కాంగ్రెస్ పాలనలో అభివృద్ధి నిలిచిపోయింది: జగిత్యాలలో బీఆర్ఎస్ నేతల తీవ్ర విమర్శలు

జగిత్యాల (రూరల్) డిసెంబర్ 13 (ప్రజా మంటలు):

జగిత్యాల జిల్లా బీఆర్ఎస్ పార్టీ కార్యాలయంలో నిర్వహించిన మీడియా సమావేశంలో జిల్లా పార్టీ అధ్యక్షుడు కల్వకుంట్ల విద్యాసాగర్ రావు, మాజీ మంత్రి కొప్పుల ఈశ్వర్, చొప్పదండి మాజీ ఎమ్మెల్యే సుంకే రవి శంకర్,మాజీ మంత్రి రాజేశం గౌడ్జి,తొలి జడ్పీ చైర్‌పర్సన్ దావ వసంత సురేష్ పాల్గొన్నారు. ఈ సందర్భంగా కాంగ్రెస్ ప్రభుత్వంపై తీవ్ర విమర్శలు గుప్పించారు.

మాజీ మంత్రి కొప్పుల ఈశ్వర్ మాట్లాడుతూ, బీఆర్ఎస్ పాలనలో జగిత్యాల జిల్లా అభివృద్ధి పరుగులు పెట్టిందని అన్నారు. కాంగ్రెస్ ప్రభుత్వానికి రెండు సంవత్సరాల సమయం ఇచ్చినా ఆశించిన ఫలితాలు కనిపించలేదన్నారు. ధర్మపురిలో మంజూరైన వ్యవసాయ కళాశాల ఇతర ప్రాంతానికి తరలించడంపై అసంతృప్తి వ్యక్తం చేశారు. ధర్మపురి MCH 50 పడకల ఆసుపత్రి రెండేళ్లుగా పూర్తి అయి ఉన్నా ప్రారంభం చేయకపోవడం ప్రభుత్వ వైఫల్యమని అన్నారు.

కల్వకుంట్ల విద్యాసాగర్ రావు మాట్లాడుతూ, “ఏ అభివృద్ధి చేశారో చెప్పకుండా విజయోత్సవాలు చేసుకోవడం విడ్డూరం” అన్నారు. బీఆర్ఎస్ పాలనలో కేటీఆర్, హరీష్ రావు సహకారంతో జగిత్యాల జిల్లాలో విస్తృత అభివృద్ధి జరిగిందని చెప్పారు. కోరుట్ల, మెట్‌పల్లి మునిసిపాలిటీలకు TUFIDC ద్వారా రూ.15 కోట్లు మంజూరయ్యాయని గుర్తు చేశారు. దేవస్థానాలకు నిధులు, సంఘ భవనాలు, రోడ్ల నిర్మాణాలకు కేటాయింపులు జరిగినా ప్రస్తుత ప్రభుత్వం వాటిని అమలు చేయడం లేదని ఆరోపించారు.

ఆస్పత్రుల్లో మౌలిక వసతుల కొరత 

కోరుట్ల–మెట్‌పల్లి ఆసుపత్రికి రూ.6 కోట్లతో దాదాపు పనులు పూర్తయ్యాయని, మౌలిక సదుపాయాల కల్పనలో నిర్లక్ష్యం వహిస్తున్నారని అన్నారు. ఇంటిగ్రేటెడ్ మార్కెట్ అస్తవ్యస్థంగా మారిందని, AMC ఆధునికీకరణ చేసిన కాంట్రాక్టర్లకు బిల్లులు చెల్లించాలన్నారు. గతంలో లోలెవెల్ బ్రిడ్జ్‌లను హై లెవెల్ బ్రిడ్జ్‌లుగా మార్చామని, వాటిలో కొన్ని ఇప్పటికీ అసంపూర్తిగా ఉన్నాయని విమర్శించారు.

దావ వసంత సురేష్ మాట్లాడుతూ, జగిత్యాల నియోజకవర్గంలో “అభివృద్ధి” అనే మాట ఎమ్మెల్యేకు కేవలం నినాదంగా మారిందని విమర్శించారు. బీఆర్ఎస్ టికెట్‌పై గెలిచి పార్టీ మారిన ఎమ్మెల్యే అభివృద్ధి పేరుతో ప్రజలను మభ్యపెడుతున్నారని ఆరోపించారు. గత బీఆర్ఎస్ ప్రభుత్వం వందల కోట్ల నిధులు కేటాయించినా వాటిని పూర్తి చేయడంలో పూర్తిగా విఫలమయ్యారని అన్నారు.

యావర్ రోడ్ విస్తరణ, మోడల్ మార్కెట్ ప్రారంభం, మెడికల్ కాలేజీ నిర్మాణం, డబుల్ బెడ్ రూమ్ ఇళ్ల పూర్తి విషయంలో తీవ్ర నిర్లక్ష్యం జరిగిందని చెప్పారు. అభివృద్ధి పనుల కాంట్రాక్టులలో షాడో కాంట్రాక్టర్‌గా ఎమ్మెల్యే వ్యవహరిస్తున్నారనే ఆరోపణలు ప్రజల్లో ఉన్నాయని తెలిపారు. పట్టణంలో స్పీడ్ బ్రేకర్లు, డ్రైనేజీ, రోడ్ల సమస్యలు తీవ్రంగా ఉన్నాయని అన్నారు.

సుంకే రవి శంకర్ మాట్లాడుతూ, 100 రోజుల్లో హామీలు నెరవేరుస్తామని అధికారంలోకి వచ్చిన కాంగ్రెస్ ప్రభుత్వం ప్రజలను నిరాశపరిచిందన్నారు. పెన్షన్లు, ఫీజు రీయింబర్స్‌మెంట్, సంక్షేమ పథకాల అమలులో వైఫల్యాన్ని ఎత్తిచూపారు. బీఆర్ఎస్ పాలనలో చొప్పదండి నియోజకవర్గానికి భారీ నిధులు, కొండగట్టు దేవస్థానం తాగునీటి శాశ్వత పరిష్కారానికి కేటాయింపులు జరిగాయని, వాటిని ప్రస్తుత ప్రభుత్వం రద్దు చేసిందని విమర్శించారు.

ఈ సమావేశంలో గోడిసెల రాజేశం గౌడ్, ఎల్లాల శ్రీకాంత్ రెడ్డి, లోక బాపు రెడ్డి, మారు సాయి రెడ్డి, దేవేందర్ నాయక్ రాథోడ్, శీలం ప్రవీణ్, వొళ్లెం మల్లేశం, ఆయిల్నేని వెంకటేశ్వర్ రావు, చిట్ల రమణ తదితరులు పాల్గొన్నారు.