జగిత్యాల భూ వివాదంపై పారదర్శకంగా విచారణ జరపండి: దావ వసంత సురేష్

జగిత్యాల, నవంబర్ 10 (ప్రజా మంటలు):
జగిత్యాల పట్టణంలోని కొత్త బస్టాండ్ సమీపంలో ఉన్న విలువైన ప్రభుత్వ భూమి అక్రమ కబ్జా ఆరోపణలు మరోసారి తెరమీదకొచ్చాయి. ఈ వివాదంపై తక్షణమే పారదర్శక విచారణ జరపాలని జగిత్యాల జిల్లా పరిషత్ తొలి ఛైర్ పర్సన్ దావ వసంత సురేష్ జిల్లా కలెక్టర్ కార్యాలయంలో ప్రజావాణి కార్యక్రమంలో అధికారులకు వినతిపత్రం అందజేశారు.

70 ఏళ్లుగా సాగుతున్న వివాదం – “అధికారుల నిర్లక్ష్యమే మూలం”

వినతిపత్రం అందజేసిన అనంతరం మీడియాతో మాట్లాడిన వసంత సురేష్ గారు, ఈ భూమి విషయంపై గత 70 ఏళ్లుగా వివాదం కొనసాగుతోందని, కానీ అధికారుల నిర్లక్ష్యం, సమయానుకూలంగా నిర్ణయాలు తీసుకోకపోవడం వల్ల ప్రభుత్వానికి చెందిన వందల కోట్ల విలువైన భూమి వ్యక్తుల చేతుల్లో బందీ అయిపోయిందని తీవ్ర స్థాయిలో విమర్శించారు.

“జగిత్యాల పట్టణంలోని 138 సర్వే నెంబరు భూమి పరిస్థితి చూస్తే తలా పాపం చెరో పిడికెడు అన్నట్టుగా ఉంది. ప్రతి దశలో ఏదో ఒక లోపం, ప్రతి ఫైల్‌లో ఏదో ఒక అనుమానం, ప్రతి నిర్ణయంలో అధికార అనాసక్తి కనిపిస్తోంది” అని ఆయన వ్యాఖ్యానించారు.

అక్రమ నిర్మాణాలకు అనుమతులు ఇచ్చిన మున్సిపల్ అధికారులు ఎవరు? 

“ఈ భూమిపై అక్రమ నిర్మాణాలకు అనుమతులు ఇచ్చింది ఏ విభాగం?”

“మున్సిపల్ అధికారులు ఎందుకు మౌనం వహిస్తున్నారు?”

“ప్రభుత్వ భూమిని వ్యక్తులకు ధారాదత్తం చేసే సమయంలో నిబంధనలు ఎలా ఉల్లంఘించారు?”

“ఈ వ్యవహారం మొత్తం కిబాల్స్ (Kibale) డాక్యుమెంట్స్ చుట్టూనే తిరుగుతోంది. వాటిని పూర్తి స్థాయిలో ట్రాన్స్‌లేట్ చేయించి వాస్తవాలు ఏమిటో ప్రజలకు వెల్లడిస్తాం” అని ఆయన తెలిపారు.

అక్రమాలు నిరూపితమైతే భూమి స్వాధీనం చేసుకోవాలి – బాధ్యులపై చర్యలు

“విచారణలో భూ ఆక్రమణ, అక్రమాలు నిరూపితమైతే భూమిని వెంటనే ప్రభుత్వ ఆధీనంలోకి తీసుకోవాలి. నిబంధనలను అతిక్రమించిన అధికారులు, సంబంధిత వ్యక్తులపై క్రిమినల్ కేసులు నమోదు చేయాలి.”

అలాగే ఈ వ్యవహారం ఇక్కడితో మూడిపోదని, అవసరమైతే హైకమాండ్ దృష్టికి తీసుకెళ్లి, వారి సహకారంతో రాష్ట్ర ప్రభుత్వ ముఖ్య కార్యదర్శిని కలిసి విజ్ఞప్తి చేసేందుకు సిద్ధంగా ఉన్నామని ఆయన స్పష్టం చేశారు.

వసంత గారు మాట్లాడుతూ, “ప్రజల ఆస్తి ప్రజలకే చెందాలనే కేసీఆర్ గారి స్ఫూర్తితోనే BRS తరఫున ఈ పోరాటం చేస్తున్నాం” అన్నారు.
ప్రభుత్వ ఆస్తులను కాపాడడం ఏ రాజకీయ వర్గానికీ కాకుండా రాష్ట్ర ప్రభుత్వ బాధ్యత అని చెప్పారు.

ఈ కార్యక్రమంలో మాజీ కౌన్సిలర్ దేవేందర్ నాయక్, BRS నాయకులు శీలం ప్రవీణ్, నాచుపెల్లి రెడ్డి అనురాధ, నక్క గంగాధర్, రిజ్వాన్, నీలి ప్రతాప్, గంగిపెల్లి వేణుమాధవ్, గాజుల శ్రీనివాస్, మధుకర్, ప్రణయ్, భగవాన్ రాజ్, కోటగిరి మోహన్, నవదీప్, జవీద్ తదితరులు పాల్గొన్నారు.