ట్రిపుల్ ఆర్‌, భూసేకరణ, రైతు–చేనేత సమస్యలపై జాగృతి పోరాటం – భువనగిరిలో కవిత సంచలన వ్యాఖ్యలు

భువనగిరి డిసెంబర్ 24 (ప్రజా మంటలు):

జాగృతి జనం బాట కార్యక్రమంలో భాగంగా భువనగిరి జిల్లాలో పర్యటించిన తెలంగాణ జాగృతి అధ్యక్షురాలు కవిత ప్రెస్‌మీట్‌లో విస్తృత అంశాలపై స్పందించారు. తాను తెలంగాణ ప్రజల బాణమని, ఎవరో ఆపరేట్ చేసే పరిస్థితి లేదని స్పష్టం చేశారు. 2029 ఎన్నికల్లో బరిలో ఉంటామని తెలిపారు. బీఆర్ఎస్ నుంచి సస్పెన్షన్‌కు కారణం చెప్పలేదని, పార్టీ లోపాలపై అప్పట్లో భాగస్వామినైనందుకు ప్రజలకు క్షమాపణలు చెప్పారు.

ట్రిపుల్ ఆర్ ప్రాజెక్ట్‌లో పెద్దల భూముల కోసం పేదల భూములను బలి పెడుతున్నారని, నాయకుల అవినీతికి అనుగుణంగా ఆలైన్‌మెంట్లు మారుస్తున్నారని ఆరోపించారు. దీనిపై ఆన్‌లైన్ ఉద్యమం చేపట్టి జనవరి 5న హైదరాబాద్‌లో బాధిత రైతులతో రౌండ్‌టేబుల్ సమావేశం నిర్వహిస్తామని ప్రకటించారు. బస్వాపూర్ రిజర్వాయర్ ద్వారా ఇప్పటివరకు చుక్క నీరు కూడా రాలేదని విమర్శించారు.

భువనగిరి జిల్లా అభివృద్ధి, ఎయిమ్స్ నిర్మాణం ఆలస్యం, స్థానికులకు ఉద్యోగాల్లో 80 శాతం కేటాయింపు, ఫీజు రీయింబర్స్‌మెంట్ బకాయిలు, ఆలేరు 100 పడకల హాస్పిటల్‌, రోడ్డు ప్రమాదాలు, బ్రిడ్జి నిర్మాణం, భూసేకరణ అన్యాయాలు, డ్రై పోర్ట్‌, పరిశ్రమల వల్ల కాలుష్యం వంటి అంశాలను ప్రస్తావించారు. ప్రభుత్వాల నిర్లక్ష్యంతో సాగునీటి లక్ష్యాలు నెరవేరలేదని, కాల్వల నిర్వహణ దారుణంగా ఉందని పేర్కొన్నారు.

అదే రోజు భువనగిరి ఫోర్ట్ వద్ద రాక్ క్లైంబింగ్ శిక్షణ పొందుతున్న విద్యార్థులను కలిసిన కవిత, స్వర్ణకార వీధిలో స్వర్ణకారులతో, కుమ్మరి వీధిలో కుమ్మరి కార్మికులతో సమావేశమై వారి సమస్యలు తెలుసుకున్నారు. స్వర్ణకారుల వృత్తిని గౌరవిస్తూ, అవకాశం వస్తే పుస్తె మెట్టెల కొనుగోలు ఫైల్‌పై మొదటి సంతకం స్వర్ణకారుల నుంచే చేస్తానని వ్యాఖ్యానించారు.

జియాపల్లి క్రషర్ పేలుళ్లతో ఇబ్బంది పడుతున్న ప్రజలను పరామర్శించిన ఆమె, భూదాన్ పోచంపల్లిలో చేనేత కార్మికులతో కలిసి ధర్నా నిర్వహించారు. చేనేతలకు రుణమాఫీ, నిధుల విడుదల వెంటనే చేయాలని డిమాండ్ చేస్తూ, ప్రజా సమస్యలపై జాగృతి పోరాటం కొనసాగుతుందని స్పష్టం చేశారు.