గాంధీ ఆసుపత్రిని సందర్శించిన డీఎంఈ

పలు అభివృద్ది పనుల పరిశీలన

సికింద్రాబాద్, జూన్ 11 (ప్రజామంటలు):

సికింద్రాబాద్ గాంధీ ఆసుపత్రి,గాంధీ మెడికల్ కాలేజీ లో బుధవారం డీఎంఈ డాక్టర్ ఎ.నరేంద్ర కుమార్ పర్యటించారు. శనివారం గాంధీ ఆసుపత్రిలో నీటి పంపింగ్ నిలిచిపోవడం వల్ల రోగులకు కలిగిన ఇబ్బందులను తెలుసుకుని, దాని పరిష్కారం కోసం చేపట్టిన అండర్ గ్రౌండ్ కేబుల్ ఏర్పాటు పనులను ఆయన పరిశీలించారు. కేబుల్ ఏర్పాటు పని పూర్తి అయ్యిందని, నీటి పంపింగ్ ఇప్పుడు సజావుగా జరుగుతున్నదని సూపరింటెండెంట్ డాక్టర్ రాజకుమారి ఆయనకు వివరించారు. అనంతరం ఓపి బ్లాక్ లో ఆయుష్మాన్ భారత్ ఆన్ లైన్ పోర్టల్ ద్వారా జరుగుతున్న రిజిస్ట్రేషన్ విధానాన్ని, రేడియాలజీ విభాగంలో స్కానింగ్, ఎక్స్ రే ల పనితీరును తెలుసుకున్నారు. జీరియాట్రిక్ వార్డులను ఆయన సందర్శించారు. గాంధీ వైద్య కళాశాల లైబ్రరీ, పీజీ హాస్టల్ ను సందర్శించి విద్యార్థుల సమస్యలను అడిగి తెలుసుకున్నారు. పెండింగ్ పనులు ఏవైనా ఉంటే సత్వరమే పూర్తి చేయాలని ఆమె కళాశాల ప్రిన్సిపల్ డాక్టర్ కె ఇందిరకు సూచించారు. ఈ సందర్భంగా జూనియర్ డాక్టర్ల సంఘం రాష్ట్ర ప్రధాన కార్యదర్శి, గాంధీ యూనిట్ అధ్యక్షుడు డాక్టర్ అజయ్ కుమార్ గౌడ్ మాట్లాడుతూ పీజీ విద్యార్థుల స్టైఫండ్ సమస్యను వెంటనే పరిష్కరించాలని డీఎమ్ఈ ని కోరారు.ఆయన వెంట ఆసుపత్రి ఆర్ఎంవోలు, ఇతర వైద్యాధికారులు, సిబ్బంది ఉన్నారు.