మేడ్చల్–మల్కాజ్‌గిరి సమస్యలు భయంకర స్థాయిలో ఉన్నాయి: కవిత

ఇది తెలంగాణ రైజింగ్ కాదు, Telangana Sinking,”

తెలంగాణ జాగృతి జనంబాట – కూకట్‌పల్లి ప్రెస్ మీట్

కూకట్ పల్లి డిసెంబర్ 08 (ప్రజా మంటలు):

మేడ్చల్–మల్కాజ్‌గిరి పర్యటనలో ప్రజల సమస్యలను స్వయంగా చూశానని, పరిస్థితులు ఊహించని స్థాయిలో దారుణంగా ఉన్నాయని జాగృతి నాయకురాలు కవిత తెలిపారు. ఉప్పల్, మల్కాజ్‌గిరి, కుత్బుల్లాపూర్, మేడ్చల్, కూకట్‌పల్లిలో జరిగిన పర్యటన తర్వాత ఆమె మీడియాతో మాట్లాడారు.

కవిత మాట్లాడుతూ,ఈ జిల్లాలో 32 లక్షల జనాభా ఉన్నప్పటికీ ఒక్క 100 పడకల గవర్నమెంట్ హాస్పిటల్ కూడా లేకపోవడం ప్రభుత్వం వైఫల్యానికి నిదర్శనమన్నారు. హెల్త్, ఎడ్యుకేషన్ పూర్తిగా ప్రైవేట్ వారి చేతుల్లోకి వెళ్లిపోవడంతో పేదలు తీవ్రమైన ఇబ్బందులు పడుతున్నారని పేర్కొన్నారు.

ఉప్పల్ ఫ్లైఓవర్, నెరేడ్మెట్ రైల్వే ఫ్లైఓవర్, బచుపల్లి ఫ్లైఓవర్ వంటి కీలక పనులు ఏళ్లుగా నిలిచిపోయాయని ఆమె విమర్శించారు. రోడ్లు, బస్సుల సేవలు, డ్రైనేజీ, వాటర్ సప్లై – అన్ని రంగాల్లో పరిస్థితి దారుణంగా ఉందని తెలిపారు.

జవహర్‌నగర్‌ డంపింగ్ యార్డ్ వల్ల ప్రజలు తీవ్రంగా నష్టపడుతున్నారని, దాన్ని వేరే ప్రాంతానికి మార్చాలని డిమాండ్ చేశారు.

చెరువుల కబ్జాలపై కవిత తీవ్ర విమర్శలు చేశారు.
కుత్బుల్లాపూర్‌ను ప్రజలే ‘కబ్జాలపూర్’ అని పిలుస్తున్నారంటే పరిస్థితి ఎంత దారుణంగా ఉందో అర్థమవుతుందని పేర్కొన్నారు. మల్లారెడ్డి హాస్పిటల్ వ్యర్థాలు లింగం చెరువులో పడుతున్నాయని, అనేక చెరువులు పూర్తిగా రియల్ ఎస్టేట్ ఆక్రమణకు గురయ్యాయని అన్నారు.

రేవంత్ రెడ్డి గతంలో మల్కాజ్‌గిరి ఎంపీగా ఉన్నప్పుడు ఈ సమస్యలు తెలుసని, ఇప్పుడు సీఎం అయిన తర్వాత కూడా పరిష్కారం లేని పరిస్థితి సిగ్గుచేటు అన్నారు. “ఇలా కొనసాగితే చరిత్ర క్షమించదు” అని హెచ్చరించారు.

అసిస్టెంట్ పబ్లిక్ ప్రాసిక్యూటర్ పరీక్షను సర్పంచ్‌ ఎన్నికల రోజు పెట్టడం తప్పని, వేలాది మంది అభ్యర్థుల భవిష్యత్ కు తీవ్ర నష్టం కలిగే అవకాశం ఉందని పేర్కొన్నారు.

బీసీల విషయానికొస్తే, రిజర్వేషన్లు ఇవ్వకుండా స్థానిక సంస్థల ఎన్నికలకు వెళ్లడం కాంగ్రెస్ పెద్ద మోసం అని కవిత లెక్కపెట్టారు. బిల్లులను పాస్ చేయకుండా అడ్డుకున్న బీజేపీ మొదటి ద్రోహి, రిజర్వేషన్లు ఇవ్వని కాంగ్రెస్ రెండో ద్రోహి అన్నారు.

“మేడ్చల్ అసలు అభివృద్ధి చెందలేదు. పాత ప్రభుత్వం చెరువులు, భూముల కబ్జాలతో ఉంటే…ఈ ప్రభుత్వం మాత్రం కనీస మౌలిక వసతులైనా అందించలేకపోయింది. ఉన్న హాస్పిటల్‌లో సూది ఉంటే దూది లేదు…ఇది తెలంగాణ రైజింగ్ కాదు, Telangana Sinking,” అని కవిత ఘాటుగా వ్యాఖ్యానించారు.

జాగృతి ప్రజల సమస్యల కోసం నిరంతరం పోరాడుతుందని, ప్రతి నియోజకవర్గంలో కమిటీలు ఏర్పాటు చేసి ఫాలోఅప్ చేస్తామని హామీ ఇచ్చారు.