బాపూఘాట్ అభివృద్ధి, క్రైమ్–డ్రగ్స్ నియంత్రణపై ప్రభుత్వ నిర్లక్ష్యం -కవిత విమర్శ

హైదరాబాద్ డిసెంబర్ 13 (ప్రజా మంటలు):

జాగృతి జనంబాట కార్యక్రమంలో భాగంగా హైదరాబాద్ జిల్లాలో నాలుగో రోజు తెలంగాణ జాగృతి అధ్యక్షురాలు కల్వకుంట్ల కవిత పర్యటించారు. శనివారం కార్వాన్ నియోజకవర్గ పరిధిలోని బాపూఘాట్‌ను సందర్శించి, మహాత్మా గాంధీ విగ్రహానికి నివాళులు అర్పించారు. అనంతరం బాపూఘాట్ నుంచి లంగర్ హౌస్ దర్గాకు ఆటోలో ప్రయాణించి దర్గా వద్ద చాదర్ సమర్పించారు.

ఈ సందర్భంగా కవిత మాట్లాడుతూ బాపూఘాట్ ప్రాంతం డ్రగ్స్, అసాంఘిక కార్యకలాపాలకు కేంద్రంగా మారిందని, దీనిపై ప్రభుత్వం, పోలీసులు వెంటనే దృష్టి పెట్టాలని డిమాండ్ చేశారు. గాంధీ విగ్రహం ఏర్పాటు చేస్తామని గతంలో ఇచ్చిన హామీలు ఇప్పటివరకు నెరవేరలేదని గుర్తు చేశారు. కనీసం ఈ ప్రభుత్వమైనా బాపూఘాట్ అభివృద్ధికి చర్యలు తీసుకోవాలని కోరారు.

ఆటో డ్రైవర్లకు ఇచ్చిన హామీ ఏది?

ఫ్రీ బస్ పథకం అమలులోకి వచ్చిన తర్వాత ఆటో డ్రైవర్లు తీవ్ర ఇబ్బందులు ఎదుర్కొంటున్నారని, వారికి హామీ ఇచ్చిన రూ.12 వేల ఆర్థిక సహాయం వెంటనే అందించాలని, ఆటో డ్రైవర్ల కోసం వెల్ఫేర్ బోర్డు ఏర్పాటు చేయాలని అన్నారు. నగరంలో ఆటోలు కీలకమని, కానీ ఆటో స్టాండ్లు లేకపోవడం బాధాకరమని పేర్కొన్నారు.

హైదరాబాద్‌లో నీటి సమస్య, డ్రైనేజీ సమస్యలు తీవ్రంగా ఉన్నాయని, కనీస సౌకర్యాలు లేకుండా గ్లోబల్ సిటీ ఎలా అవుతుందని ప్రశ్నించారు. మహిళలకు ఇచ్చిన రూ.2,500 హామీని వెంటనే అమలు చేయాలని డిమాండ్ చేశారు. కాంగ్రెస్ ప్రభుత్వం వచ్చిన తర్వాత మహిళలపై దురాగతాలు, హత్యలు పెరిగాయని విమర్శించారు. క్రైమ్, గంజాయి, డ్రగ్స్ సమస్యలు నియంత్రించకపోతే ప్రభుత్వం ఉన్నా లేనట్లేనని వ్యాఖ్యానించారు.

జియాగూడ మేకల మండి 

జియాగుడ మేకల మండిని సందర్శించిన కవిత, అక్కడ రోడ్లపై మేకల విక్రయంతో ట్రాఫిక్‌కు తీవ్ర ఆటంకం ఏర్పడుతోందని తెలిపారు. 100 ఫీట్ల రోడ్డును తవ్వి వదిలేయడంతో కనీస సౌకర్యాలు లేకుండా పోయాయని, న్యాయమూర్తులు, న్యాయవాదులు వెళ్లే రోడ్లకే ఈ పరిస్థితి ఉంటే పేద ప్రాంతాల పరిస్థితి అర్థమవుతుందని అన్నారు.

మాంసాహారం మన సంస్కృతిలో భాగమని, అనేక కులాలు ఈ వృత్తిపై ఆధారపడి జీవిస్తున్నాయని చెప్పారు. జియాగుడ ప్రాంతంలో మోడ్రన్ స్లాటర్ హౌస్‌లు తప్పనిసరిగా నిర్మించాల్సిన అవసరం ఉందని, ఇందుకు రూ.56 కోట్లు సాంక్షన్ అయ్యాయని పేర్కొన్నారు. వానాకాలంలో పరిస్థితి మరింత దారుణంగా మారుతోందని, స్లాటర్ హౌస్‌లు నిర్మిస్తే వ్యాపారం క్రమబద్ధమవుతుందని తెలిపారు.

మూసీ నది సుందరీకరణకన్నా ముందు మౌలిక వసతులు 

మూసీ రివర్ ఫ్రంట్ బ్యూటిఫికేషన్ కోసం ప్రపంచ బ్యాంక్ నిధులు తీసుకొస్తున్న ప్రభుత్వం, ముందుగా మోడ్రన్ స్లాటర్ హౌస్‌ల నిర్మాణంపై దృష్టి పెట్టాలని డిమాండ్ చేశారు. అనంతరం జియాగుడ గోశాలను సందర్శించి గోవులకు ఆహారం అందజేశారు.