విద్యా–సామాజిక రంగానికి తీరని లోటు: కాసుగంటి సుధాకర్ రావు మృతిపై పలువురి సంతాపం

జగిత్యాల డిసెంబర్ 26 (ప్రజా మంటలు):

విద్యా, పారిశ్రామిక, సామాజిక రంగాలకు విశేష సేవలందించిన ప్రముఖ విద్యావేత్త కాసుగంటి సుధాకర్ రావు మృతి జగిత్యాల జిల్లాలో తీవ్ర విషాదాన్ని నింపింది. ఆయన అకాల మరణం పట్ల పలువురు ప్రజాప్రతినిధులు, విద్యావేత్తలు, సామాజిక కార్యకర్తలు తీవ్ర సంతాపం వ్యక్తం చేశారు.

విద్యావేత్తగా, సామాజిక సేవకుడిగా, పారిశ్రామికవేత్తగా విశేష గుర్తింపు పొందిన కాసుగంటి సుధాకర్ రావు గారు—భారతీయ నాగరికత విద్యా సమితి స్థాపకుడిగా, శ్రీ సరస్వతి శిశు మందిర్, శ్రీ వాణి సహకార జూనియర్ కళాశాలల ద్వారా వేలాది మంది విద్యార్థులకు నాణ్యమైన విద్యను అందించారు. అలాగే గోదావరి వ్యాలీ ఇండస్ట్రీస్ ద్వారా అనేక మందికి ఉపాధి కల్పించి సమాజ సేవలో ముందుండేవారు.

జగిత్యాల ఎమ్మెల్యే డా. సంజయ్ కుమార్,ఆయన మృతిపై జిల్లా పరిషత్ తొలి చైర్‌పర్సన్ దావ వసంత సురేష్, , రోటరీ క్లబ్ సభ్యులు సిరిసిల్ల శ్రీనివాస్, మంచాల కృష్ణ, ఏ వి ఎవిఎల్ ఎన్ చారి, ఎన్.రాజు, టి వి సూర్యం, కొత్త ప్రతాప్, త్రివేణి సాగర్, ఎన్నాకుల అశోక్, మాజీ మున్సిపల్ ఛైర్మన్ గిరి నాగభూషణం, తదితరులు, ప్రజా మంటలు జాతీయ దినపత్రిక ఎడిటర్ సిహెచ్.వి.ప్రభాకర్ రావు,నిర్వాహకులు సిరిసిల్ల రాజేందర్ శర్మ, దుర్గా కేబుల్ మంద మల్లేష్, మరియు వివిధవిద్యా సంస్థల నిర్వాహకులు, సామాజిక కార్యకర్తలు తీవ్ర దిగ్భ్రాంతి వ్యక్తం చేశారు.

కాసుగంటి సుధాకర్ రావు ఆత్మకు శాంతి చేకూరాలని, వారి కుటుంబ సభ్యులకు భగవంతుడు మనోధైర్యం ప్రసాదించాలని పలువురు ఆకాంక్షించారు.

జగిత్యాల విద్యా రంగానికి ఆయన చేసిన సేవలు చిరస్మరణీయమని, ఆయన లేని లోటు ఎన్నటికీ తీరదని పలువురు పేర్కొన్నారు.