బ్రాహ్మణ సంక్షేమ పరిషత్ పథకాలను బ్రాహ్మణులు సద్వినియోగపరచుకోవాలి రాష్ట్ర ఐటీ శాఖ మంత్రి శ్రీధర్ బాబు దేవాదాయ శాఖ మంత్రి కొండా సురేఖ

బండ్లగూడ, నాగోల్ మే 14(ప్రజా మంటలు)
తెలంగాణ రాష్ట్ర బ్రాహ్మణ సంక్షేమ పరిషత్ పథకాలను బ్రాహ్మణ సద్వినియోగపరచుకోవాలని రాష్ట్ర ఐటీ శాఖ మంత్రి శ్రీధర్ బాబు, దేవదాయ శాఖ మంత్రి కొండా సురేఖ అన్నారు.

తెలంగాణ రాష్ట్ర బ్రాహ్మణ సంక్షేమ పరిషత్ చైర్మన్ వైస్ చైర్మన్ పదవి బాధ్యతల స్వీకరణ ఉత్సవం గురువారం బండ్లగూడ, నాగోల్ వసంత విహార్ ఫంక్షన్ హాల్ లో  ఘనంగా నిర్వహించారు. కార్యక్రమానికి ము ఖ్య అతిథులుగా ఐటీ శాఖ మంత్రి దుద్దిళ్ల శ్రీధర్ బాబు దేవదాయ శాఖ మంత్రి కొండా సురేఖ, దేవాదాయ కమిషనర్ హనుమంతరావు ,మాజీ కేంద్రమంత్రి సముద్రాల వేణుగోపాల్ చారి ,రాష్ట్ర ప్రభుత్వ సలహాదారు వేణుగోపాలరావు, తెలంగాణ రాష్ట్ర బ్రాహ్మణ సంఘం అధ్యక్షులు  జగన్ మోహన్ శర్మ , జగిత్యాల జిల్లా గ్రంధాలయ సంస్థ చైర్మన్ సంఘన భట్ల దినేష్ తదితరులు పాల్గొని నూతనంగా పదవి బాధ్యతల స్వీకరణ మహోత్సవంలో పాల్గొని బ్రాహ్మణ పరిషత్తుకు నూతనంగా నియామకమైన తెలంగాణ రాష్ట్ర బ్రాహ్మణ సంక్షేమ పరిషత్ అధ్యక్షులు బసవరాజు శ్రీనివాస్, ఉపాధ్యక్షులు పొన్నాడ సుబ్రహ్మణ్య ప్రసాద్ తదితరులకు శుభాకాంక్షలు తెలియజేశారు.

రాష్ట్రంలోని వివిధ జిల్లాల నుండి బ్రాహ్మణ సంఘాల బాధ్యులు, సభ్యులు విచ్చేసి సంక్షేమ పరిషత్ అధ్యక్ష కార్యదర్శులను ఘనంగా సత్కరించి జ్ఞాపికలు అందజేశారు.

లోక సమస్త సుఖినోభవంతు అంటూ బ్రాహ్మణులు సమాజానికి ఆశీస్సులు అందజేయాలి

కార్యక్రమంలో పాల్గొన్న మంత్రి శ్రీధర్ బాబు మాట్లాడుతూ బ్రాహ్మణులు తమ వృత్తి ధర్మాన్ని సక్రమంగా పాటించినట్లయితే సమాజం వారిని గౌరవప్రదంగా చూస్తుందని పేర్కొన్నారు. లోక సమస్త సుఖినోభవంతు అంటూ బ్రాహ్మణులు సమాజానికి ఆశీస్సులు అందజేయాలని అన్ని వర్గాల సహకారంతో బ్రాహ్మణ వర్గాలు అభివృద్ధి చెందాలని అన్నారు. ఐక్యతతో ఉండి పరిషత్తు ద్వారా అందజేసే పథకాలను సద్వినియోగ పరుచుకోవాలని అన్నారు .శాఖ బేధం లేకుండా అందరికీ సంక్షేమ పరిషత్తులో డైరెక్టర్లుగా అవకాశం కల్పించడానికి కృషి జరుగుతుందని అన్నారు. రాష్ట్రవ్యాప్తంగా బ్రాహ్మణ సంఘాలు, యువజన సంఘాలు తమ తమ పరిధిలో సేవలు అందిస్తున్నాయని సమాజంలో సేవలతోనే గుర్తింపు వస్తుందని అన్నారు .

దేవాదాయ శాఖ  తనకు ఎంతగానో సంతృప్తినిస్తుంది

దేవాదాయ శాఖ మంత్రి కొండ సురేఖ మాట్లాడుతూ తమ శాఖలో ఉన్నత పదవుల్లో బ్రాహ్మణ సామాజిక వర్గానికి చెందిన వారే ఉండడం వల్ల సహృదయంతో, ఉదారత భావంతో సమాజంలోని అన్ని వర్గాలకు సేవలు అందుతున్నాయని అన్నారు
 దేవదాయ శాఖలో మంత్రిగా పనిచేయడం తనకు ఎంతగానో సంతృప్తినిస్తున్నదని అన్నారు. రాష్ట్ర ముఖ్యమంత్రి రేవంత్ రెడ్డి టెంపుల్ టూరిజం పేరిట బాసర ,భద్రాచలం వేములవాడ  తదితర ఆలయాల నుండి అభివృద్ధి కార్యక్రమాలకు శ్రీకారం చుట్టారని గుర్తు చేశారు.

పరిషత్ అధ్యక్ష ఉపాధ్యక్షులు మాట్లాడుతూ తమపై విశ్వాసం ఉంచి పరిషత్ బాధ్యతలు అప్పగించినందుకు ముఖ్యమంత్రి రేవంత్ రెడ్డికి సహకరించిన మంత్రి శ్రీధర్ బాబుకు దేవాదాయ శాఖ మంత్రి కొండా సురేఖ తదితరులకు ధన్యవాదాలు తెలిపారు.

పరిషత్ చైర్మన్ బసవరాజు శ్రీనివాస్ మాట్లాడుతూ తనమీద అభిమానంతో దూరప్రాంతాల నుంచి విచ్చేసిన బ్రాహ్మణ బంధువులకు తన అభిమానులకు, శ్రేయోభిలాషులకు, మిత్రులకు ధన్యవాదాలు తెలియజేస్తూ ఇక్కడికి వచ్చిన ప్రతి ఒక్కరు తమకే పరిషత్తు చైర్మన్ పదవి తమకి వచ్చింది అన్నట్లుగా భావించి కార్యక్రమంలో పాల్గొన్న అందరికీ ధన్యవాదాలు తెలియజేశారు. ప్రస్తుతం మన ముందున్న పెద్ద సమస్య ప్రభుత్వం నుండి నిధులు తీసుకువచ్చి సంక్షేమ కార్యక్రమాలు కొనసాగించడం అని పెండింగ్లో ఉన్న నిధులను సైతం వచ్చేటట్లు చేసి పరిషత్తుకు ప్రభుత్వానికి మంచి పేరు తెచ్చేలా తన వంతు కృషి చేస్తానని అన్నారు. కార్యక్రమంలో భాగంగా చిన్నారులు నిర్వహించిన వివిధ సాంస్కృతిక కార్యక్రమాలు ఆహుతులను ఎంతగానో ఆకట్టుకున్నాయి.