కెనడా, ఫ్రాన్స్ ప్రతినిధి బృందాలతో సీఎం రేవంత్ రెడ్డి భేటీ

హైదరాబాద్, నవంబర్ 1 (ప్రజా మంటలు):

తెలంగాణ ముఖ్యమంత్రి ఎ. రేవంత్ రెడ్డిని వరుసగా కెనడా మరియు ఫ్రాన్స్ దేశాల ప్రతినిధి బృందాలు మర్యాదపూర్వకంగా కలిశాయి. రాష్ట్రాభివృద్ధి, పెట్టుబడులు, సాంకేతిక సహకారంపై ఈ భేటీలు సాగాయి.

🔹 కెనడా ప్రతినిధి బృందం భేటీ:

కెనడా హైకమిషనర్  క్రిస్టోఫర్ కూటర్  నేతృత్వంలోని ప్రతినిధి బృందం ముఖ్యమంత్రిని జూబ్లీహిల్స్ నివాసంలో కలిసింది. ఇన్ఫర్మేషన్ టెక్నాలజీ, ఫార్మాస్యూటికల్స్, ఏరోస్పేస్, రక్షణ, పట్టణ మౌలిక సదుపాయాల వంటి రంగాల్లో కెనడా భాగస్వామ్యాన్ని విస్తరించే అంశాలపై చర్చించారు.

ముఖ్యమంత్రి రేవంత్ రెడ్డి తెలంగాణలో పెట్టుబడులకు అనుకూల వాతావరణం ఉందని వివరించి, కెనడా వ్యాపారవేత్తలు రాష్ట్రంలో పెట్టుబడులు పెట్టాలని ఆహ్వానించారు. పారిశ్రామిక రంగాలతో పాటు స్టార్టప్‌లు, విద్యా, అధునాతన టెక్నాలజీ రంగాల్లో పెట్టుబడులు పెట్టాలని సూచించారు.

ఈ సమావేశంలో కెనడా మంత్రి ఎడ్ జాగర్, ట్రేడ్ కమిషనర్ శ్రీ విక్రమ్ జైన్, కూటర్ సతీమణి శ్రీమతి కరెన్, రాష్ట్ర ఉన్నతాధికారులు పాల్గొన్నారు.

🔹 ఫ్రాన్స్ ప్రతినిధి బృందం భేటీ:

ముఖ్యమంత్రిని ఫ్రాన్స్ కాన్సుల్ జనరల్ శ్రీ మార్క్ లామీ నేతృత్వంలోని బృందం మర్యాదపూర్వకంగా కలిసింది. హైదరాబాద్‌లో ఫ్రెంచ్ సంస్థల సహకారంతో కొనసాగుతున్న ప్రాజెక్టులు, పెట్టుబడి అవకాశాలపై చర్చ జరిగింది.

ముఖ్యమంత్రి తెలంగాణలో ఫ్రెంచ్ పెట్టుబడులను విస్తరించాలని సూచించారు. హైదరాబాద్‌లో ఫ్రెంచ్ బ్యూరో కార్యాలయాన్ని బలోపేతం చేయడం ద్వారా ఇరుపక్షాల మధ్య మరింత సన్నిహిత సహకారం కొనసాగుతుందని పేర్కొన్నారు.

సమావేశంలో అలయన్స్ ఫ్రాన్స్ హైదరాబాద్ డైరెక్టర్ శ్రీమతి మౌద్ మిక్వా, ఫ్రెంచ్ బ్యూరో అసిస్టెంట్ శ్రీమతి రోహిణి రెడ్డిపల్లి, ప్రభుత్వ ఉన్నతాధికారులు పాల్గొన్నారు.