కొండగట్టు భారీ అగ్నిప్రమాదం – కోట్లలో ఆస్తి నష్టం, 30 కుటుంబాల జీవితం చిద్రమ్

కేంద్ర మంత్రి సంజయ్, BRS వర్కింగ్ ప్రెసిడెంట్ కేటీఆర్ ఫోన్ లో సంప్రదింపు

మంత్రి పొన్నం ప్రభాకర్ విచారం

మాజీ ఎమ్మెల్యే సుంకే రవిశంకర్ ₹5 వేల ఆర్థిక సహాయం

కొండగట్టు, నవంబర్ 30 (ప్రజా మంటలు):

జగిత్యాల జిల్లాలోని ప్రముఖ పుణ్యక్షేత్రం కొండగట్టు వద్ద నిన్న రాత్రి 11 గంటల సమయంలో ఘోర అగ్నిప్రమాదం సంభవించింది. అభయ హనుమాన్ విగ్రహం నుంచి ప్రధాన రహదారి వరకు ఉన్న మొత్తం 32 బొమ్మల దుకాణాలు పూర్తిగా దగ్ధమయ్యాయి.

కొండగట్టు అగ్నిప్రమాదంపై కేంద్ర మంత్రి బండి సంజయ్ స్పందన

ఘటనపై కేంద్ర మంత్రి బండి సంజయ్ రాయపూర్‌లో ఉన్నప్పటికీ, సమాచారం తెలిసిన వెంటనే జిల్లా కలెక్టర్ సత్య ప్రసాద్‌తో ఫోన్‌లో మాట్లాడి పరిస్థితిని తెలుసుకున్నారు. బాధితులకు అండగా ఉండాలని కోరుతూ, ఇలాంటి ఘటనలు పునరావృతం కాకుండా చర్యలు తీసుకోవాలని సూచించారు.

జిల్లాకలెక్టర్ సత్య ప్రసాద్ బాధితులను స్థానిక పాఠశాలకు తరలించి ఆహారం, వస్త్రాలు సహా తాత్కాలిక సాయాన్ని అందించినట్లు తెలిపారు. నష్టపరిహారం కోసం ప్రభుత్వం‌కు నివేదిక పంపుతున్నామని పేర్కొన్నారు.

 మంత్రి పొన్నం ప్రభాకర్ విచారం

కొండగట్టులో నిన్న రాత్రి జరిగిన భారీ అగ్నిప్రమాదంపై మంత్రి పొన్నం ప్రభాకర్ తీవ్ర విచారం వ్యక్తం చేశారు. ఘటన వివరాలపై జిల్లా కలెక్టర్ సత్య ప్రసాద్‌తో ఫోన్‌లో మాట్లాడి సమాచారం తెలుసుకున్నారు. అధికారులు వెంటనే ఘటనాస్థలిలో పర్యటించాలని ఆదేశించారు.

అర్ధరాత్రి ప్రమాదం జరగడం వల్ల ప్రాణాపాయం తప్పిందని, రోడ్డుపై ఉన్న బొమ్మల దుకాణాలు దగ్ధమవడంతో ఆస్తి నష్టం జరిగినట్లు కలెక్టర్ వివరించారు. బాధిత కుటుంబాలకు ప్రభుత్వం అండగా ఉంటుందని మంత్రి పొన్నం ప్రభాకర్ భరోసా ఇచ్చారు.

మేడారం సమ్మక్క–సారలమ్మ జాతరను దృష్టిలో ఉంచుకుని వ్యాపారులు భారీగా బొమ్మలు, సామగ్రి నిల్వ చేసుకున్నారు. ఒక్కో దుకాణంలో రూ. 8–10 లక్షల వరకూ సరుకు ఉన్నట్లు తెలుస్తోంది. మంటల్లో దుకాణాలు పూర్తిగా ధ్వంసమవడంతో కోట్లలో ఆస్తి నష్టం జరిగిందని అంచనా.

షార్ట్ సర్క్యూట్‌నే కారణమని ప్రాథమిక నిర్ధారణ

అగ్ని ప్రమాదం సమాచారం అందుకున్న ఫైర్ సిబ్బంది సంఘటన స్థలానికి చేరేలోపే మంటలు পুরো ప్రాంతాన్ని చుట్టుముట్టాయి. జగిత్యాల ఫైర్ ఇంజిన్ రిపేర్‌లో ఉండటం, మరో ఇంజన్ పనిచేయకపోవడం, గంట తర్వాత కోరుట్ల, కరీంనగర్ నుంచి వాహనాలు రావడం ప్రమాదాన్ని మరింత తీవ్రమయ్యేలా చేసిందని స్థానికులు ఆవేదన వ్యక్తం చేస్తున్నారు.

తమ కళ్ల ముందే సర్వస్వం బూడిదవడంతో వ్యాపారులు విషాదంలో మునిగిపోయారు.

కేటీఆర్ ఆవేదన – ఒక్కో కుటుంబానికి రూ.30 లక్షలు పరిహారం ఇవ్వాలి

కొండగట్టు అగ్నిప్రమాదంపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర ఆవేదన వ్యక్తం చేశారు. మాజీ ఎమ్మెల్యే సుంకె రవిశంకర్‌తో ఫోన్ ద్వారా మాట్లాడి ఘటన వివరాలు తెలుసుకున్నారు.

కేటీఆర్ పేర్కొన్న ముఖ్యాంశాలు:

• ప్రభుత్వ నిర్లక్ష్యం వల్లే భారీ నష్టం జరిగినది.
• ఫైర్ ఇంజిన్ సమయానికి రాకపోవడం ప్రభుత్వ వైఫల్యానికి నిదర్శనం.
• దాదాపు 30 కుటుంబాల ఉపాధి పూర్తిగా నాశనం అయింది.
• ఒక్కో దుకాణం లక్షల రూపాయల నష్టంతో మొత్తం కోటి రూపాయల కంటే ఎక్కువ ఆస్తి నష్టం.
• ప్రభావిత కుటుంబాలకు ఒక్కో కుటుంబానికి రూ.30 లక్షల పరిహారం ఇవ్వాలని డిమాండ్.

ప్రమాదం తెలిసిన వెంటనే అక్కడికి చేరుకుని బాధితులకు రూ. 5,000 తాత్కాలిక సాయం అందజేసిన మాజీ ఎమ్మెల్యే సుంకె రవిశంకర్‌ను కేటీఆర్ అభినందించారు. బాధితులకు అండగా ఉంటామని భరోసా ఇచ్చారు.