పోష్ యాక్ట్–2013పై అవగాహన ర్యాలీ

సికింద్రాబాద్, డిసెంబర్ 09 (ప్రజామంటలు) :

పని ప్రదేశాల్లో మహిళలపై లైంగిక వేధింపుల నివారణకు కఠినంగా అమలు అవుతున్న పోష్ యాక్ట్–2013 గురించి అవగాహన కల్పించేందుకు మహిళా శిశు సంక్షేమ శాఖ హైదరాబాద్ జిల్లా కమిటీ, యాక్షన్ ఎయిడ్, భరోసా సంయుక్తంగా మంగళవారం అవగాహన ర్యాలీ నిర్వహించింది. న్యూ బోయిగూడ నుంచి గాంధీ ఆస్పత్రి ఎదురుగా ఉన్న మహాత్మా గాంధీ విగ్రహం వరకు ర్యాలీ సాగింది. ర్యాలీని మహిళా శిశు సంక్షేమ శాఖ సికింద్రాబాద్ ప్రాజెక్టు సిడిపిఓ డాక్టర్ స్వప్న ప్రారంభించారు.ఈ సందర్భంగా ఆమె మాట్లాడుతూ ….కుటుంబాభివృద్ధికి ముందడుగు వేసిన మహిళలు పని ప్రదేశాల్లో లైంగిక, మానసిక వేధింపులకు గురవుతున్న ఘటనలు పెరుగుతున్నాయని ఆందోళన వ్యక్తం చేశారు. ఇలాంటి బాధితులకు పోష్ చట్టం రక్షణగా నిలుస్తుందన్నారు. నిందితులకు తీవ్ర శిక్షలు తప్పవని, ప్రతి సంస్థ మహిళలకు రక్షణ కల్పించే బాధ్యత వహించాలని సూచించారు. హైకోర్టు న్యాయవాది, హైదరాబాద్ జిల్లా కమిటీ సభ్యురాలు టీ.సుభాషిణి మాట్లాడుతూ ..ప్రతి కంపెనీ, ఇండస్ట్రీ, ఆర్గనైజ్డ్–అనార్గనైజ్డ్ సెక్టార్లలో పదికి పైగా మహిళలు పనిచేస్తే ఐసీసీ ఏర్పాటు చేయడం తప్పనిసరి అని గుర్తుచేశారు. ఐసీసీ లేకపోతే రూ.50 వేల వరకు జరిమానా విధించే అవకాశం ఉందని తెలిపారు. పోష్ యాక్ట్‌పై సంస్థలు విస్తృత ప్రచారం చేయాలని, కార్యాలయాల్లో బోర్డులు ఏర్పాటు చేయాలని సూచించారు. కార్యక్రమంలో జిల్లా లోకల్ కమిటీ సభ్యులు వందన పాల్, శైలజ, దీపికతో పాటు భరోసా, యాక్షన్ ఎయిడ్ ప్రతినిధులు, అంగన్‌వాడీ టీచర్లు, మహిళలు పాల్గొన్నారు.
––