విజయకాంత్.డీఎండీకే పార్టీ డీఎంకే కూటమిలో తొలిసారి చేరిక

చెన్నై, ఫిబ్రవరి 19 (ప్రజా మంటలు):

తమిళనాడు రాజకీయాల్లో కీలక పరిణామం చోటుచేసుకుంది. ఇప్పటి వరకు ఎప్పుడూ డీఎంకే కూటమిలో చేరని డీఎండీకే, తొలిసారిగా డీఎంకే నేతృత్వంలోని కూటమిలో చేరింది. అన్నాడీఎంకే కూటమి నుంచి వైదొలిగిన డీఎండీకే, 2026 అసెంబ్లీ ఎన్నికల్లో డీఎంకే కూటమిలో భాగంగా పోటీ చేయనుంది.

పార్టీ ఆవిర్భావం నుంచి ఇప్పటి వరకు డీఎంకే కూటమికి దూరంగా ఉన్న డీఎండీకే, ఇప్పుడు ఆ కూటమికి బలాన్ని చేకూర్చనుందని రాజకీయ వర్గాలు అంచనా వేస్తున్నాయి. ఈ పరిణామం డీఎంకే కూటమికి వ్యూహాత్మకంగా కీలకంగా మారనుంది.

చెన్నైలోని అన్నా అరివాలయంలో జరిగిన సమావేశంలో తమిళనాడు ముఖ్యమంత్రి, డీఎంకే అధ్యక్షుడు ఎం.కే. స్టాలిన్ను డీఎండీకే ప్రధాన కార్యదర్శి ప్రేమలత విజయకాంత్, కోశాధికారి ఎం.కే. సుధీష్ తదితరులు కలిశారు. ఈ సందర్భంగా జరిగిన చర్చల్లో డీఎండీకే డీఎంకే కూటమిలో చేరుతుందని అధికారికంగా నిర్ధారణ అయింది.

డీఎండీకే నేత ఎం.కే. సుధీష్ ముఖ్యమంత్రి స్టాలిన్‌కు బంగారు పూత పూయగా, కూటమిలోకి వచ్చిన డీఎండీకేకు స్వాగతంగా సీఎం స్టాలిన్ ప్రేమలతకు పూల గుత్తిని అందజేశారు. ఈ దృశ్యాలు తమిళనాడు రాజకీయాల్లో కొత్త సమీకరణలకు సంకేతంగా నిలిచాయి.

అన్నాడీఎంకే కూటమి నుంచి డీఎండీకే బయటకు రావడంలో ఇ.వి. వేలు కీలక పాత్ర పోషించారని రాజకీయ వర్గాల్లో చర్చ సాగుతోంది. చర్చలు, సంప్రదింపుల ద్వారా డీఎండీకేను డీఎంకే వైపు తీసుకువచ్చారని చెబుతున్నారు.

2011 నుంచి అన్నాడీఎంకే కూటమిలో భాగంగా ఎన్నికల్లో పోటీ చేసిన డీఎండీకే, ఇప్పుడు 2026 అసెంబ్లీ ఎన్నికలకు ద్రవిడ మున్నేట్ర కజగం నేతృత్వంలోని కూటమిలో చేరడం రెండు పార్టీలకూ అనుకూలంగా మారుతుందని విశ్లేషకులు అభిప్రాయపడుతున్నారు. ఇది తమిళనాడు రాజకీయ సమీకరణలను గణనీయంగా మార్చే అవకాశం ఉందని అంటున్నారు.