కౌన్సిల్‌లో మాట్లాడి రాజీనామా ఆమోదింప చేసుకుంటా – కవిత

హైదరాబాద్, జనవరి 02 (ప్రజా మంటలు):

తాను చేసిన రాజీనామాను కౌన్సిల్‌లో మాట్లాడిన తర్వాతే ఆమోదింప చేయించుకుంటానని ఎమ్మెల్సీ కల్వకుంట్ల కవిత స్పష్టం చేశారు. సెప్టెంబర్ 3న రాజీనామా చేసినప్పటికీ ఇప్పటివరకు దాన్ని ఆమోదించలేదని ఆమె పేర్కొన్నారు. ప్రస్తుతం శాసన మండలి సమావేశాలు జరుగుతున్న నేపథ్యంలో, తనకు సభలో మాట్లాడే అవకాశం ఇవ్వాలని ఛైర్మన్‌ను కోరనున్నట్లు తెలిపారు.

ఈ సందర్భంగా సీఎం రేవంత్ రెడ్డి చేసిన వ్యాఖ్యలను తీవ్రంగా తప్పుబట్టారు. “కేసీఆర్‌ను ఉరి తీయాలి అన్నట్లు మాట్లాడటం అత్యంత అనుచితం. రేవంత్ రెడ్డి మాటలు ప్రజాస్వామ్యానికి విరుద్ధం” అని కవిత మండిపడ్డారు. పాలమూరు ప్రజలపై జరుగుతున్న అన్యాయాలపై ప్రశ్నించడానికే తన స్వరం అని తెలిపారు.

పాలమూరు–రంగారెడ్డి ప్రాంతాల్లో జరిగిన అక్రమాలపై స్పందిస్తూ, “అక్కడ జరిగిన అక్రమాలకు బాధ్యులైన వారిని బీఆర్ఎస్ డిప్యూటీ ఫ్లోర్ లీడర్ చేయడం సరైంది కాదు” అని వ్యాఖ్యానించారు. ప్రాజెక్టు సోర్స్ పాయింట్ ఎందుకు మార్చాల్సి వచ్చిందో కేసీఆర్ స్వయంగా అసెంబ్లీలో వివరించాలని డిమాండ్ చేశారు.

హరీశ్ రావుపై కూడా ఆమె విమర్శలు గుప్పించారు. “హరీశ్ రావు పాలమూరులో ప్యాకేజీలు అమ్ముకున్నారు. ఆయన మాట్లాడితే అంతా మ్యాచ్ ఫిక్సింగ్ లా మారుతోంది. గతంలో రేవంత్ రెడ్డితో ఆయన చాంబర్‌లో జరిగిన చర్చలన్నీ అందరికీ తెలుసు” అన్నారు.

బీఆర్ఎస్ పట్ల తనకు మనసు విరిగిపోయిందని, కేసీఆర్ పిలిచినా మళ్లీ ఆ పార్టీలో చేరే ప్రశ్నే లేదని కవిత స్పష్టం చేశారు. “నేను మొదటి నుంచీ స్వతంత్రంగా పని చేశాను. జాగృతి జెండాతోనే ముందుకు సాగుతాను. తెలంగాణకు స్వతంత్ర రాజకీయ శక్తి అవసరం ఉంది. రాబోయే అసెంబ్లీ ఎన్నికల్లో నా సొంత పార్టీతోనే పోటీ చేస్తాను” అని ప్రకటించారు.

అలాగే, కాంగ్రెస్ ప్రభుత్వంపై కూడా తీవ్ర విమర్శలు చేశారు. “గ్రామీణ ప్రాంతాల్లో, ముఖ్యంగా గిరిజన తండాల్లో కొత్తగా ఒక్క కరెంట్ పోల్ కూడా వేయడం లేదు. మిషన్ భగీరథను పూర్తిగా నిర్లక్ష్యం చేస్తున్నారు. తాగునీటి కోసం ప్రజలు తీవ్ర ఇబ్బందులు పడుతున్నారు” అని ఆవేదన వ్యక్తం చేశారు.