ట్యాంక్ బండ్‌ పై ఫూలే విగ్రహ పనుల పరిశీలించిన కవిత–

హైదరాబాద్, ఫిబ్రవరి 20 (ప్రజా మంటలు):

ట్యాంక్ బండ్‌పై ఐమాక్స్ ఎదురుగా ఉన్న లేక్ వ్యూ పార్క్‌లో మహాత్మా జ్యోతిరావు ఫూలే గారి విగ్రహ ఏర్పాటు పనులను తెలంగాణ జాగృతి అధ్యక్షురాలు కల్వకుంట్ల కవిత పరిశీలించారు.

అసెంబ్లీలోనూ ఫూలే విగ్రహం ఏర్పాటు చేయాలి

రెండున్నరేళ్లుగా ఫూలే గారి విగ్రహాన్ని అసెంబ్లీలో ఏర్పాటు చేయాలని తెలంగాణ జాగృతి పోరాటం చేస్తోందని కవిత తెలిపారు. వరుస ఉద్యమాల ఫలితంగానే ప్రభుత్వం దిగివచ్చి ట్యాంక్ బండ్‌పై విగ్రహ ఏర్పాటుకు ముందుకు వచ్చిందని అన్నారు. అయితే ఇది పాక్షిక విజయమేనని, అసెంబ్లీలో కూడా విగ్రహం తప్పనిసరిగా ఉండాలన్నదే తమ డిమాండ్ అని స్పష్టం చేశారు.

ఫూలే విగ్రహంపై ప్రభుత్వానికి స్పష్టత లేదు

ట్యాంక్ బండ్‌పై ఫూలే గారి విగ్రహం మాత్రమే పెడతారా? లేక సావిత్రిబాయి ఫూలేతో కలిపి విగ్రహం ఏర్పాటు చేస్తారా? అనే విషయంలో ప్రభుత్వం ఇప్పటికీ స్పష్టత ఇవ్వలేదని విమర్శించారు. విగ్రహం ఏర్పాటు అనంతరం ఎవరైనా, ఎప్పుడైనా నివాళులు అర్పించేలా సౌకర్యాలు కల్పించాలని కోరారు.

బీసీలకు 42 శాతం రిజర్వేషన్లు అమలు చేయాలి

బీసీ రిజర్వేషన్ల అమలుపై ప్రభుత్వానికి చిత్తశుద్ధి లేదని కవిత ఆరోపించారు. మున్సిపల్ ఎన్నికల్లో 42 శాతం రిజర్వేషన్లు ఇవ్వలేదని, కనీసం ఎంపీటీసీ, జడ్పీటీసీ ఎన్నికల్లో అయినా అమలు చేయాలని డిమాండ్ చేశారు.

బీసీ బిల్లుల కోసం ఢిల్లీకి అఖిలపక్షం

పెండింగ్‌లో ఉన్న బీసీ బిల్లులకు ఆమోదం లభించేలా ప్రభుత్వం ఢిల్లీకి అఖిలపక్షాన్ని తీసుకెళ్లాలని కోరారు. ఈ విషయంలో సీఎం రేవంత్ రెడ్డి ప్రధాని నరేంద్ర మోడీపై గట్టి ఒత్తిడి పెంచాలని సూచించారు.

వరుస ఎన్నికలతో బీసీలకు అన్యాయం

విద్యార్థుల పరీక్షలను కూడా పట్టించుకోకుండా ప్రభుత్వం వరుస ఎన్నికలు నిర్వహిస్తోందని, దీని వల్ల బీసీలకు 42 శాతం రిజర్వేషన్లు దక్కకుండా చేస్తున్నారని మండిపడ్డారు.

బడ్జెట్‌లో బీసీలకు రూ.20 వేల కోట్లు కేటాయించాలి

బడ్జెట్‌లో బీసీలకు ఏటా రూ.20 వేల కోట్లు కేటాయిస్తామని ఇచ్చిన హామీని ప్రభుత్వం నిలబెట్టుకోవాలని డిమాండ్ చేశారు. గత రెండు బడ్జెట్లలో బీసీలకు తక్కువ కేటాయింపులు చేసి, అందులో 30 శాతం కూడా ఖర్చు చేయలేదని విమర్శించారు.

తెలంగాణ తల్లి విగ్రహంపై విమర్శలు

బతుకమ్మ లేని తెలంగాణ తల్లి విగ్రహం తెలంగాణ తల్లి కాదని, ప్రభుత్వం పెట్టే కాంగ్రెస్ తల్లి బొమ్మకు ప్రజల ఆమోదం లభించదని వ్యాఖ్యానించారు. బలవంతంగా ప్రతీకలను ప్రజలపై రుద్దడం సరికాదని అన్నారు.

కార్పొరేషన్ పదవుల్లో అగ్రకులాలకే ప్రాధాన్యం

కార్పొరేషన్ పదవులను అగ్రకులాల వారికే ఇస్తున్నారని ఆరోపించిన కవిత, ఎన్నికల్లో గెలవలేని బీసీ, మహిళ, మైనార్టీలకు ఆ పదవులు ఇవ్వాలని డిమాండ్ చేశారు.

జయశంకర్ సార్ విగ్రహాన్ని ట్యాంక్ బండ్‌పై ఏర్పాటు చేయాలి

తెలంగాణ ఆత్మగౌరవానికి ప్రతీక అయిన ప్రొఫెసర్ జయశంకర్ సార్ విగ్రహాన్ని కూడా ట్యాంక్ బండ్‌పై ఏర్పాటు చేయాలని కోరారు. ప్రభుత్వం స్థలం కేటాయిస్తే విగ్రహ ఏర్పాటు, నిర్వహణ ఖర్చులను తెలంగాణ జాగృతి భరిస్తుందని తెలిపారు.

ప్రతిపక్షాల వైఫల్యం – జాగృతే నిజమైన ప్రతిపక్షం

రాష్ట్రంలో బీఆర్ఎస్, బీజేపీలు ప్రతిపక్షాలుగా విఫలమయ్యాయని, అందుకే కాంగ్రెస్ హామీలు నెరవేర్చకపోయినా ఎక్కువ స్థానాలు గెలుచుకుందని అన్నారు. రాష్ట్రంలో నిజమైన ప్రతిపక్షం పాత్రను తెలంగాణ జాగృతే పోషిస్తోందని కవిత స్పష్టం చేశారు.