప్పనిసరిగా భూములు కేటాయించాలని ఆమె డిమాండ్ చేశారు. తెలంగాణ సాధన కోసం పోరాడిన ప్రతి ఒక్కరికీ భూమిపై హక్కు ఉండాలని, ఆ హక్కు కోసం తెలంగాణ జాగృతి చివరి వరకు పోరాటం చేస్తుందని కవిత స్పష్టం చేశారు.

ప్రతి జిల్లాలో ఇదే తరహా భూపోరాటాలు కొనసాగిస్తామని, ఉద్యమకారుల న్యాయమైన హక్కుల సాధనకు అండగా నిలుస్తామని ఆమె పేర్కొన్నారు.