రూ.3855.02 కోట్ల వ్యాపారానికి చేరుకున్న గాయత్రి బ్యాంకు : కొడిమ్యాల‌లో 68వ శాఖ ప్రారంభం

జగిత్యాల, డిసెంబర్ 23 (ప్రజా మంటలు):

జగిత్యాల కేంద్రంగా పనిచేస్తున్నది. గాయత్రి కో-ఆపరేటివ్ అర్బన్ బ్యాంకు లిమిటెడ్ మరో కీలక మైలురాయిని చేరుకుంది. కొడిమ్యాల మండల కేంద్రంలో బ్యాంకు 68వ శాఖను జగిత్యాల జిల్లా కలెక్టర్ & మెజిస్ట్రేట్ బి. సత్యప్రసాద్ ఐఏఎస్ చేతుల మీదుగా సోమవారం ఘనంగా ప్రారంభించారు.

ఈ ప్రారంభోత్సవ కార్యక్రమంలో జిల్లా సహకార అధికారి సి.హెచ్. మనోజ్ కుమార్, జగిత్యాల ఆర్డీవో పి. మధుసూదన్, కొడిమ్యాల ఎంపీడీఓ ఇ. స్వరూప, ఎమ్మార్వో యం. కిరణ్ కుమార్, గ్రామ సర్పంచ్ గడ్డం జీవన్ రెడ్డి, వార్డు సభ్యురాలు చిట్యాల సుమలత నరేంధర్, బ్యాంకు ముఖ్య కార్యనిర్వహణాధికారి వనమాల శ్రీనివాస్ తదితరులు పాల్గొన్నారు.

రెండు తెలుగు రాష్ట్రాల్లో విస్తరణ

మల్టీ స్టేట్ బ్యాంకుగా గుర్తింపు పొందిన గాయత్రి బ్యాంకు, తెలంగాణ–ఆంధ్రప్రదేశ్ రాష్ట్రాల్లో 67 శాఖల ద్వారా 8,76,581 మంది వినియోగదారులకు సేవలు అందిస్తూ, కొడిమ్యాలలో 68వ శాఖను ప్రారంభించడం ఆనందంగా ఉందని బ్యాంకు ప్రతినిధులు తెలిపారు.

తెలంగాణలో తొలి స్థానం

బ్యాంకు అధ్యక్షులు గుండేటి గంగాధర్ మాట్లాడుతూ, పేద మరియు మధ్యతరగతి ప్రజల బ్యాంకుగా గుర్తింపు పొందిన గాయత్రి బ్యాంకు రూ.3855.02 కోట్ల వ్యాపారాన్ని సాధించి తెలంగాణ రాష్ట్రంలో మొదటి స్థానానికి చేరుకోవడం గర్వకారణమని తెలిపారు. కొడిమ్యాల మండల ప్రజల ఆర్థిక అభివృద్ధికి బ్యాంకు తోడ్పడుతుందని ఆశాభావం వ్యక్తం చేశారు.

డిపాజిట్లు – రుణాలు – ఎన్‌పిఎ శూన్యం

జిల్లా సహకార అధికారి సి.హెచ్. మనోజ్ కుమార్ మాట్లాడుతూ, బ్యాంకుకు ప్రస్తుతం రూ.2208.23 కోట్ల డిపాజిట్లు, రూ.1646.79 కోట్ల రుణాలు ఉండగా 0 శాతం ఎన్‌పిఎ సాధించిందన్నారు. ఈ ఆర్థిక సంవత్సరంలో మరో 14 కొత్త శాఖలను ప్రారంభించి మొత్తం 81 శాఖలకు విస్తరిస్తామని తెలిపారు.

ప్రజలకు విస్తృత బ్యాంకింగ్ సేవలు

గాయత్రి బ్యాంకు తక్కువ మొత్తంతో సేవింగ్ ఖాతాలు, నిర్భయ సేవింగ్ ఖాతా ద్వారా రూ.2 లక్షల ప్రమాద భీమా, బంగారు రుణాలు, వ్యవసాయ–వ్యాపార రుణాలు, యూపీఐ (ఫోన్‌పే, గూగుల్ పే) సేవలు, ప్రభుత్వ పింఛన్లు, సబ్సిడీల బదిలీ వంటి సౌకర్యాలు అందిస్తోందని బ్యాంకు అధికారులు వివరించారు.

ప్రజల చెంతకు సేవలే లక్ష్యం

ముఖ్య కార్యనిర్వహణాధికారి వనమాల శ్రీనివాస్ మాట్లాడుతూ, వినియోగదారుల చెంతకు బ్యాంకింగ్ సేవలు తీసుకెళ్లడమే గాయత్రి బ్యాంకు ప్రధాన లక్ష్యమని తెలిపారు. ఎటువంటి హిడెన్ ఛార్జీలు లేకుండా, పేద–మధ్యతరగతి ప్రజల శ్రేయస్సే లక్ష్యంగా పనిచేస్తున్నామని పేర్కొన్నారు.

ఈ కార్యక్రమంలో బ్యాంకు జనరల్ మేనేజర్ ఇమ్మడి శ్రీలత, రీజినల్ మేనేజర్ బింగి తిరుపతి, బ్రాంచి హెడ్ సి.హెచ్. తిరుపతి, పాలకవర్గ సభ్యులు, సహకార అధికారులు, వ్యాపారులు, ప్రజాప్రతినిధులు, బ్యాంకు సిబ్బంది పెద్ద సంఖ్యలో పాల్గొన్నారు.
....