హైదరాబాద్‌లో విద్యాసంస్థల దయనీయ పరిస్థితులపై ఆందోళన

హైదరాబాద్, డిసెంబర్ 12 (ప్రజా మంటలు):

జాగృతి జనంబాట కార్యక్రమం మూడో రోజు భాగంగా తెలంగాణ జాగృతి అధ్యక్షురాలు కల్వకుంట్ల కవిత హైదరాబాద్ జిల్లాలోని అంబర్‌పేట్, సికింద్రాబాద్, ముషీరాబాద్ నియోజకవర్గాల్లో పర్యటించారు. అంబర్‌పేట్ నియోజకవర్గంలో కాచిగూడ ప్రభుత్వ విద్యాసంస్థలు మరియు చె నంబర్ బ్రిడ్జి కిందనున్న రోడ్డును ఆమె స్వయంగా పరిశీలించారు.

కాచిగూడ ప్రభుత్వ స్కూల్, జూనియర్ కాలేజ్ పరిస్థితిపై తీవ్ర అసంతృప్తి

అంబర్‌పేట్‌లోని కాచిగూడ హైస్కూల్ మరియు జూనియర్ కాలేజ్‌ను సందర్శించిన కవిత గారు అక్కడి విద్యార్థులు, అధ్యాపకులతో మాట్లాడారు.
ఆమె వెల్లడించిన ముఖ్యాంశాలు:

• 60 ఏళ్ల కిందట నిర్మించిన అదే భవనంలోనే నేటికీ స్కూల్, కాలేజ్ కొనసాగుతున్నాయి.
• కొత్త భవనానికి నిధులు వచ్చినప్పటికీ అది నిర్లక్ష్యంగా వదిలేశారు, ప్రస్తుతం ఉన్న భవనానికి అయితే కనీసం పెయింటింగ్ కూడా లేదు.
• అదే క్యాంపస్‌లో రెండు ప్రైమరీ స్కూళ్లు, ఎస్టీ హాస్టల్ నడపడం వల్ల మౌలిక సదుపాయాలపై భారీ ఒత్తిడి ఏర్పడింది.
• లైబ్రరీ, కంప్యూటర్ ల్యాబ్, ఆధునిక సౌకర్యాలు లేకపోవడం ఆమె ఆందోళన వ్యక్తం చేశారు.
• ఎంపీసీ, బైపీసీ గ్రూపుల్లో విద్యార్థుల సంఖ్య చాలా తక్కువగా ఉందని పేర్కొన్నారు.
• పేద కుటుంబాలకు చెందిన విద్యార్థులకు మిడ్ డే మీల్ అందించడం అత్యవసరమని, మధ్యాహ్న భోజనం కోసం బయటికి వెళ్లిన విద్యార్థులు తిరిగి తరగతులకు రానందున పాస్ పర్సెంటేజ్ తగ్గిపోతుందని తెలిపారు.

“ప్రభుత్వం అనుమతి ఇస్తే జాగృతి తరఫున ఏదైనా సంస్థ ద్వారా మిడ్ డే మీల్ ఏర్పాటు చేస్తాం. అవసరమైన అనుమతుల కోసం మేము కృషి చేస్తాం.”

అదేవిధంగా, సిబ్బంది కొరత, అదనపు పనుల భారంతో బాధపడుతున్న టీచర్ల సేవలను ఆమె ప్రశంసించారు.

చే నంబర్ బ్రిడ్జి కింద రోడ్డుపై స్పందన

అంబర్‌పేట్‌లోని చే నంబర్ బ్రిడ్జి కింద రహదారి ఏళ్ల తరబడి పెండింగ్‌లో ఉండటంపై ప్రజలు ఎత్తిన సమస్యను కవిత గారు ప్రత్యేక దృష్టిలోకి తీసుకున్నారు.
ఈ రూట్‌ను తాము పరిశీలిస్తామని షెడ్యూల్ పెట్టగానే, రాత్రికి రాత్రే అధికారులు రోడ్డు వేశారని ఆమె వెల్లడించారు. ఇది ప్రజా సమస్యలపై ప్రజా ప్రతినిధులు స్పందించినప్పుడు జరిగే మార్పుకు నిదర్శనమని పేర్కొన్నారు.