ముగ్గురు అక్కాచెల్లెళ్లు మృతి – తండ్రి బస్టాప్ వద్ద దింపిన గంటలోనే దుర్ఘటన

(పెద్ద కూతురు పెళ్లి సందర్భంలో తీసిన ఫోటో)

తండ్రి దింపిన గంటలోనే ముగ్గురు కుమార్తెల మృతి

రంగారెడ్డి, నవంబర్‌ 03 (ప్రజా మంటలు):
రంగారెడ్డి జిల్లా చేవెళ్ల మండలం మీర్జాగూడ వద్ద ఈరోజు ఉదయం జరిగిన ఘోర రోడ్డు ప్రమాదం దేశాన్ని షాక్‌కు గురి చేసింది. బీజాపూర్‌–హైదరాబాద్‌ జాతీయ రహదారిపై దూసుకెళ్లిన టిప్పర్ లారీ, ప్రయాణికులతో నిండిన బస్సును ఢీకొట్టడంతో భారీ ప్రాణనష్టం జరిగింది. ఈ ఘటనలో 19 మంది మృతి చెందగా, 20 మందికి పైగా గాయపడ్డారు. గాయపడినవారిని సమీప ఆసుపత్రులకు తరలించి, చికిత్స అందిస్తున్నారు.

తండ్రి దింపిన గంటలోనే ముగ్గురు కుమార్తెల మృతి

ఈ ప్రమాదంలో ఒకే కుటుంబానికి చెందిన ముగ్గురు అక్కాచెల్లెళ్లు స్పాట్‌లోనే మృతి చెందారు.
ఈరోజు (సోమవారం) ఉదయం తండ్రి స్వయంగా బస్టాప్‌ వద్ద దింపిన ముగ్గురు కుమార్తెలు సాయిప్రియ, తనుషా, నందినిగా గుర్తించారు. తండ్రి వారికి చిరునవ్వుతో “జాగ్రత్తగా వెళ్ళండి” అని చెప్పి వెళ్ళాడు. అయితే ఆ చిరునవ్వే చివరిది అయ్యింది. బస్సు ఎక్కి ప్రయాణం ప్రారంభించిన గంటలోపే వారు ప్రాణాలు కోల్పోయారు.

బీటెక్‌ చదువుతున్న ముగ్గురు సోదరీమణులు

మృతుల్లో సాయిప్రియ, తనుషా, నందిని – ముగ్గురూ హైదరాబాద్‌లోని ఒక ఇంజనీరింగ్‌ కాలేజీలో బీటెక్‌ చదువుతున్నారు. ఒకరు మొదటి సంవత్సరం, మరొకరు రెండో సంవత్సరం, ఇంకొకరు మూడో సంవత్సరం విద్యార్థినులు. వీరి తండ్రి వృత్తిరీత్యా డ్రైవర్‌. ఇటీవలే పెద్ద కుమార్తె వివాహం జరిపించి ఆనందంలో మునిగిపోయిన కుటుంబం క్షణాల్లో చిగురుటాకులా ఛిన్నాభిన్నమైంది.

తల్లిదండ్రుల ఆర్తనాదం

ప్రమాద వార్త తెలిసి సంఘటనా స్థలానికి చేరుకున్న తల్లిదండ్రులు తమ పిల్లల మృతదేహాలను చూసి ఆవేదనతో విలపించారు. “మా పిల్లల్ని మాకు తిరిగి ఇప్పించండి” అంటూ తండ్రి రోదించడం చూసిన, ప్రతి ఒక్కరి కళ్లలో నీరు తెప్పించింది. సంఘటనా స్థలంలో హృదయ విదారక దృశ్యాలు నెలకొన్నాయి.

తెలంగాణ ముఖ్యమంత్రి ఏ. రేవంత్ రెడ్డి ఘటనపై దిగ్భ్రాంతి వ్యక్తం చేశారు. బాధిత కుటుంబాలకు ఆర్థిక సాయం అందించనున్నట్లు ప్రకటించారు. రవాణాశాఖ అధికారులను రహదారులపై అతివేగ వాహనాలపై కఠిన చర్యలు తీసుకోవాలని ఆదేశించారు.

📄