లోక్ భవన్‌లో గవర్నర్‌ను కలిసిన కల్వకుంట్ల కవిత – భూ బాధితులకు న్యాయం చేయాలని విజ్ఞప్తి

హైదరాబాద్, మే 26 (ప్రజా మంటలు):

తెలంగాణ రక్షణ సేన చీఫ్ కల్వకుంట్ల కవిత మంగళవారం హైదరాబాద్‌లోని లోక్ భవన్లో తెలంగాణ గవర్నర్ శివప్రతాప్ శుక్లాను కలిసి వెలుగుమట్ల ఇళ్ల కూల్చివేత బాధితులు, ట్రిపుల్ ఆర్ భూ నిర్వాసితులు, పరిగి మండలం కడ్లాపూర్ ఇండస్ట్రియల్ పార్క్ ప్రభావితుల సమస్యలపై వినతిపత్రం సమర్పించారు.
ఈ సమావేశంలో ధర్మ సమాజ్ పార్టీ అధ్యక్షుడు విశారదన్ మహారాజ్‌తో పాటు వివిధ ప్రాంతాల బాధితులు కూడా పాల్గొన్నారు. వెలుగుమట్లలో ఇళ్ల కూల్చివేత, ట్రిపుల్ ఆర్ అలైన్‌మెంట్ మార్పులు, రాయగిరి భూసేకరణ, కడ్లాపూర్ ఇండస్ట్రియల్ పార్క్ కోసం జరుగుతున్న భూసేకరణ అంశాలను గవర్నర్ దృష్టికి తీసుకెళ్లినట్లు తెలిపారు.
సమావేశం అనంతరం మీడియాతో మాట్లాడిన కవిత, రాష్ట్ర ప్రభుత్వం వ్యవహార శైలిపై తీవ్ర విమర్శలు చేశారు. భూ నిర్వాసితులకు న్యాయం చేయాలని, రైతుల సమస్యలను ప్రభుత్వం అత్యవసరంగా పరిష్కరించాలని డిమాండ్ చేశారు. ప్రభుత్వం ఇప్పటివరకు తీసుకున్న చర్యలు పాక్షిక విజయాలే అయినప్పటికీ పూర్తి స్థాయి పరిష్కారం కోసం కేంద్ర స్థాయి జోక్యం అవసరమని పేర్కొన్నారు.
గవర్నర్ తమ వినతిని సానుకూలంగా స్వీకరించారని, సంబంధిత అంశాలపై ప్రభుత్వ నివేదిక తెప్పించి న్యాయం చేసే ప్రయత్నం చేస్తానని హామీ ఇచ్చినట్లు కవిత తెలిపారు. ట్రిపుల్ ఆర్‌కు సంబంధించి పలుమార్లు అలైన్‌మెంట్ మార్పు జరిగిన విషయాన్ని కూడా ఆయన దృష్టికి తీసుకెళ్లినట్లు చెప్పారు.
అలాగే రైతుల ధాన్యం కొనుగోళ్లలో జాప్యం జరుగుతోందని ఆరోపిస్తూ, రాష్ట్రంలోని పలు జిల్లాల్లో రైతులు ఇబ్బందులు ఎదుర్కొంటున్నారని అన్నారు. రైతుల ధాన్యాన్ని వెంటనే కొనుగోలు చేసి వారికి ఉపశమనం కల్పించాలని ప్రభుత్వాన్ని కోరారు.
అదేవిధంగా, బాధితులకు న్యాయం జరగకపోతే భవిష్యత్తులో ఉమ్మడి కార్యాచరణతో ఉద్యమాలు చేపడతామని హెచ్చరించారు.