కాంగ్రెస్ పాలనకు జూబ్లీహిల్స్ ఉప ఎన్నిక ఫలితమే నిదర్శనం

సికింద్రాబాద్, నవంబర్ 14 ( ప్రజామంటలు) :

జూబ్లీహిల్స్ ఉప ఎన్నికలో కాంగ్రెస్ అభ్యర్థి నవీన్ యాదవ్ విజయం సాధించడం రాష్ట్రంలో కాంగ్రెస్ ప్రభుత్వంపై ప్రజల నమ్మకానికి ప్రతీక అని టీపీసీసీ వైస్ ప్రెసిడెంట్, సనత్ నగర్ నియోజకవర్గ ఇంచార్జి డాక్టర్ కోట నీలిమ అన్నారు. సనత్‌నగర్‌లో జరిగిన విజయోత్సవ కార్యక్రమంలో పాల్గొని మాట్లాడిన ఆమె, ముఖ్యమంత్రి రేవంత్ రెడ్డి చేపడుతున్న అభివృద్ధి, సంక్షేమ కార్యక్రమాలు ఫలితాలిస్తున్నాయనే దానికి ఈ విజయం నిదర్శనమని పేర్కొన్నారు.

ఆర్థిక ఇబ్బందులు ఉన్నప్పటికీ ప్రభుత్వం అందిస్తున్న సన్న బియ్యం, కొత్త రేషన్ కార్డులు, 200 యూనిట్ల ఉచిత విద్యుత్, మహిళలకు వడ్డీరహిత రుణాలు, ఆర్టీసీ బస్సుల్లో ఉచిత ప్రయాణం, ఇందిరమ్మ ఇళ్లు, ఉద్యోగ నియామకాలు వంటి పథకాలకు ప్రజల నుంచి విశేష స్పందన లభిస్తోందన్నారు.

రైతాంగానికి తీసుకున్న నిర్ణయాలు గ్రామీణ ప్రాంతాల్లో మంచి ఫలితాలు ఇస్తున్నాయని వెల్లడించారు. బీఆర్ఎస్ దశాబ్ద కాలం ఏమీ చేయలేదని, తప్పుడు ప్రచారంతో ప్రజలను మభ్యపెట్టే ప్రయత్నం విఫలమైందని నీలిమ విమర్శించారు. కాంగ్రెస్ అభ్యర్థి స్థానిక బీసీ నాయకుడు కావడం, అందరికీ అందుబాటులో ఉండే వ్యక్తిత్వం కూడా విజయంలో కీలకమైందని తెలిపారు. బీఆర్ఎస్ రగిలించిన సెంటిమెంట్‌ కూడా ప్రజలను ప్రభావితం చేయలేదని వ్యాఖ్యానించారు. కేటీఆర్ చేసిన బుల్డోజర్ ప్రచారం నమ్మకపోవడంతో ప్రజలు నవీన్ యాదవ్‌కే అధికారం అప్పగించారని అన్నారు.

మతం పేరుతో ప్రజలను విడదీసే బీజేపీకి డిపాజిట్ కూడా రాలేదని, వారి ఆటలు తెలంగాణలో సాగవని అన్నారు. సీఎం రేవంత్ రెడ్డి నాయకత్వం, కాంగ్రెస్ ప్రభుత్వ పనితీరుకు ఈ విజయమే ప్రతిఫలమని నీలిమ పేర్కొన్నారు. కార్యక్రమంలో కాంగ్రెస్ శ్రేణులు టపాకాయలు పేల్చి, మిఠాయిలు పంచిపెట్టి  సంబరాలు జరుపుకున్నారు.
––