పత్తి కొనుగోలులో తేమ ప్రమాణాలు సడలించాలి: కేంద్ర మంత్రికి కల్వకుంట్ల కవిత లేఖ

- మోంథా తుఫాన్ ప్రభావంతో పత్తిలో తేమ శాతం 25% వరకు పెరుగుదల
- సీసీఐ కొనుగోళ్లు జరగక రైతులు ఇబ్బందులు
- 25% వరకు తేమ ఉన్న పత్తికి మద్దతు ధర ఇవ్వాలని కవిత డిమాండ్
- కేంద్ర టెక్స్టైల్ మంత్రి గిరిరాజ్ సింగ్‌ కు లేఖ రాసిన కవిత
- తెలంగాణ పత్తి రైతులకు ఉపశమనం కలిగించాలని విజ్ఞప్తి

హైదరాబాద్‌, నవంబర్‌ 03 (ప్రజా మంటలు):

మోంథా తుఫాన్ కారణంగా తెలంగాణ రాష్ట్రంలో పత్తి రైతులు తీవ్ర నష్టాన్ని ఎదుర్కొంటున్నారని ఆందోళన వ్యక్తం చేస్తూ, పత్తి కొనుగోలు ప్రమాణాల్లో సడలింపు ఇవ్వాలని కేంద్ర టెక్స్టైల్‌ మంత్రివర్యులు గిరిరాజ్ సింగ్ గారికి తెలంగాణ జాగృతి అధ్యక్షురాలు, మాజీ ఎంపీ కల్వకుంట్ల కవిత లేఖ రాశారు.

కవిత లేఖలో  —మోంథా తుఫాన్ వల్ల భారీ వర్షాలు, వరదలు సంభవించి పత్తి పంటలలో తేమ శాతం 20%–25% వరకు పెరిగిందని, ఈ కారణంగా సీసీఐ (CCI) ప్రస్తుత నియమాల ప్రకారం పత్తిని కొనుగోలు చేయడం జరగడం లేదని వివరించారు. ప్రస్తుతం అమల్లో ఉన్న 8%–12% తేమ ప్రమాణాల్లో సడలింపు ఇవ్వకపోతే రైతులు పూర్తిగా నష్టపోతారని ఆందోళన వ్యక్తం చేశారు.

“25% వరకు తేమ ఉన్న పత్తిని కూడా మద్దతు ధరకు కొనుగోలు చేయాలి”

ఈ పరిస్థితుల్లో ప్రభుత్వం తక్షణ నిర్ణయం తీసుకుని 25% వరకు తేమ ఉన్న పత్తిని కూడా మద్దతు ధరకు కొనుగోలు చేయడానికి అనుమతించాలి అని కవిత విజ్ఞప్తి చేశారు. “ఇది రైతుల ఆర్థిక నష్టాన్ని తగ్గించడమే కాకుండా, పత్తి సరఫరా వ్యవస్థ నిలకడగా కొనసాగడానికీ సహాయపడుతుంది” అని పేర్కొన్నారు. గతంలో ఇతర రాష్ట్రాల్లో సహజ విపత్తుల సందర్భాల్లో ఇలాంటి సడలింపులు మంజూరు చేయబడ్డాయని గుర్తు చేశారు.

రైతుల ఆర్థిక పరిస్థితి క్షీణిస్తోంది

సీసీఐ ఇప్పటివరకు కొనుగోళ్లు ప్రారంభించకపోవడం, పత్తి తేమ కారణంగా రైతులు మార్కెట్లో తక్కువ ధరలకు అమ్మకానికి దిగడం వల్ల వారు పూర్తిగా నష్టపోతున్నారని కవిత తన లేఖలో స్పష్టం చేశారు. ప్రభుత్వం తక్షణ చర్య తీసుకోవాలని కేంద్ర మంత్రిని కోరారు.