“ఏం సాధించారని సంబరాలు" – తెలంగాణ జాగృతి అధికార ప్రతినిధి డా.నలమాస శ్రీకాంత్ గౌడ్

“స్థానిక ఎన్నికల్లో ప్రజలు బుద్ధి చెబుతారు”

హైదరాబాద్, డిసెంబర్ 8 (ప్రజా మంటలు):

ఇచ్చిన ఒక్క హామీ కూడా నెరవేర్చకుండా కాంగ్రెస్ ప్రభుత్వం రెండేళ్ల సంబరాలు చేసుకోవడం సిగ్గుచేటు అని తెలంగాణ జాగృతి అధికార ప్రతినిధి డా. నలమాస శ్రీకాంత్ గౌడ్ తీవ్రంగా విమర్శించారు. బంజారాహిల్స్‌లోని తెలంగాణ జాగృతి కార్యాలయంలో మీడియాతో మాట్లాడిన ఆయన, రెండేళ్ల పాలన మొత్తంలో వైఫల్యాలే కనిపిస్తున్నాయన్నారు.

సీఎం రేవంత్ రెడ్డి గ్లోబల్ సమ్మిట్ పేరుతో “టెలంగాణను దేశానికి గ్రోత్ ఇంజన్ చేస్తాం” అని చెప్పడమే ఒక హాస్యాస్పదమైన వ్యాఖ్య అని పేర్కొన్నారు. “రెండేళ్లుగా ఒక్క పని చేయని ప్రభుత్వం దేశాన్ని ఎలా ముందుకు నడిపిస్తుంది?” అని ప్రశ్నించారు. ప్యూచర్ సిటీ గురించి సీఎం మాట్లాడటం కూడా ప్రజలను మోసం చేసే ప్రయత్నమేనని అన్నారు.

రైతులకు ఎరువులు, యూరియా లేక రైతాంగం తీవ్ర ఇబ్బందులు పడుతోంది.ప్రభుత్వ ఆసుపత్రుల్లో సూదీ లేదు, మందు లేదు – ప్రజా ఆరోగ్య వ్యవస్థ పూర్తిగా క్షీణించింది. రెండు సంవత్సరాల్లో ప్రజల కొనుగోలు శక్తి పడిపోయింది.

జాబ్ క్యాలెండర్ పేరుతో యువతను మోసం చేశారు. ఉద్యోగాలు లేక యువత ఆత్మహత్యల దాకా వెళ్తోంది. గురుకులాల్లో సరిగా ఆహారమే అందక విద్యార్థులు ఇబ్బందులు పడుతున్నారు. ఉద్యోగులు, పెన్షనర్లు, ఔట్ సోర్సింగ్ సిబ్బందికి జీతాలు విడుదల చేయడంలో ప్రభుత్వం విఫలమైంది. గ్యాస్ సబ్సిడీ లేదు, కొత్త రేషన్ కార్డులు ఇవ్వటం లేదు.“ఇలాంటి పాలన దేశానికి గ్రోత్ ఇంజన్ అవుతుందా?” అంటూ ప్రశ్నించారు.

దావోస్‌ పర్యటనలో జరిగిన ఒప్పందాలపై ప్రభుత్వం శ్వేతపత్రం విడుదల చేయాలని డిమాండ్ చేశారు. ఫీజు రీయింబర్స్‌మెంట్ ఇవ్వలేని, అమ్మాయిలకు హాస్టల్ వసతులు కల్పించలేని “దారుణమైన” ప్రభుత్వం కాంగ్రెస్‌దేనన్నారు.

బీసీలపై మోసం – కఠిన విమర్శ

డా. శ్రీకాంత్ గౌడ్ మాట్లాడుతూ,బీసీలకు రిజర్వేషన్లు ఇవ్వకుండా ఎన్నికలు నిర్వహించటాన్ని తీవ్రంగా ఖండించారు.తెలంగాణ తల్లి విగ్రహాలను ప్రజల అభిమతం లేకుండా ఏర్పాటు చేయటం అంగీకారయోగ్యం కాదన్నారు. రాష్ట్ర అస్తిత్వాన్ని దెబ్బతీయే ప్రయత్నాలు చేస్తే ప్రజలు ఎట్టి పరిస్థితుల్లో వదిలిపెట్టరన్నారు.

అసిస్టెంట్ పబ్లిక్ ప్రాసిక్యూటర్ పరీక్షలను వాయిదా వేయాలని కూడా డిమాండ్ చేశారు.

“స్థానిక ఎన్నికల్లో ప్రజలు బుద్ధి చెబుతారు”

ఇచ్చిన హామీలు అమలు చేయకుండానే ఉత్సవాలు జరుపుతామని కాంగ్రెస్ ప్రభుత్వం భావిస్తే, రాబోయే స్థానిక ఎన్నికల్లో ప్రజలు గట్టి బుద్ధి చెప్తారని హెచ్చరించారు. “ఇది రైజింగ్ తెలంగాణ కాదు… లూజింగ్ సర్కార్” అని ఆయన వ్యంగ్యంగా వ్యాఖ్యానించారు.