కరీంనగర్ కార్పొరేషన్‌ను కాంగ్రెస్ కైవసం చేసుకుంటుంది: మంత్రులు

 కరీంనగర్, జనవరి 28 (ప్రజా మంటలు):

కరీంనగర్ మున్సిపల్ కార్పొరేషన్‌ను కచ్చితంగా కాంగ్రెస్ పార్టీ కైవసం చేసుకుంటుందని మంత్రులు ధీమా వ్యక్తం చేశారు. కాంగ్రెస్ పార్టీ కార్పొరేటర్ టికెట్ ఆశావహులతో నిర్వహించిన ముఖాముఖి సమావేశంలో మంత్రులు శ్రీధర్ బాబు, తుమ్మల నాగేశ్వరరావు, పొన్నం ప్రభాకర్ పాల్గొని మాట్లాడారు.

ఈ సందర్భంగా మంత్రి శ్రీధర్ బాబు మాట్లాడుతూ, గత మున్సిపల్ ఎన్నికల్లో అధికార దుర్వినియోగం, దౌర్జన్యాలు జరిగాయని ఆరోపించారు. ఈసారి అటువంటి పరిస్థితులకు తావు లేకుండా పార్టీని సమన్వయంతో ముందుకు తీసుకెళ్లేలా చర్యలు తీసుకుంటామని తెలిపారు. గెలిచే అభ్యర్థుల ఎంపికలో అందరం ఒకే నిర్ణయంతో ముందుకు వెళ్తామని స్పష్టం చేశారు. కాంగ్రెస్ పార్టీని నమ్ముకున్న కార్యకర్తలకు న్యాయం చేయడమే తమ లక్ష్యమని చెప్పారు.

టీఆర్ఎస్, బీజేపీ పార్టీల నుంచి రాష్ట్రవ్యాప్తంగా కాంగ్రెస్‌లోకి చేరికలు జరుగుతున్నాయని, ఇది పార్టీ బలాన్ని పెంచుతోందని పేర్కొన్నారు. కరీంనగర్ కార్పొరేషన్‌పై కాంగ్రెస్ జెండా ఎగరడం ఖాయమని ధీమా వ్యక్తం చేశారు.

జిల్లా ఇన్‌చార్జి మంత్రి తుమ్మల నాగేశ్వరరావు మాట్లాడుతూ, కరీంనగర్ జిల్లా కాంగ్రెస్ పార్టీకి అత్యంత కీలకమైన జిల్లాగా పేర్కొన్నారు. పదేళ్ల టీఆర్ఎస్ పాలనలో రాష్ట్ర అభివృద్ధి దెబ్బతిందని విమర్శించారు. ఇటీవల జరిగిన సర్పంచ్ ఎన్నికల్లో 70 శాతం కార్యకర్తలు గెలుపొందడం కాంగ్రెస్ బలానికి నిదర్శనమన్నారు.

మున్సిపల్ ఎన్నికల తర్వాత కష్టపడ్డ కార్యకర్తలకు నామినేటెడ్ పదవుల్లో న్యాయం చేసే బాధ్యత జిల్లా నాయకత్వంపై ఉందని తెలిపారు. అన్ని కార్పొరేషన్లలో కరీంనగర్ కార్పొరేషన్‌కు ప్రత్యేక ప్రాధాన్యత ఉందని, దరఖాస్తు చేసిన ప్రతి అభ్యర్థి దరఖాస్తును పరిశీలించి నిర్ణయం తీసుకుంటామని చెప్పారు.

మంత్రి పొన్నం ప్రభాకర్ మాట్లాడుతూ, ప్రజా పాలన ప్రభుత్వం గ్రామాల మాదిరిగానే పట్టణాల అభివృద్ధికి సమగ్ర ప్రణాళికతో ముందుకు సాగుతోందన్నారు. కరీంనగర్ కార్పొరేషన్‌లో 66 వార్డుల్లో అభ్యర్థుల ఎంపిక కోసం సర్వేలు జరుగుతున్నాయని తెలిపారు. ప్రభుత్వం అమలు చేస్తున్న సంక్షేమ పథకాలను ప్రజల్లోకి తీసుకెళ్లి పార్టీ గెలుపు కోసం కృషి చేయాలని కార్యకర్తలకు పిలుపునిచ్చారు.

టికెట్ ఎవరికొచ్చినా అందరూ కలిసి పనిచేసి కాంగ్రెస్ అభ్యర్థులను గెలిపించాలని మంత్రులు కోరారు. కరీంనగర్ కార్పొరేషన్‌ను కాంగ్రెస్ కైవసం చేసుకునేలా సమిష్టిగా పనిచేయాలని పిలుపునిచ్చారు.

ఈ సమావేశంలో డిసిసి అధ్యక్షుడు మేడిపల్లి సత్యం, కాంగ్రెస్ నాయకులు, టికెట్ ఆశావహులు పాల్గొన్నారు.