పవిత్ర హత్య కేసులో నిందితుడు ఉమాశంకర్ అరెస్ట్

సికింద్రాబాద్, డిసెంబర్ 10 (ప్రజామంటలు) :

వారాసిగూడ పోలీస్ స్టేషన్ పరిధిలోని బాపూజీనగర్‌లో 18ఏళ్ల యువతి పవిత్రపై జరిగిన క్రూరహత్య కేసులో నిందితుడు దుక్కా ఉమాశంకర్‌ను వారాసిగూడా పోలీసులు అరెస్టు చేశారు. ఈస్ట్ జోన్ డీసీపీ బాలస్వామి బుధవారం వారాసిగూడ పోలీస్ స్టేషన్ లో నిర్వహించిన మీడియా సమావేశంలో వివరాలు వెల్లడించారు.  

డిసెంబర్ 8న జరిగిన ఈ ఘటనలో ముద్దాయిని ట్రేస్ చేసేందుకు పోలీసులు సీసీటీవీ ఫుటేజీలను పరిశీలించి, రెండు రోజుల పాటు సమాచార సేకరణ చేసి చివరకు చిలకలగూడలో అతడిని పట్టుకున్నారు. పవిత్ర కుటుంబం  పది ఏండ్ల క్రితం శ్రీకాకుళం జిల్లా నుంచి జీవనోపాధి కోసం హైదరాబాద్‌కు చేరుకుంది. జడగ లక్ష్మీ, కాంతారావు దంపతుల ఇద్దరు కుమార్తెలలో పెద్దదైన పవిత్రను పెళ్లి చేసుకోవాలని ఒక సంవత్సరం క్రితం ఉమాశంకర్ ప్రతిపాదించగా పెద్దల సమక్షంలో అంగీకరించారు. అయితే గత కొన్ని నెలలుగా నిందితుడు మద్యం మత్తులో ఫోన్ చేసి వేధిస్తున్నాడని పవిత్ర తన తల్లిదండ్రులకు తెలిపింది.

దాంతో ఉమాశంకర్ తో తమ కుమార్తె వివాహం నిర్ణయాన్ని రద్దు చేసుకున్నారు.డిసెంబర్ 6న కుటుంబం మొత్తం మొక్కు తీర్చుకునేందుకు విజయవాడ కనకదుర్గమ్మ ఆలయానికి వెళ్లి 7వ తేదీ రాత్రి తిరిగి వచ్చింది. 8వ తేదీ మధ్యాహ్నం ఉమాశంకర్ వారి ఇంటికి వచ్చి, తన అనుమతి లేకుండా పవిత్రను విజయవాడకు ఎందుకు తీసుకెళ్లారని కుటుంబంతో వాగ్వాదం ప్రారంభించాడు. ఈ సందర్భంగా పవిత్ర అతడిని   తిరస్కరించడంతో ఆగ్రహించిన ఉమాశంకర్ వెంట తెచ్చుకున్న కత్తితో ఆమె గొంతులో కత్తి దించి, అక్కడికక్కడే చంపి పారిపోయాడు.

ఈ ఘటన మధ్యాహ్నం 1.30 గంటల సమయంలో చోటుచేసుకుంది.దర్యాప్తు లో పోలీస్ అధికారులు నిందితుడి కదలికలను సీసీటీవీ దృశ్యాల ఆధారంగా గుర్తించి, డిసెంబర్ 10 ఉదయం చిలకలగూడ  స్కందగిరి ప్రాంతంలో అతడిని అదుపులోకి తీసుకున్నారు. విచారణలో నిందితుడు నేరాన్ని ఒప్పుకున్నాడు. పంచుల సమక్షంలో రూ.1.10 లక్షల నగదు, రియల్‌మీ ఫోన్, వాలెట్‌తో పాటు ఆధార్, పాన్, బ్యాంక్ కార్డులు, మృతురాలి సెంట్రల్ బ్యాంక్ రూపే కార్డు స్వాధీనం చేశారు. నిందితుడు దుక్కా ఉమాశంకర్ (24), యూసుఫ్‌గూడ రెహమత్‌నగర్‌లో నివసిస్తూ, టైల్‌వర్క్ చేస్తూ ఉంటాడని, స్వగ్రామం శ్రీకాకుళం జిల్లాలోని మిర్యాపుట్టి మండలం సిరియకండి గ్రామం అని పోలీసులు తెలిపారు.

ఈ కేసు చేధనలో ఇన్‌స్పెక్టర్ ఏ. మధుసూదన్ రెడ్డి, డిటెక్టివ్ ఇన్‌స్పెక్టర్ పురేందర్ రెడ్డి, లాలాగూడ డీఐ రామకృష్ణ, వారాసిగూడ సిబ్బంది గాలెబ్, వేణు, దేవేందర్, రామకృష్ణ, దస్తగిరి, అలాగే చిలకలగూడ క్రైమ్ టీమ్ సభ్యులు జగదీశ్, గణేష్ కీలకపాత్ర పోషించారు. ఈస్ట్‌ జోన్ డీసీపీ బి. బాలస్వామి, అదనపు డీసీపీ జె. నర్సయ్య పర్యవేక్షణలో, ఏసీపీ శశాంక్ రెడ్డి మార్గదర్శకత్వంలో పనిచేసిన సిబ్బందికి తగు ప్రోత్సాహక బహుమతులు అందించనున్నట్లు తెలిపారు.
–