హైడ్రా కమిషనర్ రంగనాథ్‌పై కవిత ఆగ్రహం – డిఫమేషన్ కేసు వేస్తా, మూసీ ప్రక్షాళనపై తీవ్ర విమర్శలు

.“హైడ్రాపై కవిత తీవ్ర ఆరోపణలు: పేదల ఇళ్లు కూల్చి పెద్దలను కాపాడుతున్నారా?”
“మూసీ ప్రక్షాళనలో 1400 కోట్లు ఎలా పెరిగాయి? ప్రభుత్వం సమాధానం చెప్పాలి: కవిత”
“హైడ్రా వీడియోలు వెంటనే తొలగించాలి.. లేదంటే కోర్టు!” – రంగనాథ్‌కు కవిత హెచ్చరిక
“మూసీ ప్రక్షాళన పేరుతో ప్రజాధనం దోపిడీ జరుగుతోంది: కవిత సంచలన వ్యాఖ్యలు”

వెలుగుమట్ల బాధితులకు పూర్తి న్యాయం జరగలేదు: వారికి అండగా ఉంటా.

హైదరాబాద్, మార్చి 16 (ప్రజా మంటలు):

హైడ్రా కమిషనర్ రంగనాథ్‌పై తెలంగాణ జాగృతి అధ్యక్షురాలు కల్వకుంట్ల కవిత తీవ్ర స్థాయిలో మండిపడ్డారు. తనపై తప్పుడు ప్రచారం చేస్తే డిఫమేషన్ కేసు వేసి కోర్టుకు లాగుతానని హెచ్చరించారు.
ఆదివారం బంజారాహిల్స్‌లోని తెలంగాణ జాగృతి కార్యాలయంలో నిర్వహించిన ప్రెస్‌మీట్‌లో ఆమె మాట్లాడారు. రాష్ట్రంలో కాంగ్రెస్ ప్రభుత్వం అధికారంలోకి వచ్చిన తర్వాత హైడ్రా అనే మహమ్మరి వదిలైందని, అది ముఖ్యంగా పేదలను లక్ష్యంగా చేసుకుంటోందని విమర్శించారు.
మూసీ నది పరివాహక ప్రాంతంలో నిర్మించిన ఆదిత్య కన్‌స్ట్రక్షన్‌కు చెందిన భవనం వద్ద ఇటీవల తాను నిర్వహించిన ధర్నాపై హైడ్రా తప్పుడు ప్రచారం చేసిందని కవిత ఆరోపించారు. గతంలో ఇదే నిర్మాణం 0.37 ఎకరాలు ఆక్రమించిందని రంగనాథ్ స్వయంగా తహసీల్దార్‌కు లేఖ రాసిన విషయం గుర్తు చేశారు.

“ఆ నిర్మాణం ఆపకపోతే అక్కడ నివసించే ప్రజల ప్రాణాలకు ప్రమాదమని మీరు లేఖ రాయలేదా? ఇప్పుడు నేను అదే విషయంపై ధర్నా చేస్తే ఎందుకు తప్పుడు ప్రచారం చేస్తున్నారు?” అంటూ ప్రశ్నించారు.
హైడ్రా సోషల్ మీడియాలో పెట్టిన వీడియోలను వెంటనే తొలగించాలని డిమాండ్ చేసిన కవిత, లేదంటే కోర్టుకు వెళ్తానని హెచ్చరించారు. నిజం మాట్లాడే వారిపై వీడియోలను ఎడిట్ చేసి ఎదురుదాడి చేయడం సరికాదన్నారు.
హైడ్రా పేదవారి ఇళ్లను కూల్చేస్తూ పెద్దవారి అక్రమ నిర్మాణాలపై చర్యలు తీసుకోవడం లేదని విమర్శించారు. ఇప్పటివరకు తాను ఆధారాలతో కలిసి ఆరు ఫిర్యాదులు చేసినా ఒక్క చర్య కూడా తీసుకోలేదని ప్రశ్నించారు.
“ఈ ప్రభుత్వం, హైడ్రా గ్రాఫిక్స్ డిజైనర్లా? కంటెంట్ క్రియేటర్లా? మొత్తం ప్రభుత్వానికి ఫేక్ డిజిటల్ వాసన వస్తోంది” అంటూ ఆమె విమర్శలు గుప్పించారు.

