వై.ఎస్.ఆర్ ఆశయాలకు విరుద్ధంగా రేవంత్ పాలన – దావ వసంత సురేష్

ఫీజు రియాంబర్స్ బకాయిలు విడుదల చేయాలని డిమాండ్

జగిత్యాల, నవంబర్ 4 (ప్రజా మంటలు):
రాష్ట్ర ముఖ్యమంత్రి రేవంత్ రెడ్డి పాలన వై.ఎస్.ఆర్ ఆశయాలకు తూట్లు పొడిచేలా ఉందని జిల్లా పరిషత్ తొలి ఛైర్‌పర్సన్ శ్రీమతి దావ వసంత సురేష్ విమర్శించారు. ఫీజు రియాంబర్స్‌మెంట్ బకాయిలు విడుదల చేయాలంటూ డిగ్రీ, పీజీ కళాశాలల యాజమాన్యాలు చేపట్టిన నిరవధిక బంద్‌కు ఆమె సంఘీభావం తెలిపారు.

అధ్యాపకులు, యాజమాన్యాలు అంబేద్కర్ విగ్రహానికి పూలమాలలు వేసి నివాళులు అర్పించిన తర్వాత వినతిపత్రం సమర్పించారు.

ఈ సందర్భంగా వసంత సురేష్ మాట్లాడుతూ“విద్యార్థులు, యాజమాన్యాల భవిష్యత్ ప్రశ్నార్థకంగా మారింది. ప్రభుత్వం నిర్లక్ష్య ధోరణితో విద్య వ్యవస్థ కూలిపోతుంది. ఫీజు రియాంబర్స్ బకాయిలు వెంటనే విడుదల చేయాలి” అని డిమాండ్ చేశారు.
దావ వసంత సురేష్ మాట్లాడుతూ,“ఇప్పటికే రూ.1200 కోట్ల టోకెన్ నిధులు ఉన్నప్పటికీ విడుదల చేయకపోవడం ప్రభుత్వ నిర్లక్ష్యానికి నిదర్శనం. జగన్ ప్రభుత్వంలో లేదా గత కేసీఆర్ పాలనలో విద్యార్థులు ఇంత దయనీయ స్థితిలో లేరు. విద్యార్థుల భవిష్యత్‌తో ఆటలు ఆడటం దుర్మార్గం” అని అన్నారు.»

“జిల్లాలో ₹70–100 కోట్ల వరకు, రాష్ట్రవ్యాప్తంగా ₹10,000 కోట్లకు పైగా బకాయిలు పెండింగ్‌లో ఉన్నాయి. కనీసం టోకెన్ నిధులైనా విడుదల చేసి కళాశాలలకు అండగా నిలవాలి. లేకపోతే, కళాశాలలు మూతపడే పరిస్థితి వస్తుంది” అని హెచ్చరించారు.

“అణచివేతలతో, తనిఖీలతో భయపెట్టడం కాదు; సమస్య పరిష్కారానికి చొరవ చూపాలి. లేకపోతే అగ్నికి ఆజ్యం పోసినట్టే అవుతుంది. ప్రభుత్వం ఇప్పటికైనా కళ్ళు తెరవాలి” అని డిమాండ్ చేశారు.

ఈ కార్యక్రమంలో బీఆర్ఎస్ సీనియర్ నాయకులు శీలం ప్రవీణ్, చింతల గంగాధర్, గంగిపెల్లి వేణు, పెండెం గంగాధర్, గాజుల శ్రీనివాస్, పట్నం అనురాధ, నీలి ప్రతాప్, ప్రణయ్ తో పాటు డిగ్రీ, పీజీ కళాశాలల అధ్యాపకులు, సిబ్బంది పాల్గొన్నారు.