సీనియర్ సిటిజెన్ల సంక్షేమానికి రాష్ట్ర ప్రభుత్వం ప్రత్యేక చర్యలు — జగిత్యాల ఎమ్మెల్యే డాక్టర్ ఎం. సంజయ్ కుమార్

జగిత్యాల, ఫిబ్రవరి 21 (ప్రజా మంటలు):
సీనియర్ సిటిజెన్ల సంక్షేమానికి ముఖ్యమంత్రి రేవంత్ రెడ్డి నేతృత్వంలో రాష్ట్ర ప్రభుత్వం ప్రత్యేక చర్యలు చేపడుతోందని జగిత్యాల ఎమ్మెల్యే డాక్టర్ ఎం. సంజయ్ కుమార్ అన్నారు.

శనివారం జగిత్యాలలోని ఎమ్మెల్యే క్యాంప్ కార్యాలయంలో సీనియర్ సిటిజెన్స్, పెన్షనర్స్ సంఘాల ప్రతినిధులు—జిల్లా అధ్యక్షులు హరి అశోక్ కుమార్ ఆధ్వర్యంలో—ఎమ్మెల్యేను కలిసి పుష్పగుచ్ఛాలు అందించి సన్మానించారు. అనంతరం తెలంగాణ ఆల్ సీనియర్ సిటిజెన్స్ అసోసియేషన్ జిల్లా అధ్యక్షులు హరి అశోక్ కుమార్ రూపొందించిన వయోవృద్ధుల సంరక్షణ–పోషణ చట్టం మరియు పెన్షనర్స్ సర్వీస్ రూల్స్ పుస్తకాలను ఎమ్మెల్యే ఆవిష్కరించారు.

ఈ సందర్భంగా ఎమ్మెల్యే మాట్లాడుతూ, మంత్రి అడ్లూరి లక్ష్మణ్ కుమార్ చొరవతో జిల్లా కేంద్రంలోని తారకరామ నగర్‌లో రూ. కోటి వ్యయంతో ప్రభుత్వ వృద్ధాశ్రమం ఏర్పాటు చేశామని తెలిపారు. అలాగే జగిత్యాల పట్టణ బైపాస్ రోడ్డులో డే కేర్ సెంటర్ ప్రారంభించి, అక్కడ సీనియర్ సిటిజెన్లకు ఉచిత అల్పాహారం, వైద్య సేవలు, వినోద కార్యక్రమాలు అందిస్తున్నామని పేర్కొన్నారు. హరి అశోక్ కుమార్ వినతి మేరకు పెన్షనర్ల సమస్యలను ముఖ్యమంత్రి దృష్టికి తీసుకెళ్తానని హామీ ఇచ్చారు.

వయోవృద్ధులు, పెన్షనర్ల సమస్యల పరిష్కారం కోసం నిరంతరం కృషి చేస్తున్న సీనియర్ సిటిజెన్స్, పెన్షనర్స్ సంఘాల జిల్లా అధ్యక్షులు హరి అశోక్ కుమార్‌తో పాటు వారి సంఘాల ప్రతినిధులను ఎమ్మెల్యే అభినందించారు.

ఈ కార్యక్రమంలో సీనియర్ సిటిజెన్స్ జిల్లా అధ్యక్షులు హరి అశోక్ కుమార్, కార్యదర్శి గౌరి శెట్టి విశ్వనాతం, పెన్షనర్ల జిల్లా కార్యదర్శి పి.సి. హన్మంత్ రెడ్డి, సీనియర్ సిటిజెన్స్ ఉపాధ్యక్షులు పి. అశోక్ రావు, కోశాధికారి వి. ప్రకాష్ రావు, సంయుక్త కార్యదర్శి ఎం.డి. యాకూబ్, కోరుట్ల అధ్యక్షులు పబ్బా శివానందం, జగిత్యాల యూనిట్ అధ్యక్షులు బి. రాజేశ్వర్, నాయకులు కొక్కుల ఆంజనేయులు, నాయిని సంజీవ రావు, సత్యనారాయణ, బాలయ్య, కట్ట గంగాధర్, కరుణ తదితరులు పాల్గొన్నారు.