“మూసీ ప్రక్షాళనలో 1400 కోట్లు ఎలా పెరిగాయి? ప్రభుత్వం సమాధానం చెప్పాలి: కవిత”
మూసీ ప్రక్షాళనతో ప్రజలకు లాభం ఏంటి?
మూసీ ప్రక్షాళన పేరుతో ప్రభుత్వం ప్రజాధనాన్ని దోపిడీ చేయడానికి ప్రయత్నిస్తోందని కవిత ఆరోపించారు. ఇటీవల ప్రభుత్వం ఇచ్చిన ప్రెజెంటేషన్‌లో మూసీ ప్రక్షాళన వల్ల ప్రజలకు కలిగే లాభాల గురించి స్పష్టంగా చెప్పలేదని విమర్శించారు.
ప్రాజెక్ట్ ఫేజ్-1 ఖర్చు 6,500 నుంచి 7,000 కోట్ల రూపాయల వరకు అవుతుందని ప్రభుత్వం చెప్పిందని, కానీ ఆరు నెలల క్రితం మాత్రం 5,641 కోట్లు అని చెప్పిందని గుర్తు చేశారు. ఆరు నెలల్లోనే దాదాపు 1,400 కోట్ల రూపాయలు ఎలా పెరిగాయో ప్రజలకు వివరించాలని డిమాండ్ చేశారు.
ఈ ప్రాజెక్ట్‌లో ఎస్టీపీల నిర్మాణం, మూసీలో కలిసే 16 నాలాల మురుగు నీటి సమస్య, బాధితులకు పరిహారం వంటి అంశాలపై స్పష్టత లేదని అన్నారు.
గత ప్రభుత్వం మూసీ రివర్‌బెడ్‌లో 30 లక్షల చదరపు అడుగుల నిర్మాణానికి అనుమతి ఇవ్వలేదని, అయితే ప్రస్తుత ప్రభుత్వం ఫేజ్-1లోనే 18 లక్షల చదరపు అడుగుల నిర్మాణానికి ఎలా అనుమతిచ్చిందని ప్రశ్నించారు.
మూసీ ప్రక్షాళనపై బాధితులతో కాకుండా రియల్ ఎస్టేట్ ప్రతినిధులు, ప్రపంచ బ్యాంక్ అధికారులతో సమావేశాలు నిర్వహించడం ఎందుకని ప్రశ్నించారు. మూసీ ప్రక్షాళన ప్రజలకు మేలు చేసే విధంగా ఉండాలని ఆమె స్పష్టం చేశారు.

వెలుగుమట్లలో పోరాటం కొనసాగుతుంది వెలుగుమట్ల బాధితులకు పూర్తి న్యాయం జరగలేదు: వారికి అండగా ఉంటా.
వెలుగుమట్లలో ప్రభుత్వం 750 ఇళ్లను కూల్చేసిందని, అయితే బాధితులలో సగం మందికీ కూడా న్యాయం జరగలేదని కవిత ఆరోపించారు. నిరవధిక దీక్ష అనంతరం 350 కుటుంబాలకు ఇళ్ల పట్టాలు ఇస్తామని ప్రభుత్వం ప్రకటించినప్పటికీ ఇప్పటికీ అందరికీ ఇవ్వలేదన్నారు.
అక్కడ ఉన్న 31 ఎకరాలతో పాటు మరో 30 ఎకరాల భూదాన్ భూమిని పెద్దలకు కేటాయించే కుట్ర జరుగుతోందని ఆరోపించారు. ఈ అంశంపై ఈ నెల 17న ఫ్యాక్ట్ ఫైండింగ్ కమిటీ ఏర్పాటు చేస్తామని తెలిపారు.
బాధిత కుటుంబాలకు న్యాయం జరిగే వరకు వారికి ధర్మ సమాజ్ పార్టీ, తెలంగాణ జాగృతి అండగా ఉంటాయని హామీ ఇచ్చారు.