తెలంగాణలో ఉద్యోగ నియామకాలపై జీవోలు అడ్డంకి –కల్వకుంట్ల కవిత ఆరోపణ

హైదరాబాద్ ఏప్రిల్ 01 (ప్రజా మంటలు):

రాష్ట్రంలో ఉద్యోగ నియామక ప్రక్రియలో జీవోలు అడ్డంకిగా మారుతున్నాయని తెలంగాణ జాగృతి నేత కవిత విమర్శించారు. ప్రభుత్వం నిరుద్యోగ యువతకు ఉద్యోగాలు ఇవ్వకుండా వివిధ జీవోల ద్వారా అవరోధాలు సృష్టిస్తోందని ఆరోపించారు.
డిగ్రీ లెక్చరర్ల నియామకాలకు సంబంధించిన జీవో నంబర్ 4 వల్ల అర్హులైన అభ్యర్థులకు అన్యాయం జరుగుతోందన్నారు. హీహెచ్‌డీకి 25 మార్కులు వెయిటేజ్ ఇవ్వడం, ఇంటర్వ్యూకు మార్కులు కేటాయించడం పారదర్శకతను దెబ్బతీసే చర్యలుగా పేర్కొన్నారు.
గ్రూప్-1, DSC, పోలీస్, గురుకుల నియామకాలలో కూడా వరుసగా జీవో నంబర్లు 29, 104, 46, 81లు అడ్డంకిగా ఉన్నాయని తెలిపారు. ప్రతి నోటిఫికేషన్‌కు ఏదో ఒక జీవో అడ్డంగా మారి నిరుద్యోగులకు నష్టం జరుగుతోందన్నారు.

ప్రభుత్వం ఎన్నికల సమయంలో ఇచ్చిన 2 లక్షల ఉద్యోగాల హామీని ఇప్పటివరకు అమలు చేయలేదని విమర్శించారు. జాబ్ క్యాలెండర్ విడుదల చేయకపోవడంపై కూడా ప్రశ్నించారు.
రాష్ట్రంలో లక్షలాది మంది విద్యార్థులు పోటీ పరీక్షలకు సిద్ధమవుతున్నారని, కానీ నోటిఫికేషన్లు ఆలస్యం కావడంతో అనేక మంది అర్హత కోల్పోతున్నారని అన్నారు. స్టేట్ ఎలిజిబిలిటీ టెస్ట్ నిర్వహణలో ఆలస్యం కూడా సమస్యగా మారిందన్నారు.
రేషన్ కార్డుల విషయంలో కూడా ప్రభుత్వం వ్యతిరేక విధానాలు అమలు చేస్తోందని ఆరోపించారు. కొత్త కార్డులు ఇవ్వడం కంటే, ఉన్న కార్డులను తొలగించే ప్రయత్నాలు జరుగుతున్నాయని విమర్శించారు.
జాగృతి నాయకులు కూడా నిరుద్యోగ సమస్యపై ప్రభుత్వం స్పందించడం లేదని ఆరోపించారు. ఉద్యోగ నోటిఫికేషన్లు లేకపోవడంతో యువత తీవ్ర నిరాశలో ఉందన్నారు. అవసరమైతే రాష్ట్రవ్యాప్తంగా నిరుద్యోగులతో కలిసి పెద్ద ఎత్తున ఉద్యమం చేపడతామని హెచ్చరించారు.